a17.1Yo 11.41, 12.23, 13.32
b17.2Dan 7.14, Md 11.27, Yo 6.37, 1Ko 15.25-27, Pb 2.10, Hi 2.8
c17.3Ais 53.11, Yo 5.36-37, 1Ko 8.4, 1Te 1.9, 1Yo 5.20
d17.4Yo 4.34, 13.31, 14.13, 14.31, 15.10
e17.5Yo 1.1-2, 17.24, Pb 2.6, Kl 1.15-17, Hi 1.3, 1.10
f17.6Iba 22.22, Yo 6.37-39, 10.29
g17.8Yo 8.28, 12.49, 14.10, 16.27, 16.30
h17.9Yo 6.37, 6.44, 1Yo 5.19
i17.10Yo 16.15
j17.11Yo 10.30, 13.1, 17.21, 1Pi 1.5, Ju 1
k17.12Iba 41.9, 109.8, Yo 6.39, 13.18, 18.9, Ab 1.20, Hi 2.13, 1Yo 2.19
l17.13Yo 15.11
m17.14Yo 8.23, 15.18-19, 17.16, 1Yo 3.13
n17.15Md 6.13, Ga 1.4, 2Te 3.3, 1Yo 5.18
o17.17Iba 119.142, Ab 15.9, Eb 5.26, 1Pi 1.22
p17.18Yo 20.21
q17.191 Ko 1.2, 1.30, 1Te 4.7, Hi 10.10
r17.21Yo 10.16, 10.38, 17.11, Lm 12.5, Ga 3.28
s17.22Yo 14.20, Ab 4.32, 1Yo 1.3, 3.24
t17.23Kl 3.14
u17.24Yo 12.26, 17.5, 1Te 4.17
v17.25Yo 8.55, 15.21, 16.3, 16.27
w17.26Yo 15.9, 15.15, 17.6

‏ John 17

Yasuhanda ibunaga talima piagarunaga la halu ibu Abahondo bi laminigo ogo

1Yasuhanda bi uruni lamiai howa ibu dahuliya andagaha handa daga howa lalu, Aba-o horo biago tagira ibiyago í̠ igini ibugua í̠hondo mini daliga taraore lolene ngilonaga í̠na í̠ iginihondo mini daliga taraore lolene ngibe. a 2Í̠na wali agali i̱hondo ngiriru tihondo i̱na haabobo holene muliya wali agali bibahende hondo hai holiyanaga hongo i̱hondo ngiri. b 3Ngode Datagaliwabe henene í̠ hangu ke manda bia Yasu Keriso i̱ í̠na pu larigola ibinida manda bia ani bialu kagome haabobo holene yu ka. c 4Í̠na bibe lalu langirigo biai haru. Ani bialu harugome i̱na í̠naga hongo holene taraore walia haru. d 5Aba-o bamba dindi wa nabingi í̠ heba howa mini daliga taraorewi harugo ogoni áyu i̱ í̠naga deni howa mini daliga taraore ogoni lone ngibe. e

 6Dindini hene agali maru í̠na i̱hondo ngiriru urunime í̠ manda bilo walia halu haru. Ti í̠naga henego í̠na i̱hondo ngirigoni. Tigua í̠naga bi hale halu laridagua biya. f 7Mbirale bibahende ngirigo í̠na i̱hondo minida ti manda biai kagoni. 8Í̠na i̱hondo bi mana langirigo i̱na tihondo lamiai harugola tigua hale howa yu tiga bu ka. Yu tiga buwa i̱ í̠ kegoria howa henene ibinidalo ti manda biai ho ka. Í̠na i̱ pu larigola ibini ka manda buwa yu tiga bu ka. g

 9Ti mitangi bialu i̱na tinaga la haro. Dindi mana hangu biagaru mitangi bialu ndo í̠na i̱hondo ngiriru ti í̠naga kago mitangi bialu tinaga la haro. h 10I̱naga karu bibahende í̠nagabi ka. Í̠naga karu bibahende i̱nagabi ka. Tigua bialu kagome i̱naga hongo taraore holene walia haragoni. i 11Áyu ogoni i̱ í̠ kegoria ibule ko. I̱ dindini naholebero. Ti dege dindini holebira. Aba Baya Buruguleore-o í̠na í̠naga mini i̱hondo ngirigonaga hongome ti haru halu mamage ho habe. Iya mbiraore kabadagua tibi mbiraore helo. j 12I̱na dindini ti heba harungi í̠naga mini i̱hondo ngirigonaga hongome ti haru halu mamage ho haru. I̱na ti mamage howa mbirali pu ereba nahe ka. Agali mbira pu ereba hole henego ibu hangu pu ereba haya. Ani biyagome Anduane Homogonagambugani bi gilibu ngadagua lola haragoni. k 13Áyu ogoni i̱ í̠ kegoria ebero. I̱naga turu holene ti gubaliniha to̱lai helo i̱ dindi ogoria howa bi ogoni tihondo lamiru. l 14I̱na tihondo í̠naga bi mana lamialu haru. I̱ dindi mana hangu biaga aria ndo kodagua tibi dindi mana hangu biaga aria ndo kago hondowa dindi mana hangu biagarume tihondo handabe manga ho hene. m 15Dindi ogoria howa í̠na ti haru pobelonaga ndo laro. Ko Bulene Anduane ibugua ti ko mo bia holigo mamage halu haru habelonaga langero. n 16I̱ dindi mana biaga aria ndo kodagua tibi dindi mana biaga aria ndo ka. 17Ti í̠ninaga helo henene loleneme ti loma bia ho helabe. Henene lolenego í̠naga bi nga. o 18Í̠na i̱ wali agali dindi bibahendeni kagoha pu laridagua i̱nabi tihondo wali agali dindi bibahendeha pugupugu bidaba laru. p 19I̱na ti mitangi bialu ti í̠ninagaore loma bia hene helo i̱nibi í̠ninagaore loma bia ho ko. q

 20I̱na agali uruni tinaga hangu mitangi bialu ndo la haro. Tigua bi mana lamiragola hale howa i̱hondo mini mbiraore wu holebirarunagabi heba la haro. 21Ti bibahende mbiraore helonaga i̱na la haro. Aba-o i̱ha í̠ kedaguabi í̠ha i̱ kodaguabi iyaha ti helo hameledo. Wali agali dindi bibahendeni karume í̠na i̱ pu larigola ibinida manda buwa mini mbiraore wilo í̠na ti mo mbiraore helabe. r 22Iya mbiraore kabadagua tibi mbiraore helonaga í̠na i̱ hongo holene taraore ngirigo i̱na tihondo miru. s 23I̱ tiha kogobi í̠ i̱ha kegobi ti nde mbiraore helo mo mbiraore helabe. Ti mbiraore kago hondowa wali agali dindi bibahendeni karume í̠na i̱ pu larigola ibinida manda bilo. Ani manda buwa í̠na i̱ gubalini ho kedagua tibi gubalini ho ke manda bilobi ti mo mbiraore helabe. t

 24Aba-o dindi bibahende wa nabi howa í̠na i̱ gubalini timbuni ho harigoni. Ani howa í̠na agali i̱hondo ngirirume i̱ mini daliga taraore ngirigo hendelo i̱ kogoria tibi helo hameledo. u 25Tigabi Holene Aba-o dindi mana hangu biaga karume í̠ manda nabi ka. I̱na í̠ manda bu ko. Agali o karumebi í̠na i̱ pu larigola ibinida manda biai ka. v 26Í̠na i̱ gubalini ho kego gubalini holene ogoni tiha wilobi i̱bi tiha holiyabi tigua í̠ manda bilo i̱na tihondo walia harugo mahabi ani walia haabo holebero, Yasuhanda lene. w
Copyright information for HUI