Phile | HUI | STEP |

a 1-2Eb 3.1, Kl 4.17, 2 Ti 2.3

b 3Ga 1.3

c 4Lm 1.8-9

d 6Pb 1.9, Kl 1.9

e 72 Ko 7.4, 7.13

f 9Pm 1

g 101 Ko 4.15, Kl 4.9

h 13Pb 2.30

i 142 Ko 9.7, 1 Pi 5.2

j 161 Ti 6.2

k 172 Ko 8.23

l 19Ga 6.11

m 22Pb 1.25, 2.24

n 23Kl 1.7, 4.12

o 24Ab 12.12, 12.25, 13.13, 15.37-39, 19.29, 27.2, Kl 4.10, 4.14, 2 Ti 4.10-11

‏

Pilimono Polohanda Pilimonohondo beba ogo gilibu wia hene

Mbuga ogoha gilibu ngarunaga nemandi ogo

Pilimono ibu Keriso hameigini Kolosini hearunaga aria hene. Pilimononaga garabaya biabe ale bia haga mbira mini Onisimasi henego ibu pu yola halu pene. Ani pu yola henego maha aguabe tobahe ibuwa Polo ibu garabaya hearia nenege hinu hene. Onisimasi ibu Polola howa Keriso hameigini hene. Keriso hameigini hayagola Polohanda, Í̠ anduane Pilimono karia dai bulene nga, lalu Onisimasi lamini. Ani lamuwa Polohanda Pilimonohondo beba gili buwa Onisimasi ibugua yalu pelo mini. Beba ogoniha bi gilibu wiyago galone ogo. Onisimasi ibu Kerisohondo mini mbiraore wu kago ibu garabaya biabe ale bia haga hangu ndo ibu Kerisoha howa í̠ hamene heneneore kago manda buwa í̠ keria dai bialu helo henge mialu habiya, labe lalu gilibu wia hene.

Bu̱lu̱ baga buwa kuni gilibu ngago

1-3Polohanda bi ala lenego4-7Pilimonohondo ka̱i̱ lenego8-22Onisimasinaga la henego23-25Lamaro bialu lenego

‏ Philemon

1 I̱ Polo Keriso Yasunaga biabe biahaga hewago hondowa marume i̱ dariba hayago kogoni. I̱bi ina hamene Timodibi iyame ina hameneore howa biabe mandagi beramali Pilimono í̠bi ina mbalini Abiabi Yasunaga ami agali Agibasabi Keriso hameigini í̠ andaga ngoai hagarubi tíhondo beba ogo gilibu wia haraba. ^a

3 Inanaga Aba Ngode Datagaliwabebi Anduane Homogo Yasu Kerisobi libunaga biamogo bia holenebi mo palia holenebi tíhondo ngilo hamelo ko. ^b

Pilimononaga gubalini holenebi mini mbiraore wulenebi winigo ogo

4 I̱na horo bibahendengi Ngode Datagaliwabehondo bi lalu howa í̠ mitangi bialu ka̱i̱ laruli. ^c 5 Irane í̠na Ngode Datagaliwabenaga wali agalihondo gubalini ho kegobi Anduane Homogo Yasuhondo mini mbiraore wu kegobi hale haru. 6 Í̠na mini mbiraore wu kegonaga mana wali agali maruhondo lamialu kegoni howa ina Kerisoha hogimbu bu kamagonaga turu holene tara tara ngaru manda biai hami̱ya Ngode Datagaliwabehondo bi ani lalu ko. ^d 7 Hamene-o í̠naga gubalini holene ngegome Ngode Datagaliwabenaga wali agali bibahendenaga gubalini mo turu hai hari. Ani birigome i̱ mo turu halu i̱naga mini mo hongo hari. ^e

Polohanda Onisimasinaga la henego ogo

8 Irane Kerisoha i̱ í̠naga hamene howa mbirale mbira bulene nga ale í̠hondo hongo howa, Harugo bia, labehe kogonigo. 9 Nde abule i̱na í̠ gubalini timbuniore ho kogodago bame la hangu bero. Ani larogoni i̱ Polo Keriso Yasunaga bi lamiaga kogoni hewaria marume dariba henego áyu garabaya kogoni howa ani laro. ^f 10 I̱ garabaya howa Onisimasi ibu Kerisohondo mini mbiraore wilo lowa Ngode Datagaliwabe mana lawai haru. Ani lawai harugola ibu mini mbiraore wiyago Kerisoha howa i̱ iginiore kago ibunaga la haro. ^g 11 Ala ibu í̠la habane mbira nabulene hayago áyu nde í̠nagabi i̱nagabi galone biaholene kagoni.

12 Áyu í̠ kegoria daibi larogo. Ibu ibiradagua i̱naga gubalini holene ibu heba ibilaro. 13 Bi mana debene lawai haruligonaga garabaya kogoni koria í̠na i̱ biamogo biradagua Onisimasi ibugua bilo ibu i̱la, Haba, lole hame laru. ^h 14 Anigo nde í̠na i̱ biamogo bia naloleberogo í̠ni bua biradagua dege bibe larogoni. Harugo mbira bia nalolebero. Í̠ni hame lededagua bia labelo henge ngero. ⁱ

15 I̱na manda berogola Onisimasi ibu emene tigimandi hanguni pubagi ho hayagonigo nde abule horo bibahendeni ibu í̠nila haabo holeberabi. 16 Ai áyu ibu garabaya biabe ale biahaga hangu ndogo ibu Kerisoha howa iya hameneore kabagoni. Ibuhondo gubalini howa mitangi timbuni ho kogoni. Í̠na ibu garabaya biabe ale biahagabi Anduane Homogoha í̠naga hameneorebi ka mitangi buwa ibuhondo gubalini timbuniore ho holebere. ^j

17 Í̠na iya mini mbiraore ho kabago manda biriyagua i̱ eberogola turu holenedaguaore Onisimasi ibiragola turu halu haru dai bibe. ^k 18 Ibugua í̠hondo kagua mbira biniyaguabi í̠la dano mbira heneyaguabi i̱ha mo bade habe. 19 Ogoria i̱ninaga gime gili berogo. I̱ Polohanda yolo bia dai bulebero. I̱na í̠hondo mo mitangi bia habe naheorego irane í̠naga holene i̱hondo dano ho kegoni í̠ni manda bidegoni. ^l 20 Anigo i̱naga hameneore Anduane Homogo mitangi bialu i̱ mo turu habe. Iya Kerisoha hamenela kaba manda bialu i̱ mo wála habe.

21 I̱na gili bialu howa manda berogola bi larugo hangu ndo bulebere. Maru biatago halu bulebere manda bido. 22 Ani bialu howa i̱ ibalu paluene anda hobane mbira manda manda bibe. Irane tígua i̱naga Ngode Datagaliwabehondo bi la halu kamigo ibugua ladai bialu i̱ tíni kamiria haru dai bulebira lowa mini dunu bia ho kogoni. ^m

Bi lamaro binigo ogo

23 Ebaborasa ibubi Keriso Yasunaga biabe biyagola garabaya binigo i̱ heba kabago ibugua, Í̠ mitangi bialu ko, laya. ⁿ 24 Agali maru i̱ heba mandagi biabe biaga Maga Arisadagasa Dimasa Luguma tiguabi anidagua dege laya. ^o

25 Anduane Homogo Yasu Keriso ibunaga biamogo bia holene tíha wiaabo helo hamelo ko.