Gal 6 | HUI | STEP | I̱ hamene mbaliniru-o tígua mbiralime mana ko mbira bialu karia handarimiyagua wali agali Ngode Datagaliwabe Dinini ibugua laradagua biaga kamirume mo tiga bialu halimu. Mo tiga bialu howa bi hongo howa nale gedaore howa bayuwa mo tiga bilimu. Tínibi ko mbira bulene hame loligo de hondo halimu.

a 6.1Md 18.15, 1 Ko 2.15, 4.21, 7.5, 2 Ti 2.25, Hi 12.13, Ya 5.19

b 6.2Yo 13.14-15, Lm 15.1, 1 Te 5.14, 1 Yo 4.21

c 6.3Lm 12.3, 1 Ko 8.2, 2 Ko 3.5

d 6.41 Ko 11.28, 2 Ko 13.5

e 6.5Lm 2.6, 14.12, 1 Ko 3.8

f 6.6Lm 15.27, 1 Ko 9.11, 9.14

g 6.7Yob 13.9, Lg 16.25, Lm 2.6, 1 Ko 6.9

h 6.8Hos 8.7, 10.12, Yo 3.6, 6.63, Lm 8.13, Ya 3.18

i 6.91 Ko 15.58, 2 Te 3.13, Hi 3.6, 3.14, Mo 2.10

j 6.10Eb 2.19, 1 Te 5.15, 1 Ti 6.18, Hi 3.6

k 6.12Ga 2.3, 2.14, 5.11, Pb 3.18

l 6.14Lm 2.29, 6.6, 1 Ko 1.31, 2.2, Pb 3.3, 3.7-8

m 6.152 Ko 5.17, Ga 5.6, Kl 3.11

n 6.172 Ko 1.5, 4.10, 11.23, Ga 5.11, Kl 1.24

‏ Galatians 6

Inane genda ya haga haga bulene ngago ogo

1 I̱ hamene mbaliniru-o tígua mbiralime mana ko mbira bialu karia handarimiyagua wali agali Ngode Datagaliwabe Dinini ibugua laradagua biaga kamirume mo tiga bialu halimu. Mo tiga bialu howa bi hongo howa nale gedaore howa bayuwa mo tiga bilimu. Tínibi ko mbira bulene hame loligo de hondo halimu. ^a 2 Tíninaga genda yu kamigo ya hagahaga birimiyagua Kerisonaga mana lo ngadagua bialu holeberami. ^b 3 Mbirali ibu emene dindiha howa, I̱ timbuni karulapeore ko, lo manda bu kayagua ibugua ibuni mo hondo hara. ^c 4 Iname mana beramaligo bayalebe kobe inane hangu hangume dabami̱ya. Marume mana bialu kago hondowa ndo. Inane biaganego dege manda bialu, Mana ogoni bayaleda, manda biramayagua nde turu holene wulebira. ^d 5 Ina hangu hangume inanenaga genda yulene ngadagua yu hami̱ya. ^e

6 Kerisonaga bi mana hale halu bialu kagome ibunaga mbirale bayale mbira wigi bidago ibunaga lawai haga kago talebu mulene nga. ^f

7 Tígua tíni mo hondo nahalimu. Mbiralime Ngode Datagaliwabe mo hondo habe nahe ka. Mbirali ibu tomo egene ibuni hangarago alenaga lini do nolebira. ^g 8 Ibuni mini konaga dimagoli holene hangayagua ibu hangayagonaga lini homagane do nolebira. Ngode Datagaliwabe Dinini ibunaga hame ledago hangayagua ibugua hangayagonaga lini haabobo holene do nolebira. ^h 9 Anigo iname biabe bayale bulene ngago manga nahe bialu hami̱ya. Wahalu nape biaabo halu harimayagua nde awe birimagonaga lini bayale dedagola do noleberama. ⁱ 10 Ani manda buwa biabe bayale bulene henge ngangi wali agali bibahende ta nabihondo bayale bialu hami̱ya. Ngode Datagaliwabehondo mini mbiraorewi karu ina hameigini lowa tihondobi iname bayaleore bialu holene nga. ^j

Keriso ira bangani homayagonaga Polo ibu turu henego ogo

11 I̱na i̱ni gime tíhondo beba ogo gilibu wia harogo timbuni giligili berogo de handalimu. 12 Mine howa bi timbuni lalu dindini holene mana lalu karu ti degeme tíhondodongone podo mabu biagane mana bulene nga laga kagoni ndobe. Ani lalu kago irane Keriso ira bangani homayagonaga te lalu lamiaga karume tandaga nagadagua tibi nolilono bi ani lalu ka. ^k 13 Dongone podo mabu biagane mana bialu karumeMana lo winigo ngadagua ti biai nahaga ka. Tí kamiru dindi mana mbira ogoni bilo bia larimiyagua tigua tininaga mini yaraga halu, Tíbi bia dege birimigoni, lolenaga, Tí dongone podo mabu biagane mana bulene nga, lalu ka. 14 Ai i̱na Anduane Homogo Yasu Keriso ira bangani homayagonaga irane larogo hangume ibunaga mini yaraga halu holebero. Ibugua ira bangani homayagome dindi mana ngago i̱hayagi howa homaya. I̱ nde dindi mana ngagohondo homarugoni. ^l 15 Dongone podo mabu biaga mana binibi nabinibi galone ndo. Ngode Datagaliwabehanda inanaga holene mo gahenge henego galoneore ogoni. ^m 16 Wali agalime tinaga holene galoneore ogoni lowa mo tene ho karubi Ngode Datagaliwabenaga wali agali bibahende karubi tiha mo palia holenebi dara howa biamogo bulenebi wiaabo helo hamelo ko.

17 Bi lamaro bialu laro. Agalime i̱ bayago i̱naga tinginini motudu ngarume i̱ Yasunaga garabaya biabe bia haga henene ko lalu walia hagago mbiralime i̱ mo genda holene nawi. ⁿ

18 I̱ hamene mbaliniru-o ina Anduane Homogo Yasu Keriso ibunaga biamogo bia holene tí bibahendeha wiaabo helo hamelo ko. Aniore bilo laro.