Gen 14 | HUI | STEP | Bera ibu Sodomo tanonaga kini heagola Bisa ibu nde Gomora tanonaga kini hene. Sinaba ibu Adema tanonaga kini halu Semebe ibu Seboiminaga kini halu tano Bela mini mende Soa lagago ogoninaga kinibi hene. Kedolaome ibu dindi hobane mbira Elama kini howa ibugua kini duriali uruni mali homberiani (12) handaya ho henego ai mali halene (13) hayagola tigua Kedolaomenaga bi mo wahalu muni dagisi nami wahene. Ani bialu hemiria mali dene (14) hayagola Kedolaome ibugua ibunaga nenege kini tebirali mo mogo bu hene. Ibugua Babilonia dindi Kini Amarabelebi Elasa dindi Kini Ariagobi Goima dindi Kini Tidala imarubi ti mo mogo bu halu kini mariali uruni bibahende ami agaliru haru halu wai bule pene. Puwa Lebaimi hameigini Asederodo Kanaimu tanoni hearu baba wai bialu bo podo hana hene. Ani bialu puwa Susi hameigini Hama tanoni hearubi Emimi hameigini dindi tigabi yu dindi Kiriadaimi tanoni hearubi bo podaiore halu bini. Ani bialu Ho hameigini Hari Idomo heagoha hene hearubi bo podama pialu dindi Elebarana wiagoha piaho wialu amuraore wali agali napale wiagoha bo poda hanaho ngelalu Kadese tano dai bini. Kadese ogoni abale Enemisibada lagago ogoriani ibini. Ani bialu tigua Amalege hameigini bibahendeore mbira wanahe bo podaiore hene. Ani buwa Amoro hameigini Hasasono Tamara tanoha hearu baba wai bialu tigua bo poda dege bini. Tigua ani bo podai halu Kedolaome ibubi ibunaga nenege kini tebira biarubi tigua tano Sodomobi Gomorabi Ademabi Seboimi Belarunaga kini duriali hearu baba wai bule ibini. Ani ibiyagola kini duriali biarume tinaga wai biaga ami agaliru haru puwa Sidimi dindi ulini mbira wiagoria mo ngoai howa tidiyu howa Kedolaomebi ibu nenege kini tebira biaru heba wai bule manda manda buwa wai hanalu tidiyu haga haga bini. Ani anda ibiyagola kini duriali hene biarume kini maria ibiyaru baba wai timbuniore bialu hene.

‏ Genesis 14

Kini dege dege wai timbuni binigo ogo

1 Bera ibu Sodomo tanonaga kini heagola Bisa ibu nde Gomora tanonaga kini hene. Sinaba ibu Adema tanonaga kini halu Semebe ibu Seboiminaga kini halu tano Bela mini mende Soa lagago ogoninaga kinibi hene. Kedolaome ibu dindi hobane mbira Elama kini howa ibugua kini duriali uruni mali homberiani (12) handaya ho henego ai mali halene (13) hayagola tigua Kedolaomenaga bi mo wahalu muni dagisi nami wahene. Ani bialu hemiria mali dene (14) hayagola Kedolaome ibugua ibunaga nenege kini tebirali mo mogo bu hene. Ibugua Babilonia dindi Kini Amarabelebi Elasa dindi Kini Ariagobi Goima dindi Kini Tidala imarubi ti mo mogo bu halu kini mariali uruni bibahende ami agaliru haru halu wai bule pene. Puwa Lebaimi hameigini Asederodo Kanaimu tanoni hearu baba wai bialu bo podo hana hene. Ani bialu puwa Susi hameigini Hama tanoni hearubi Emimi hameigini dindi tigabi yu dindi Kiriadaimi tanoni hearubi bo podaiore halu bini. Ani bialu Ho hameigini Hari Idomo heagoha hene hearubi bo podama pialu dindi Elebarana wiagoha piaho wialu amuraore wali agali napale wiagoha bo poda hanaho ngelalu Kadese tano dai bini. Kadese ogoni abale Enemisibada lagago ogoriani ibini. Ani bialu tigua Amalege hameigini bibahendeore mbira wanahe bo podaiore hene. Ani buwa Amoro hameigini Hasasono Tamara tanoha hearu baba wai bialu tigua bo poda dege bini.

Tigua ani bo podai halu Kedolaome ibubi ibunaga nenege kini tebira biarubi tigua tano Sodomobi Gomorabi Ademabi Seboimi Belarunaga kini duriali hearu baba wai bule ibini. Ani ibiyagola kini duriali biarume tinaga wai biaga ami agaliru haru puwa Sidimi dindi ulini mbira wiagoria mo ngoai howa tidiyu howa Kedolaomebi ibu nenege kini tebira biaru heba wai bule manda manda buwa wai hanalu tidiyu haga haga bini. Ani anda ibiyagola kini duriali hene biarume kini maria ibiyaru baba wai timbuniore bialu hene.

10 Sidiminaga nira ulinihayagi wagaya duguaga gundu uli dewa wini. Ogoriani wai bialu howa Sodomonaga kinibi Gomoranaga kini biagobi libu ibida pole pialu hebiria gundu uli wagaya duguaga biagoha pilo wia handala kini tebira biaru ti ibida hari heagoha piai hene. 11 Kedalaomebi ibunaga nenege kini tebirali biarubi tigua wai hongo howa bialu tinaga waitigi hearu bo podai hene. Ani bialu tigua Sodomo Gomorala bo podalu uruni tinaga dabudabu wiarubi tomo bu wiarubi bibahende mo hilu yai halu pene. 12 Lode ibu Abarama hamene Harana igini biago ibubi Sodomo dindini dege henego nde wai ibiyarume Lodebi ibunaga mbirale bibahende wiarubi mo yai halu pene.

13 Ani biyagola agali mbira ibu wai hamani howa ibida pialu Hiburuali Abarama hearia puwa ibugua Abaramahondo mbirale biyaruni bibahende lamiai hene. Abarama ibu Amoroali Mamerenaga ira timbuni bu heagoha balai anda bu henego. Mamere ibu hamenebi nde kirali Esegolo Anela henego tebirali uruni ti bibahende Abaramanaga nenegeore heneya. 14 Ani howa Abarama ibugua hale halu hearia ibu igini Lode waitigime minu yalu piya layago hale howa ibuni agali hongohe hearu handari tebirani pira mbirani halira (318) mo mogo buwa naina tidiyalu pene. Puwa agali kini maria biaru piyiyadagua haruru talima pialu Dana tanoni tagira pene. 15 Ani buwa Abarama ibugua ibunaga agali wai biaga ibiyaru halu kira tagalaki howa mbiraga ogoningi dege kini mariali biaru baba wai bialu Abarama ibugua hongo howaore wai bialu bo podama pialu uyu Damasagasa tano bolangua halu pu dege bialu uyura tano mende Hobani bo poda anda hene. 16 Bo poda anda howa agali kini mariali urunime wai labu halu mbirale mo yalu piyaru Abaramahanda lone mo yalu dai bini. Abarama ibu igini Lodebi Lodenaga dabudaburubi ibu one wanerubi wali agali marubi bibahendeore wai bialu bo gingila miai hene.

Melegesedegehanda Abarama biamogo bialu mo bayale henego ogo

17 Abarama ibugua Kini Kedolaome ibunaga nenege kini tebirali biarubi bibahendeme wai biyagola Abarama ibu wayali howa ibugua bo podai halu harigani dai bialu hene. Ani biyagola Sodomonaga kini ibugua Kininaga Harigaore laga mbira yu dindi tigabi wiagoha winigo ogoriani Abarama ngola hole pene. 18 Salemenaga kini howa Ngode Datagaliwabe Daligaorene Daliga kagonagaloma binigo mo miaga agali mbira Melegesedege heneyago. Ogoni ibugua mberediwaini ibala Abarama hearia yalu ibini. ^a 19 Ani buwa Melegesedege ibugua Anduane Homogohanda Abarama biamogo bilo bi ogodagua lene. Ibugua lalu, Dindi hariru wabiaga Ngode Datagaliwabe Daligaorene Daliga kago ogoni ibugua í̠ mo bayaleore helo. 20 Ai í̠naga wai tigiru bo podalu mbirale mo yalu piyaru lone mo yu dai bibelonaga hongo ngiyidago. Áyu iname ibunaga mini yaraga hama, lene. Ani layagola Abarama ibugua wai bialu mbirale gingilo yalu dai biyaru pi halu tale buwa pinigo Melegesedege mini.

21 Mani Sodomonaga kini biagome Abaramahondo lalu, Mbirale í̠nime haruru puwa wai bialu gingila miridaruni í̠ni hai halu i̱naga wali agali dege daibi labe, lene.

22 Ani layagola Abaramahanda ladai bialu lalu, Anduane Homogo Ngode Datagaliwabe Daligaorene Daliga dindi hariru wabiaga kagonaga minini howa i̱na heneneore bulego laro. 23 I̱na mbirale mbira emene ko aga pu aleyaguabi pu dini emeneoreyaguabi mbira nayuleore. Mani í̠na Abarama i̱na mo homogo hene lowa wai bi lalu holeberegodagonaga laro, lene. 24 Ani lowa ibugua lalu, Ai i̱na agali karume tomo nolene aleru nayago dege i̱ haradagua uruni harogoni. I̱naga nenege tebirali Anebi Esegolobi Mamarebi tigua dege dabudabu uruni aria maru mo yilo, lene.