Mat 26 | HUI | STEP | Yasuhanda mana uruni lawai hai howa ibunaga talima piaga biaruhondo lalu,

a 26.2Har 12.1-27, Md 20.18, Mg 14.1, Lg 22.1, Yo 13.1

b 26.7Lg 7.37-38

c 26.11Man 15.11, Yo 12.8, 14.19, 17.11

d 26.14Yo 11.57

e 26.15Seg 11.12, Md 27.3

f 26.17Har 12.6, 12.14-20, Mg 14.12, Lg 22.7-9

g 26.18Md 21.3

h 26.23Iba 41.9, Lg 22.21, Yo 13.18

i 26.24Ais 53, Dan 9.26, Mg 9.12, Yo 17.12

j 26.26Md 14.19, 1Ko 10.16

k 26.28Har 24.8, Yar 31.31-34, Seg 9.11, Lm 5.15, 1Ko 10.16, Hi 9.22

l 26.29Mg 14.25, Lg 22.18, Ab 10.41

m 26.30Lg 22.39, Yo 18.1

n 26.31Seg 13.7, Yo 16.32

o 26.32Md 28.7, 28.16, Mg 14.28

p 26.34Md 26.69-75

q 26.35Md 26.56

r 26.38Yo 12.27

s 26.39Md 6.10, 20.22, Yo 6.38, Hi 5.7-8

t 26.41Md 6.13, Eb 6.18, Hi 2.14, 4.15

u 26.442 Ko 12.8

v 26.45Yo 12.27, 13.1

w 26.46Yo 14.31

x 26.51Yo 18.26

y 26.52Pig 9.6, Mo 13.10

z 26.532 Kin 6.17, Dan 7.10

aa 26.54Ais 53.7, Md 26.56, Mg 14.49

ab 26.55Lg 19.47, 21.37

ac 26.56Md 26.31

ad 26.60Man 19.15, Iba 27.12, Mg 14.55, Ab 6.13

ae 26.61Md 27.40, Yo 2.19

af 26.63Ais 53.7, Md 27.12

ag 26.64Iba 110.1, Dan 7.13, Md 24.30, Lg 21.27, Ab 7.55, 1Te 4.16, Mo 1.7

ah 26.65Md 9.3, Mg 14.63, Yo 10.33, Ab 14.14

ai 26.65-66LBM 24.16

aj 26.66Yo 19.7

ak 26.67Ais 50.6, 53.5, Md 27.30, Yo 19.3

al 26.74Mg 14.71

am 26.75Md 26.34, Mg 14.30, Lg 22.61-62, Yo 13.38

‏ Matthew 26

Yasu homelo bole manda manda binigo ogo

(Maga 14.1-2, Lugu 22.1-2, Yone 11.45-53)

1 Yasuhanda mana uruni lawai hai howa ibunaga talima piaga biaruhondo lalu, 2 Horo kiru hangu howaBolangua Halu Penegonaga tomo nolene wulebirago manda bu kamigoni. Ogoningi Agali Hole Ibiyago ira bangani ba para helo minu mulebira, lene. ^a

3 Loma binigo mo miaga haguane hearubiagali ala hene miniwi hearubi ti loma binigo mo miaga haguane timbuni mini Kaiabasa andaga mo ngoai hene. 4 Mo ngoai howa tigua Yasu ohowa minalu bo wahole lo manda bialu hene. 5 Tigua lalu, Wali agali bu karume ina baba gungu buligo tomo nolene harangi iname ibu naminami̱ya, lene.

Wali mbirame Yasu haguaneni weli ngabi odo winigo ogo

(Maga 14.3-9, Yone 12.1-8)

6 Yasu ibu Bedani howa Saimono ge hamua mbira ala ibugua mo dabi henegonaga andaga pu berene. 7 Yasu ibu tomo nalu berearia wali mbirame weli ngabi baya muni dewaoreme yolo buwa beha berelo winigo mo yalu ibuwa Yasunaga haguaneni odo wia hene. ^b 8 Wali biagome ani biyagola Yasunaga talima piaga biarume hondowa keba halu lalu, Bame oda hole biragoni agidabe. 9 Weli ngabi baya ogoni muni dewa mulene ngago midale muni mirago yagibano karuhondo talebu ta kaleda, lene.

10 Tigua ani layago manda buwa Yasuhanda tihondo lalu, Wali ogome birago nabi waha laramigo aginagabe. Ibugua i̱hondo o biyagoni bayaore biya. 11 Wali agali yagibano karu tí heba mandagi haabo kamigoni. I̱ tí heba mandagi haabo naholebero. ^c 12 Wali ogome weli ngabi baya i̱naga tinginini odo wia hayagoni nde i̱ hora holebiragonaga manda bialu biyagoni. 13 Anigo i̱na tíhondo heneneore laro. Bi Mana Debene ogoni dindi bibahendeha lamialu howa ibugua i̱hondo biyago mitangi bu dai bialu te ogoni loyogo lolebira, lene.

Yudasahanda Yasu ndelole penego ogo

(Maga 14.10-11, Lugu 22.3-6)

14 Ani biyagola howa Yasunaga talima piaga homberiali (12) heneru mbirago mini Yudasa Isagariodo henegomeloma binigo mo miaga haguane hearu hearia puwa ^d 15 lalu, I̱na Yasu tíhondo ndelo ngiruyagua tígua i̱ agi nguleberamibe, lene. Ani layagola agali biarume muni kuni pira tebira (30) daga lowa Yudasa mini. ^e 16 Ani miyagola Yudasahanda ogoningi howa Yasu minu mulene henge aguaore ngabe hondole tai bialu hene.

Yasu ibunaga talima piaga hebaBolangua Halu Penego Horonaga tomo nenego ogo

(Maga 14.12-21, Lugu 22.7-14, 21-23, Yone 13.21-30)

17 Mberedi Yidi Nahe Hirinigo nolene horo pigane hayangi ibunaga talima piaga biaru ibuwa Yasuhondo lalu,Bolangua Halu Penego Horonaga tomo í̠ nabelo agoha manda manda bule poloma̱ya hamelo kebe, lene. ^f

18 Ani layagola Yasuhanda tihondo lalu, Yarusalemeha puwa agali mbira ogoniha holebirago ibu karia puwa ibuhondo agua lalimu. Inanaga Lawai Haga biagome lalu, I̱naga horo ha para hayadago i̱bi i̱naga talima piaga karubi ina mandagi Bolangua Halu Penego Horonaga tomo í̠ andaga noloma̱ya, laya lalimu, lene. ^g

19 Ani laya handala howa ibunaga talima piaga biarume Yasuhanda layadagua bialu tigua Bolangua Halu Penego Horonaga tomo nole manda manda bu wule pene.

20 Alendo tomo nolene tu hayagola Yasu ibunaga talima piaga homberiali (12) biaru heba tomo nalu berene. 21 Tomo nalu biruwa Yasuhanda lalu, I̱na tíhondo heneneore larogo. Agalime i̱ minilo tí mbiraligome nde loleberami, lene.

22 Ani layagola ibunaga talima piaga biarume mogo lowa ibuhondo hangu hangume lagalaga bialu lalu, Anduane Homogo-o í̠na o larigoni i̱ ndo lari, lalu laga laga bini. 23 Ani lagalaga biyagola Yasuhanda ladai bialu lalu, Mbirali i̱ heba ndisiha mberedi iba howa nalu bedagome i̱ minilo nde lolebira. ^h 24 Anduane Homogonagambugani lo ngadagua Agali Hole Ibiyago homolebira. Agalime ibu minilo ndelalu walia harago ibunaga mo ko holene timbu gibiore wulebiragonaga dara holene nga. Agali ogoni ibu ai̱yahanda taba nahenedale nde bayale kaleda, lene. ⁱ

25 Ani layagola Yudasa ndelaga biagome lalu, Lawai haga-o í̠na o larigoni i̱ lalu larebe, lene.

Ani layagola Yasuhanda ladai bialu lalu, Í̠nime o laregoni, lene.

Anduane Homogonaga tomo nenego ogo

(Maga 14.22-26, Lugu 22.14-20, 1 Korindi 11.23-25)

26 Ti tomo nalu biruwa Yasuhanda mberedi mbira yamuwa Ngode Datagaliwabehondo turu halu ka̱i̱ lowa gai bu baga buwa ibunaga talima piaga biaruhondo mialu howa lalu, I̱naga tingini ogonigo ya mialu nadaba, lene. ^j

27 Ani buwa ibugua iba be yamuwa Ngode Datagaliwabehondo turu halu ka̱i̱ lowa tihondo mialu howa lalu, Ogoni tí bibahendeme no gombedalu nadaba. 28 Ngode Datagaliwabehanda habo nalolene bi gahenge lowinigo tene i̱naga darama ogoniha nga. Ani bidago i̱naga darama pelarogome wali agalime ko birago domo wahelo pelaro. ^k 29 I̱na tí langerogowaini iba lone nane i̱ Abahanda Handame Ho Kagoria tí heba howa waini iba gahenge nolebero, lene. ^l

30 Ani lai howa tigua iba gana mbira lowa tagira pialu Hari Olibe weagoha pene. ^m

Yasuhanda, Pidahondo Í̠na i̱ manda nabido lolebere, lenego ogo

(Maga 14.27-31, Lugu 22.31-34, Yone 13.36-38)

31 Yasuhanda tihondo lalu, Áyu mbiraga tí bibahendeme i̱ helalu ibida piai holeberami. Ogoninaga Anduane Homogonagambugani lo ngago ogo, I̱na nogo sibi haru haga kago baro handala nogo sibi karu ibida purogo lai holebira, lalu gilibu nga. ⁿ 32 Anigo Ngode Datagaliwabehanda i̱ mo heya hara handala tí maha ibalimulo i̱ ala Galili bamba halu polebero, lene. ^o

33 Ani layagola Pidahanda Yasuhondo laraga howa lalu, Ti bibahendeme ani wahalu purogo layaguabi i̱na í̠ wahalu napolebero, lene.

34 Ani layagola Yasuhanda Pidahondo lalu, Í̠hondo heneneore larogo áyu mbiraga ega gogologome bi naledaore í̠na halu tebo, Yasu manda nabido, lalu lolebere, lene. ^p

35 Ani layagola Pidahanda ladai bialu lalu, I̱ í̠la homole howayaguabi ogonidagua naloleore bero, lene. ^q

Pidahanda layadagua talima piaga bibahende biarumebi ani dege lai hene.

Yasu ibu Gedemani puwa Ngode Datagaliwabela bi lalu henego ogo

(Maga 14.32-42, Lugu 22.39-46)

36 Yasu ibu ibunaga talima piaga biaru heba Gedemani dindi wiagoria pu howa ibugua tihondo lalu, I̱ Ngode Datagaliwabela amugoha bi lole porotagi tí ogoria hondo biralimu, lene. 37 Ani lowa ibugua Pidabi Sebedi igini kirabi haru halu puwa ibu dara ho howa mini burugulo hene. 38 Ani biyagola ibugua tihondo lalu, Genda timbuniore i̱ha anda ibiragome i̱ garali bialu budara. Ina haru mamage howa tí ogoria hondo biralimu, lene. ^r

39 Ani lowa Yasu ibu emene pu amu howa dindini bulu palu wuwa Ngode Datagaliwabehondo bi lalu, I̱ Aba-o tandaga nolene ngago nanoliya mo yalu polene ngayagua mo yalu pobe. Anigo i̱ hame ledodagua ndo í̠ hame lededagua hangu bibe, lene. ^s

40 Ani lalu bialu ibunaga talima piaga tebirali biaru bereagoria dai bialu hearia ti palia hondo hai hearia hondowa ibugua Pidahondo lalu, Tí tebirali kamirume i̱ heba mamage emeneorebi habe nahedagola padamibe. 41 Ko ngagome tí ko mo bia holigo tí bayuwa mamage howa Ngode Datagaliwabehondo bi lalu halimu. Tínaga minime Ngode Datagaliwabe hame ledamigo lowa tínaga tingini gedaore ho kamigoni, lene. ^t

42 Ani lowa Yasu ibu lone puwa lalu, Aba-o tandaga nolene ngago ogoni i̱ nane howa mo yalu polene nawiyagua noleberogo í̠ni hame lededagua hangu bibe, lene. 43 Ani lowa Yasu ibu lone dai bialu hearia ibunaga talima piaga biaru ti dengala nahe palia hondo dege hearia hendene.

44 Ani palea handala ibugua puwa Ngode Datagaliwabehondo bi mbiraore layagobi dege halu tebone lene. ^u 45 Ani lai howa ibunaga talima piaga biaru bereagoria dai buwa ti palearia hondowa lalu, Tí erekui dogolowa palia hondo dege kamibe. Agali Hole Ibiyago agali ko biaga karuhondo minu mulene tu kaware ha para haragonigo handadaba. ^v 46 I̱ minilo ndelaga biago kaware o kago de handadaba. Ai heyalu ma, lene. ^w

Yasu mininigo ogo

(Maga 14.43-50, Lugu 22.47-53, Yone 18.3-12)

47 Yasuhanda bi ogoni lalu heaore ibunaga talima piaga hombeane Yudasa ibu agali dewali haru ibini.Loma binigo mo miaga haguane biarumebiagali ala hene miniwi biarumebi, Yasu minule pudaba, layagola tigua wai biagane ayu tibu kangoru yalu Yasu hearia ibini. 48 Yasu minilo ndelaga Yudasahanda ala agali biaruhondo lalu, Tí manda bilimulo i̱na walia halu mbiralinaga peni nu̱nu̱ larogo ibu minalimu, lene.

49 Ani layadagua bialu Yudasahanda Yasu heagoria hondo yalu puabo howa lalu, Lawai haga-o mo palia holene í̠ha haabo helo, lowa ibu peni nu̱nu̱ lene.

50 Ani biyagola Yasuhanda ibuhondo lalu, Hamene-o bule wiridago abale berene, lene.

Ani layagola agali hayarume abale ibuwa Yasu minalu gime bayuwa yu ndibu lene. 51 Ani biyagola Yasu heba hayaru mbiragome wai biagane ayu tibu yayagome loma binigo mo miaga haguane timbuni heagonaga garabaya biabe ale bia haga heagonaga hále bagadape hene. ^x 52 Ani biyagola Yasuhanda ibuhondo lalu, Wai biagane ayu tibu ogoni ibuni yaganeha ya dai bibe. Mbirali wai biagane ayu tibume bole manda biyagua ayu tibume dege ibuni nde homelo bolebira. ^y 53 I̱na i̱ Abahondo biamogo bia laruyagua ibugua dahuliyali ami ale dewaore ibilabehe kagoni manda nabi kamibe. ^z 54 Ani biruyagua Anduane Homogonagambugani ogonidagua bulebira lo ngago agua bialu lola holobadabe, lene. ^aa

55 Ani lowa Yasuhanda agali dewa bu hearuhondo lalu, Pageali minaramilidagua tígua wai biagane ayu tibu kangoru yalu i̱ minule ibirimibe. Horo bibahendengi i̱ Abanaga andaha mana lawai halu haabo haruligo tígua i̱ mina nabirimi. ^ab 56 Anigo uruni bibahende beramigo Ngode Datagaliwabe manalatagi haga henerume Anduane Homogonaga mbugani bi lo ngadagua lola hai haragoni, lene. ^ac

Ani layagola ibunaga talima piaga bibahende biaruni Yasu wahalu ibida purogo lai hene.

Ganisolo agalirume godi lelo Yasu haru penego ogo

(Maga 14.53-65, Lugu 22.54-55, 63—71, Yone 18.13-14, 19-24)

57 Mana lowini lawai haga hearubiagali ala hene miniwi hearubi ti loma binigo mo miaga haguane timbuni mini Kaiabasa andagaha mo ngoai ho heagoria Yasu minu yalu pene. 58 Ani minu yalu piyagola Pida ibu emene kaundia howaloma binigo mo miaga haguane timbuni heago andaga pabe tagirahayagi mayu̱lo handaga bima pene. Ibu pabe tamuha anda puwa agi birabe hondole lowa maru mamage ho hearu heba mandagi berene. 59 Loma binigo mo miaga haguane hearubiGanisolo agali bibahende bu hearubi tigua Yasu homelo bole ibugua bini lenebi mbira agidabe handalu hearia 60 mbira nahendeore hene. Wali agali marume ke̱ howa Yasuhanda agua biya lama ibiyaru ^ad hale howabi mbira handa walia naheore hene. Mahaore agali kirame heyuwa 61 lalu, Agali o kagome Anduane Homogonaga anda gialowa horo tebiru hanguni lone bia dai bulebero laya, lene. ^ae

62 Ani layagola loma binigo mo miaga haguane timbuni biagome heyuwa Yasuhondo lalu, Í̠hondo bi laragoni ladai bulene mbira nayi kebe, lene. 63 Ani layagola Yasu ibu bi nale hene. Ani hearia hondowa loma binigo mo miaga haguane timbuni biagome Yasuhondo lone lamialu lalu, Í̠hondo langerogo Ngode Datagaliwabe haabo kagonaga minini howaMbirali Dabo Helenego ibulebira lowinigo Ngode Datagaliwabe Igini í̠yagua langi, lene. ^af

64 Ani layagola Yasuhanda ladai bialu lalu, Í̠ ani larigoni. Anigo i̱na tí bibahendehondo laro. Áyu ogoni howa be lirahayagi Agali Hole Ibiyago ibu Hongo Haiheore Kagonaga gi tigahayagi biruwa hari beralibani biralu daliraria de hondoleberami, lene. ^ag

65 Ani layagola loma binigo mo miaga haguane timbuni biagome ibuninaga aga lerelowa lalu, Ibugua Ngode Datagaliwabe mege bialu layago hale harimigo ai marume ina lamogo bia holene irane nawi. ^{ah
,} ^ai 66 Tí agi manda bu kamibe, lene. ^aj

Tigua ladai bialu lalu, Ibuni ko biyagonaga homoleneore nga, lene.

67 Ani lowa tigua Yasu denguini hamiaga tolo ba halu gi habeme balu howa ^ak 68 lalu, Mbirali Dabo Helenego ibulebira lowinigo í̠oreyagua ina kamagoni manda bu ade halu í̠ bayagoni ogome baya la, lene.

Pidahanda, Yasu manda nabido, lenego ogo

(Maga 14.66-72, Lugu 22.56-62, Yone 18.15-18, 25-27)

69 Pida ibu andaga pabe tamuhayagi berearialoma binigo mo miaga haguane timbuni biagonaga biabe bia haga wandari mbirame ibuwa lalu, Í̠bi Galiliali Yasula mandagi hariligo, lene.

70 Ani layagola Pidahanda o bu hearuni hale hai heaore ladai bialu lalu, Í̠na o laregoni agi larebe i̱ manda nabido, lene. 71 Ani lalu bialu pabe harabani puwa hearia biabe bia haga wandari mende heagome Pida hondowa agali hearuhondo lalu, Ibu Nasareteali Yasula mandagi haga, lene.

72 Ani layagola Pidahanda wanakui ela howa halu mende lalu, Agali ogoni i̱ manda nabido, lene.

73 Emeneore howa agali hayarume Pida heagoria ibuwa lalu, E̱ mbira í̠ anioreda. Í̠ni bi laregome í̠ni mo walia haragoni, lene.

74 Ani layagola Pidahanda wanakui ela howa lalu, Heneneore laro. I̱ ke̱ haruyagua Ngode Datagaliwabe ibugua i̱ pani ngilo, lalu, Agali odagoni i̱ manda nabido laro, lene. ^al

Bi ogoni layaore ega gogologome bi layagola 75 ala Yasuhanda, Ega gogologome bi naledaore halu tebo í̠na i̱ manda nabido lolebere, layago Pida ibuni mitangi bu dai bini. Ani mitangi buwa Pida ibu tagira pialu dugu emene ndoore yi lalu dugu timbuni bialu hene. ^am