Num 24 | HUI | STEP | Odagoningi Balama ibu manda bialu hearia Anduane Homogohanda Isaraele wali agali bayaleore helo mo baya hole heago ibu manda buwa ibugua halaga abale biyadagua lone bule nape. Ibugua dindi ko iba dalu naibaga wiagohayagi wanakui handa amu howa

a 24.9Pig 12.3, 49.9

‏ Numbers 24

1 Odagoningi Balama ibu manda bialu hearia Anduane Homogohanda Isaraele wali agali bayaleore helo mo baya hole heago ibu manda buwa ibugua halaga abale biyadagua lone bule nape. Ibugua dindi ko iba dalu naibaga wiagohayagi wanakui handa amu howa 2 Isaraele wali agali hameigini hangu hangu headagua anda bu haga haga bu hearu hendene. Ani handa amu ho hearia Ngode Datagaliwabenaga Dinini ibuha daliyagola 3 ogodagua mbiwia hene.

I̱ Bero igini Balamahanda mbiwia harogo
I̱na ngagobi deme bayuwa ngoalia howa hondowa
4 Ngode Datagaliwabehanda bi larago hale halu
Ngode Datagaliwabe Hongo Haiheore kagome
de gandeba mo walia haragola
i̱ de handaya ho wiaabo halu latagi haro.
5 Yagaba-o í̠naga balai anda baya gibioredane hendedo.
Isaraele-o í̠ holeneore baya gibioredane hendedo.
6 Balai anda biaru duguni ayage ale mini dedi ho dugu haradagua hoyu pedane hendedo.
Iba poraru angeni mabu wuyu poradagua bidane hendedo.
Anduane Homogohanda ira minialoru mabu ogoriani hengene mbauleda.
Ira tamia iba ange ange hoyu poradagua bia.
7 Isaraele tinaga dindini dalu iba ho wiaabo holebira.
Tigua dindi mo hini haragola tomo hongolebira.
Isaraele tinaga kini ibu Agaga ale ndo ibu hongohe mini lene daligaore holebira.
Ibunaga handame howa haru holene timbuni yangale daliga wulebira.
8 Ngode Datagaliwabehanda ti Iyibi dindi howa haru tagira ibiya.
Ibugua bulumaga gabuame hongo hagadagua bialu tinaga wai bia hole hongo haga ka.
Tinaga waitigirubi bo ibira hai halu
Kuni gingiru lalu timubi bulubaga biaga.
9 Isaraeleali uruni gabua laiono hongo gibiorehe ale ka. ^a
Ogoni ibu padaria mbiralime barila hole ai kabe.
Mbiralime Isaraele bayale helo mo bayale hayagua ibubi bayale holebira.
Mbiralime Isaraele ko helo ha hayagua ibubi ko helo ha hene holebira,
lalu Balamahanda mbiwia hene.

10 Balagahanda bi ogoni mbiwia hayagola Balama ibugua keba timbuniore howa ibunaga gi kirabali tanda lowa Balamahondo lalu, I̱na í̠ olarugo wali agali uruni ha habelo olaru. Anigo í̠na bi halu tebo larigoni bibahende bayale hangu lari. 11 Ai i̱ manga ho kogo wahalu dai bia. I̱na í̠ yolo buliya larugoni Anduane Homogohanda yolo biagoni namibelo mo wahayada, lene.

12 Ani layagola Balama ibugua ladai bialu lalu, Í̠naga agaliru i̱ hewaria bi yalu pu lariyaruhondo ogodagua larugoni ndobe. 13 Í̠na kini andagaha muni siliba ngolobi ngeru bibahende ngiai hariyaguabi Anduane Homogohanda langirago mo wahalu i̱ni hame ledodagua nabulebero. Anduane Homogohanda la larago hangu labehe ko lalu tihondo lamirugoni, lene.

Balamahanda mbiwia ma halu henego ogo

14 Balamahanda Balagahondo lalu, Áyu i̱ i̱ninaga wali agali karia dai bulebero. Isaraele wali agali o karunime mani í̠naga wali agalihondo ogodagua bulebira lalu í̠ manda bu habelo mo walia haro. 15 Ani lowa ibugua mbiwia ogodagua lene.

I̱ Bero igini Balamahanda mbiwia harogo
I̱na ngagobi deme bayuwa ngoalia howa hondowa
16 Ngode Datagaliwabehanda bi larago hale halu
Mbirali Daligaorene Daliga Kagome manda mo wia hene ko.
Ngode Datagaliwabe Hongo Haiheore kagome
de gandebaha mo walia haragola
i̱ de handaya ho wiaabo halu latagi haro.
17 Mbirali hendedogo mani holebiragonaga de hondo ko.
I̱na Isaraele hameigini de hendedo.
Kini mbira yakundi ale hameigini uruniha howa tagira ibulebira.
Ibunaga halimbu Isaraeleha howa tagira ibulebira.
Kini ogoni ibugua Moabalinaga haguane tuguda hole bialu
Sede hameiginiru mo ko hai holebira.
18 Ibugua ibu waitigi Idomo bo waholebira.
Tinaga dindi karulowa ibunaga wulebira.
Isaraelenaga hongo anda halu ha ho wiaabo holebira.
19 Isaraele hameiginirume bibahende karu bo hengeda hai holebira.
Tano timbuni ogoriani yu wahene karu bo hilu wahai holebira.

Balamahanda mbiwia halu hamaro binigo ogo

20 Balama ibugua de gandeba handalu hearia Amalegealiru paleago hondowa mbiwia halu lalu,

Ala Amalegeali ti hameigini bibahendenaga hongo bolangua hene.
Mani ti bo ereba hai holebira.
21 Ani lowa Balama ibugua de gandeba dege handalu Kenialiru paleago hondowa mbiwia ogodagua hene.
Kenialiru tí holeneore pabeme bu mabu bupeheda.
Í̠naga anda hari nene ngaru obeneni ega hariaweme biradagua bu kamigonida.
22 Anigoyu Asiria tigua tí garabaya haru haragola
tí bo haealabagabu waholebira.
23 Ani lowa Balama ibugua mbiwia halu bi ogo lalu,
Ngode Datagaliwabehanda ogonidagua biragola bayale ai ibu habehebe.
24 Saibarasi agalirume iba taluni ibalu
Asiriabi Eberebi bope hai holebira.
Ani bulebirago mani tinibi ereba hai holebira,
lene.

25 Ani lai howa Balama ibu heyalu ibuni andaga dai biya handala Balaga ibubi nde ibuni andaga pene.