Judges 4
Deborabi Baragabinaga te ogo
1Mani Ehudu homeagola Isaraele wali agalime Anduane Homogohondo mana ko ngubiore lone bini. 2Ani bialu hearia Anduane Homogohanda ti Kenanali mbira Yabini henego ibu Hasora dindi timbuni wiago kini heangi ibugua Isaraelealiru ti bo podelo henge mini. Yabini ibunaga ami haru haga haguane mini Sisera hene. Ibu Harosede Hagoimi dindi wiagoria ho hene. ▼ 3Yabini ibu wai biaga garo mini karisi hongohe aeaneme wabinigo handari dira (900) ge kirahe nogo hosini pongo bia howa gili laga wini. Ani buwa ibugua Isaraele wali agaliore mo ko howa mali pira kira (20) tandaga gibiore nelo mialu haru hene. Ani bialu heagola Isaraele wali agalime tandaga nalu Anduane Homogohondo yilalu, Biamogo bia, lene.4Ogoningi Labidodi one Debora ibu Ngode Datagaliwabe manalatagi haga mbira biruwa ibu Isaraelealirunaga godi hale hagane ogoninaga biabe bia haga berene. 5Ibu dindi mini Lamala Bedelela dombeni ira ayage ale mini dedi mbira heago andaneha biraga wini. O biraradagoni Eberaimi dindi hari bare wiagoria berene. Ogoriani Isaraele wali agali ti ibu bedaria poragola ibugua tigua buleneru lamiagane wini. 6Horo mbirungi Debora ibugua Abinoama igini Baraga Kedese dindi timbuni Nabadali wiagoria howa ibilo, Damu pu, lene. Ani buwa ibiyagola ibuhondo lalu, Anduane Homogo Isaraele wali agalinaga Ngode Datagaliwabe ibugua bi ogo lowia haya. Ibugua lalu, Agali daosini pira (10,000) hameigini Nabadalila Sebulunulaha howa haru halu Hari Tabo wedagoria haru halu pobe. 7I̱na Yabini ami haru haga Sisera tí heba wai bilimulo iba Kisono poragoria haru ibaguago. Ibugua ibunaga wai biaga garo ale biagobi ami agaliru heba holebirago tígua wai wayali halimulo nguliya, laya lene.
8Ani layagola Baraga ibugua ladai bialu lalu, I̱ iya haru mbaliyayagua polebero ani ndo í̠ naibiriyagua i̱ napoleberoore ndobe, lene.
9Ani layagola Deborahanda ladai bialu lalu, Karulapego i̱ iya haru pu poleberebago í̠na mbirale mbira wai bu wayali haregonaga namulebere. Ogoni irane Anduane Homogohanda Sisera wali mbira gini ya helolebira, lene. Ogoninaga Debora ibu Baragala Kedese dindi pole pene. 10Puwa Baraga ibugua Sebulunula Nabadalila hameigini kira ogoni olalu Kedese dindi ogoriani ami agali daosini pira (10,000) Baraga erembirani hene. Deborabi libu haru mandagi pene.
11Aguani pialu heagola Keniali mbira mini Hebe ibu puwa balai anda mbira Kedese dindi kaware handa de̱le̱ ira mbira bai ale heagoria kaware Sananimu dindini bu hene. Hebe ibu Keniali Hobabanaga aguanene Mosese ibu balibuni hearu helalu pu bagi howa hene.
12Sisera ibugua Baraga ibu Hari Tabo pu ka layago hale howa 13ibunaga wai biaga garo ale mini karisi aeaneme wabinigo handari dira (900) biarubi ami agali biarubi bibahende olalu Harosede Hagoimi dindi wiagoria howa iba Kisono piyagoria pelene.
14Ani biyagola Deborahanda Baragahondo lalu, Anduane Homogohanda í̠ haru bamba holebirago pu. Áyu ogoni Sisera ibu wayali nahelo í̠ wayali habelo ibugua hongo ngulebira, lene. Ani laya handala Baraga ibu Hari Tabo weagoria howa ibunaga ami agali daosini pira (10,000) biaru heba dalipe halu pene. 15Baragahanda ibunaga ami biaru hebame Sisera ibunaga ami heba minu balu heagola Anduane Homogohanda Siserabi ibunaga wai biaga garo ale biarubi ami agalibi bibahendeore mo lungulungu bia halu lulu yu helene. Ani bilayagola Sisera ibu wai biaga garo ale biagoria howa dalialu ibida gerai lalu pene. 16Baragahanda waitiginaga garo ale biarubi ami agali biarubi bibahende abale Harosede Hagoimi dindi biago wiagoria abale bo talini. Talialu Siseranaga ami agali mbiraorebi nayuwahe bo wahaiore hene.
17Ani biya handala Sisera ibuni Keniali mbira mini Hebe henego one Yalenaga balai anda bu paleagoha ibida anda pene. Ogoni irane Hasoro dindini Kini Yabini ibugua haru heangi ti wai nabi Hebe ibu one waneigini ti gi nahe heago hondowa Sisera ibu uruni andaga ubanda hene. 18Yalehanda Sisera ibiyaria lola howa ibuhondo lalu, Agali ibalu haribe. I̱ andaga tamuha ubandaha. Gi nahabe, lene. Ani laya handala ibu ubanda hayagola Yalehanda Sisera aga mbirame bu dambi helowa bira do helene. 19Siserahanda Yalehondo lalu, Ibaore mbira noa kogo mbira noliya hambu ngiore bia, lene. Ani layagola ibugua nogo bulumaga andu iba be nogo dongoneme wabini mbiraha berelo winiyago ogoni po̱ya̱ duguwa nelo mini. Ani buwa lone bira do helene. 20Ani bu biruwa ibugua Yalehondo lalu, Balai anda panga harabani hapai kegola mbirali ibuwa ogoniha mbira ai bedabe layagua mbira nabere labe, lene.
21Sisera ibu erekui taraore howa u palue biyagola palia hondoore hene. Palia hondo hea tambu Yalehanda ira nduli baga mbira wiago mialu balai anda pu nguni ndibu laga ira dehe mende lowa mo yalu Sisera paleagoria hendore ubadaga hene. Ani buwa Siseranaga haguane ira dehe biagome dindila ba para helene. 22Ai Baraga ibu Sisera tai bima ibalu hearia Yale ibu lola ho puwa lalu, Í̠na agali o tai beregoni i̱na walia holiya ogoria íbu, lene. Ani layagola puwa handalu hearia Sisera ira dehe balai anda pu ariba haga biagome haguane dindila ba para howa tongolo mu wiaria handa walia hene.
23Horo ogoningi Ngode Datagaliwabehanda Isaraele wali agalihondo Kenanalirunaga Kini Yabini bo wahelo hongo mini. 24Ani biyagola tigua hongo howa bo podama pialu Yabini baore bialu wahene.
Copyright information for
HUI