Mat 21 | HUI | STEP | Yasubi ibunaga talima piaga biarubi ti Yarusaleme anda polene kaware ngelowa Hari Olibe weagoria Bedabayani anda ibini. Anda ibuwa Yasuhanda ibunaga talima piaga kiralihondo,

a 21.3Md 26.18

b 21.5Ais 62.11, Seg 9.9, Yo 12.15

c 21.82 Kin 9.13

d 21.9Iba 118.25-26, Md 23.39

e 21.11Md 21.46

f 21.13Ais 56.7, Yar 7.11, Mg 11.17, Lg 19.46

g 21.142 Sml 5.8, Ais 35.5-6

h 21.16Iba 8.2

i 21.19Lg 13.6

j 21.21Md 17.20, Lg 17.6, Yo 14.12, 1Ko 13.2, Ya 1.6

k 21.22Md 7.7-11, 18.19, Mg 11.24, Lg 11.9, Yo 14.13-14, Ya 5.16, 1Yo 3.22

l 21.23Yo 2.18

m 21.26Md 14.5, 21.46, Mg 6.20, Lg 20.6

n 21.28Lg 15.11

o 21.31Lg 7.29, 7.50

p 21.32Lg 3.12, 7.29-30

r 21.33Md 25.14

s 21.35Md 22.6

t 21.38Md 27.18

u 21.39Hi 13.12

v 21.42Iba 118.22-23, Ais 28.16, Mg 12.10, Ab 4.11, Lm 9.33, Eb 2.20, 1Pi 2.6-8

w 21.44Ais 8.14-15, 60.12, Dan 2.44-45, Seg 12.3, 1Pi 2.8

x 21.46Md 21.11, 21.26, Lg 7.16, Yo 7.40

‏ Matthew 21

Yasu Handame Haga Kini ale howa Yarusaleme anda penego ogo

(Maga 11.1-11, Lugu 19.28-40, Yone 12.12-19)

1 Yasubi ibunaga talima piaga biarubi ti Yarusaleme anda polene kaware ngelowa Hari Olibe weagoria Bedabayani anda ibini. Anda ibuwa Yasuhanda ibunaga talima piaga kiralihondo, 2 Ogodagua bule bamba halu pudaba, lowa lalu, Dindi amugoha anda bu kagoria anda pialu kabiria nogo dongi igini angibuni dariba howa iginila halu karia de hondoleberabigo hadalu kirabali i̱ kogoria haru ibalibu. 3 Hadarabigola libuhondo mbirame aginaga hadarabibe layagua agua lalibu. Anduane Homogo ibu ogonioreme mbira bulene buru padane hadaraba, lalibu. Ani larabigola ibugua, Abale haru pudaba, lolebira, lene. ^a

4 Binidagoni Ngode Datagaliwabe manalatagi haga mbira henegome mbiwia halu lowinigo mo lola hene. Bi lowinigo ogo,

5 Saiono wali agali karuhondo lalu, ^b
Tínaga Handame Haga Kini biago tí kamigoria ibiragoni de handadaba.
Ibuni mini mo dindiha halu nogo dongini biralu ibiragoni.
Ibu dongi hungubalua mbirani biralu ibiragoni,
lalu gilibu nga.

6 Ani laya handala talima piaga kira biago labome Yasuhanda, Bilibu, layadagua bule pene. 7 Libugua nogo dongi biago labo haru dai buwa aga nogo dongi biago labo erekunini dungua hayagola Yasu ibu nogo dongi igini biagoria iraga ho berene. 8 Ani bereagola wali agali dewaore bu hearu marume tinaga aga harigani dungua haga bialu marume ira magane yuni dewahe dandowa harigani tebara haga bini. ^c 9 Wali agali dewa bu hearume Yasu pole piyagohayagi bamba halu piyarumebi maha ^d ibiyarumebi awa lama pialu howa lalu, Debidi Igininaga mini yaraga hama. Anduane Homogonaga minini howa ibirago Ngode Datagaliwabehanda ibu mo turu helo larama. Ngode Datagaliwabenaga mini yaraga hama, lalu lama pene.

10 Yasu ibu Yarusaleme anda piyagola wali agali bu hearume mogo lo hondowa laga bialu lalu, O ibiragoni aibe, lene.

11 Ani layagola wali agali bu yalu ibiyarume ladai bialu lalu, Ogoni ibu Ngode Datagaliwabe mana latagi haga Nasareteali Yasu Galili howa ibiragoni, lene. ^e

Yasuhanda Anduane Homogonaga andaha anda puwa binigo ogo

(Maga 11.15-19, Lugu 19.45-48, Yone 2.13-22)

12 Yasu ibu Anduane Homogonaga andaha anda puwa marume tamuha howa mbirale yolo bialubi yolo mulebi hearu bo ba tagitagi bialu hene. Ibugua muni ariari biaga hearunaga dagiabi ega malibu ale yolo biaga hearunaga biragane wiarubi mo hombeda haealabagabu wahai hene. 13 Ani bialu howa lalu, Ngode Datagaliwabehanda ibunagambugani bi lo ngago ogo, I̱naga anda kago i̱hondo bi lagane anda kagoni lolebira, lalu gilibu nga. Tígua nde pagebibi karu ha do hagane anda bu hinu helarimidagoni, lene. ^f

14 Ani layagola howa de kohebi gi ge kohebi Anduane Homogonaga andaha Yasu hearia ibiyagola ibugua ti mo bayale haga bini. ^g 15 Ibugua agalime nabiagane ale biyago hondowa waneigini emene bu hearume Anduane Homogonaga andaha howa turu halu mambolo balu lalu, Debidi Igininaga mini yaraga hama, layagola hale howaloma binigo mo miaga haguane hearumebi Mana lowinigo lawai haga hearumebi keba hai ho hene. 16 Keba howa tigua Yasuhondo lalu, Tigua laragoni ogo ale laralo í̠ hale ho kebe, lene. ^h

Ani layagola Yasuhanda ladai bialu lalu, E̱ i̱ hale hoore kogoni. Anduane Homogonaga mbugani bi mbira lo ngagome, Waneiginirumebi waneigini galiorerumebi Anduane Homogonaga mini baya hanguore mo yaraga helo biawai hari, lalu gilibu ngago tí nahendeore kamigonibe, lene.

17 Ani lalu ti hea handala Yasu ibu Yarusaleme tagira pialu Bedani palima pene.

Yasuhanda poge ha henego ogo

(Maga 11.12-14, 20-24)

18 Horo mendengi Yarusalemeha dai bialu hearia Yasu ibu hina garibi lene. 19 Garibi layagola handalu hearia ibu poge mbira hariga gibuniha hearia de hondowa lini dedabe nadedabe hondo pene. Hondo piyaria lini mbira nade yuni hangu ma bu hearia hendene. Nadeyagola ibugua poge biago ha halu lalu, Í̠na mani lini mbira nadoleore bere, lene. Ani layaore poge biago abale yongo bialu gau lene. ⁱ

20 Ani biyagola talima piaga biarume mogolo hondowa lalu, Poge biago abale yongo bialu gau layadagoni aguadabe, lene.

21 Ani layagola Yasuhanda tihondo ladai bialu lalu, I̱na tíhondo heneneore larogo miniha toba toba nahe mini mbiraore wu harimiyagua i̱na áyu poge ogohondo larudagua tíguabi ani labehe holeberami. Ani buwa homane ogoni hangu ndo tígua hari hombene o wedagohondo, Í̠nime dugualu puwa iba solowara bedagoria ibiraha, labehe holeberami. Ani laramigola hari biagome hale halu ani bulebira. ^j 22 Tígua Ngode Datagaliwabehondo bi lalu howa mini mbiraore wuwa larimiyagua bia laramigo bulebira ngi laramigobi ngiaore bulebira, lene. ^k

Yasu í̠ hongo yu kegoni aiwa ngiyabe, lenego ogo

(Maga 11.27-33, Lugu 20.1-8)

23 Yasu ibu Anduane Homogonaga andaha lone dai buwa ibugua mana lawai halu hearia loma binigo mo miaga haguane hearubiagali ala hene miniwi hearubi ibuwa tigua ibuhondo lalu, Í̠na mbirale uruni bialu kegoni hongo aiwa ngiyane berebe. Ani bibelonaga í̠ aiwa dabo helenego kebe, lene. ^l

24 Ani layagola Yasuhanda tihondo ladai bialu lalu, I̱na bi mbira tíhondo hale harogo tígua ladai birimiyagua i̱na mbirale uruni buliya hongo ngiyadagoni ogome ngiya lalu tí langulebero. 25 Yonehanda baboraya biyago bulene hongo miyago Ngode Datagaliwabehanda minibe be agalime minibe, lene.

Ani layagola tigua, Agi ladai bimabe, lowa tini dege dege laga laga bialu lalu, Iname Ngode Datagaliwabehanda mini larimayagua ibugua inahondo lalu, O Yonehanda mana langiyago yu tiga nabi harimidago agibe, lolebira. 26 Iname agalime mini larimayagua wali agali bibahende o biru ngarume Yone ibu Ngode Datagaliwabe manalatagi haga hayago lagago manda buwa tigua inahondo mbira buligonaga gi ho kamagoni, lene. ^m 27 Ani lowa tigua Yasuhondo lalu, Ina manda nabiore kama, lene.

Ani layagola Yasuhanda tihondo lalu, Anidago nde i̱na mbirale uruni berogo buliya hongo ngiyadago nalangulebero, lene.

Bi yobage lowa igiri kirame bini te lenego ogo

28 Yasuhanda lalu, Tígua agi manda bu kamibe. Bamba agali mbira henego ibu igini kira hene. Agali biagome ibu igini wahene biagohondo lalu, Igini-o áyu ogoni mabuni puwa biabe bialu habe, lene. ⁿ 29 Ani layagola igiri wahene biagome lalu, I̱ mangaba, lowa mani howa mini wia dai bialu biabe bule pene. 30 Ani bialu agali biagome ibu igini heyogonego hearia puwa ibuhondobi bi ala layadagua dege lene. Ani layagola igiri heyogone biagome ladai bialu lalu, E̱ aba-o bule porogo, lowa bule pu nabi wahene. 31 Agali biagome bilo hame layadagua ibu igini agome hale halu binibe, lene. ^o

Tigua ladai bialu lalu, Ibu igini wahenegome bini, lene.

Ani ladai biyagola Yasuhanda tihondo lalu, I̱na tí langerogo dagisi muni ngi laga karubi bayanda wali kayu bule muni ngi laga bedarubi tí helalu bamba halu Ngode Datagaliwabehanda Handame Ho Kagoria anda poragoni. 32 Ogoninaga baboraya biaga Yone ibugua ibuwa tí hariga tiga tigaore pilimulo walia hayagola tígua yu tiga nabi harimigoni. Dagisi muni ngi laga karumebi bayanda wali kayu bule muni ngi laga bedarumebi Yonehanda mana lamiyago yu tiga biya. Urunime ani biyagola tígua hondowa mini beregedalu Yonehanda mana langiyago yu tiga nabi dege harimi, lene. ^p

Bi yobage lowa,Gerebi mabu hondo ha halimu, lenego ogo

(Maga 12.1-12, Lugu 20.9-19)

33 Yasuhanda lalu, Bi yobage mende ogo nde hale hadaba, lene. Ani lowa lalu, Bamba dindi anduane mbirame pu mbiragerebi lini daganego dewa hongo dugudugu buwa gerebi ibane pingidope holenaga ege to̱le̱ha uli guabuwa wini. Mabu mamage holenaga anda luni daliga bima iraga howa helene. Ani buwa ibugua agali maruhondo, Mabu biabe bia halu hondo ha halimu, lalu ibuni dindi mbiraha ibaga bialu pene. ^{▼▼(21.33)Yasuhanda bi yobage ogoni lenego ibu Aisaianaga mbugani 5.1-2 bi gilibu wini ngago mitangi bialu lene. Mabu anduane biago ibu Ngode Datagaliwabe lalu pu mbira gerebi lini dagane ibunaga mabuha hengeneru uruni Isaraele wali agali lalu bi yobage lene.
,} ^r 34 Pu mbira lini daga minigerebi dolene tu hayagola mabu anduane biagome ibunaga garabaya biabe ale bia haga maruhondo lalu, I̱naga gerebi mabu hondo ha haga karuhondo lini maru do ngidaba lole pudaba, lene. 35 Ani laya handala ti pialu hearia mabu hondo ha haga biarume garabaya biabe ale bia ^s haga biaru mbira minu balu mende to̱le̱me balu tebone homelo balu bini. 36 Ani biyagola anduane biagome garabaya biabe ale bia haga abale pu layadagua ndo mani dewaore pudaba layagola pialu hearia mabu hondo ha haga biarume abale bayadagua dege bene. 37 Mahaore anduane biago ibuni igini mbira henego mitangi bialu lalu, I̱ igini ogoni pu larogola tigua ibu mitangi bialu ibuhondo tiga tiga bulebira manda bido, lene. 38 Ibu igini piyagola mabu hondo ha haga biarume hondowa tigua laga laga bialu lalu, ^t Mabu anduane biago iginiore ogonigo ibunaga paluni ina karulami̱ya homelo bama, lowa 39 tigua mabu tagirahayagi minu ba tagi howa homelo bene, lene. ^u

40 Ani lowa Yasuhanda tihondo lalu, Ani biyagola anduane biagome ibuwa mabu hondo ha haga biaruhondo agi bulebirabe, lene.

41 Tigua ladai bialu lalu, Ibugua ibuwa mabu hondo ha haga agali koore uruni homelo bo wahai howa mabu ogoni marume lini dolene tu harangi do tale bu ngulebirago tihondo, Mabu hondo ha halimu, lalu mulebira, lene.

42 Ani layagola Yasuhanda tihondo lalu, Anduane Homogonagambugani bi longago nahende hene kamigonibe. ^v

Ege to̱le̱ mbira anda biagame galone nabibehedago lowa dabo wahenego
ege to̱le̱ ogoniore mo timbuni duniniore heleda.
Ogoni Anduane Homogo ibunioreme mo yu dai bu helenego
iname de handalu handawa bu kamagoni,
lalu gilibu nga, lene.

43 Yasuhanda laabo dege halu lalu, Anigo i̱na tíhondo larogo Ngode Datagaliwabehanda Handame Ho Kago tí kamigoria howa mo yalu puwa wali agali marume Ngode Datagaliwabe mana tigabiore biragohondo mulebira, lene. [ 44 Ege to̱le̱ ogoni ngagoriani wali agali pilo paga hararu to̱le̱ ogonime ti bibahendeore budu baga bu waholebira. Ani buwa ege to̱le̱ ogonime mbiralini podo dambi hayagua dambu gingirulo baga bu waholebira, lene.] ^w

45 Loma binigo mo miaga haguane hearumebiPerisi agali hearumebi Yasuhanda bi yobage layago hale howa, Yobage laragoni inahondo laragoni, lowa 46 tigua Yasu minule manda biyaria wali agali bu hearume Yasu ibu Ngode Datagaliwabe manalatagi haga ka laga lalu hea handala gi howa wahene. ^x