Isa 9 | HUI | STEP | Ogonidagua bidago yu wahalu tigua bolangua halu putara holene henge mbira ngane handa walia naholebira, lene. Abale Anduane Homogohanda Nabadali hameiginibi Sebulunu hameiginibi bo gialobaga bu wahai halu mo ko hayagola wali agali bibahendeore taga timbuni hai ho hene. Ani binigo mani howa iba solowara timbuni Medidereniana bedagoha polene hariga timbuni pedagoria dindi ngarunagabi Iba Yodana doma edeyagi ngarunagabi Galili dindi bibahendeha wali agali tara tara bu karunihabi dindi uruniha bibahendeni genda yu hayaru wahai halu mini lene mbira wulebira.

a 9.1Md 4.15

b 9.2Md 4.16, Lg 1.79, Eb 5.8, 5.14

d 9.6Ais 7.14, Lg 2.11, Yo 3.16, Ta 2.13

e 9.72 Kin 19.31, Dan 2.44, Lg 1.32-33

f 9.17Ais 5.25, Mai 7.2

‏ Isaiah 9

1 Ogonidagua bidago yu wahalu tigua bolangua halu putara holene henge mbira ngane handa walia naholebira, lene. ^a

Anduane Homogohanda, Wali agali mo turu holenaga kini bayale mbira tihondo ngulebero, lalu bi lowinigo ogo

Abale Anduane Homogohanda Nabadali hameiginibi Sebulunu hameiginibi bo gialobaga bu wahai halu mo ko hayagola wali agali bibahendeore taga timbuni hai ho hene. Ani binigo mani howa iba solowara timbuni Medidereniana bedagoha polene hariga timbuni pedagoria dindi ngarunagabi Iba Yodana doma edeyagi ngarunagabi Galili dindi bibahendeha wali agali tara tara bu karunihabi dindi uruniha bibahendeni genda yu hayaru wahai halu mini lene mbira wulebira.

2 Abale wali agali uruni ti arumaoreha henego ai áyu tigua wá holene timbuniore handa walia haya. Abale ti aruma dindiha haabo henego ai áyu ti miniha wá holene anda ibiya. ^b 3 Anduane Homogo-o í̠naga wali agaliru ho dame bilarigola ti turu timbuniore ho ka. Wali agalime tinaga mabuha tomo hengeneru nole bialu howa turu hagadagua ami agalirume wai buwa wai labuha mbirale bayale ngaru mo yalu dai buwa tale bialu howa turu timbuni hagadaguabi í̠na bayaleore biamogo birigo hondowa ti turu timbuniore ho kagoni. 4 Bambaore í̠na Midianalirunaga hongo bo podalu í̠ni wayali haridagua áyubi tinaga waitigi ti mo genda ho hearunaga hongo bo podaridagonaga tigua turu timbuni ho kagoni. ^{▼▼(9.4-5)Abale Midianalime Isaraele wali agaliru mo ko halu hearia Anduane Homogonaga hongome Gidiononaga giha howa tinaga hongo bo podenego leda. Haguane Heneru 6.1-6, 7.9-25 ngago hondolene nga.} Í̠naga wali agalirume genda timbuniore yu kago agalime nogo bulumaganaga erembirani ira gombedene timbuni ngago mo wia howa genda ogoni yu howa biabe bilonaga tibume erekuniha howa bo daila halu hagadagua waitigi agalirume í̠naga wali agaliruhondo ani bialu heneyagoni. Anigo í̠nime waitigi urunaga tibubi ira gombedene gendabi ogoni mo libulobagabu waharigola tinaga waitigi urunime í̠naga wali agali ti kagoha lone ibalu mo ko naholebira. Waitigi ami agaliru tinaga wai biaga gesu karulo karubi wai biaga aga agali darama heaore bidaru heba bibahendeore irame daiore holebira. Genda wiyaruni ereba hai halu horo bayale holene wia aribia holebira.

6 Ani bulebirago irane inanaga igiri mbira ngule wiyago taba hono ngiya. Inanaga igini ogoni inahondo ngiya. Ibu haru haga howa inanaga handame haga holebira. Ibunaga mini lolebirago uru Mini Gigabiwibi Tigatiga Talebu Ngiagabi Ngode Datagaliwabe Hongo Timbunihebi Haabobo Holenenaga Ababi Mo Palia Holenenaga Haru Hagabi ka lolebira. ^d 7 Haru Haga ogoni ibunaga hongo kago yu tago howa holebira. Ibugua wali agaliru haru haga buwa kagola wai bulene henge nawi embeda ho haabo holebira. Haru Haga ogoni ibugua Kini Debidi henegoria ho aribia halu Debidinaga biragane dagia ngagoriani bira aribia holebira. Ibugua mana bayale tigabi dege biaga kagonime ibu hongo timbuniheore holebira. Ibugua mana ogonibi biragome ibuni kini hongoheore áyubi awebi ibira nahe haho wiaaboboore bu holebira, lalu Anduane Homogo Hongo Haiheore kagome urunidagua biaiore holebira, lalu Aisaiahanda lene. ^e

Anduane Homogohanda Isaraele wali agali pani mulebira lenego ogo

8 Yagaba aguanene Isaraele wali agali karuni mana ko biragonaga pani mulene nga, lalu Anduane Homogohanda laya. 9 Horo ko ogo tagira ibirangi Isaraele wali agali kamirubi Samaria tano timbuni ngagoha bu karubi ti bibahendeme ogoniore Anduane Homogohanda inahondo henemane biyadalo manda biai holeberemi. Áyu ogoni ti dege mine howa balagala halu tininaga mini yaraga halu kagoni. 10 Tigua lalu, Inanaga waitigirume ege timenime anda bini hongohe hearu bo gialo delai hayagoyu iname ege to̱le̱ timbuni ngaru minu podalu anda hongohe lone buleberema. Inanaga poge ira hengemaruni dibai hayagoyu iname uruni biyagonaga mogo nale kamagoni. Ogoni bame degeyago. Iname poge ira hene dibayagoria ira tamia bayale hanga aribia holeberema laragoni, lene.

11 Ani layagola Anduane Homogohanda keba timbuniore howa tinaga waitigi hearume wai bu ibilonaga bu mini mo heya haya. 12 Ani bialu ni tagira ibiragohayagi Siriali hearunaga minibi Pilidiali ni paliragohayagi hearunaga minibi mo heya dege haya. Ani biyagola nde tigua Isaraele wali agali baba wai bialu howa tinaga ne ha̱lalu bo ereba hai holenaga wai hongo howa bialu hene. Ti ani biya tiraga Anduane Homogo ibunaga miniha keba ho hayago ereba nahe ti mana bialu kago bolenaga ibugua gi dogola amu ho haabo kagoni.

13 Anduane Homogo Hongo Haiheore kago ibugua Isaraele wali agali ti mana ko bialu hayagonaga pani nelo miyagoni milowa tigua mini beregeda nabi haabo halu ibuni karia dai nabi kagoni. 14 Ani biyagonaga Anduane Homogohanda Isaraele dindi mo ko halu horo mbira hanguni ibugua Isaraele wali agalirubi tinaga agali haguanerubi pani nelo mulebira. Ibugua Isaraelenaga erene haguanela pugu waholebira. 15 Agali wahe mini lene karu ti haguane lalu mbiwia halu manalatagi haga agali hearume ke̱ howa layaru ti erene lalu lene. 16 Agali haguane hearume wali agali bu hearuhondo mana bayalebi hariga tigabi wiadagua ndo lawai hayagola ti mini pu tara halu mo luluya hene. 17 Anigo wali agali dewaoreme Anduane Homogo yu wahalu puwa mana ko wiaru bialu howa tigua mana biyarubi bi layarubi bibahende ko hangu hai hene. Ani biyagonaga Anduane Homogohanda igiri daliahe karu aria mbirago yu wanahe bibahendeore pani miai holebira. Ani bialu wali dalo bedarubi waneigini aba ai̱yalame hono wahalu homene karubi ibugua bibahendeore koorene ko uruni dara nahe pani miai hole ibunaga gi dogola amu ho haabo holebira. ^f

18 Ira dene emene ko mbirame dama pialu irabu timbuni ngaru do yulalu bo timbuni dagimbu bialu howa hagua timbuni pau̱ lagadagua wali agali urunime koorene ko biyaru bibahende da ho wiaabo halu ka. 19 Anduane Homogo Hongo Haiheore kago ibunaga keba holene biba nahe wiaabo kagome wali agali dindi bibahendeni karu pani nelo miai holebira. Irame bo timbuni dalu mbirale mbira yu wanahe dai hagadagua pani miaiore holebira. Ani bulebirago wali agali uruni tini hangu hangu mitangi bulene nga. 20 Dindi ogoriani wali agali karume tinaga mbirale yu karu gingilo miaga kagoni. Ani biragola wali agalime tomo nolene hai bialu howa ngadagua nalu karia tombe nahe dege hagagobi mbirale gingilomu yayarume tinaga hame wiaru no karulapobe nahedagola haga biaga. Tigua tininaga waneigini karubi bo nalu haga biaga ka. 21 Manase hameigini karu tigua Eberaimi hameigini karu bope haragola Eberaimi hameigini karu tiguabi nde Manase hameigini karu bope haga kagoni. Ani bialu howa hameigini kira ogonilabo libu harume Yuda hameigini karu hengedope halu bo ma laga kagoni. Anduane Homogohanda libuni anidagua birago hondowa ibunaga keba holene biba nahe dege wiaabo kagola pani mule dege ibunaga gi dogola amu ho wiaabo ka.