Psa 13 | HUI | STEP | Anduane Homogo-o í̠na i̱ angi mitangi bule kebe. Í̠na i̱ embeda halu yu waore haribe. Í̠naga dengui lone hondoliya i̱hondo angi mo walia holeberebe.

a 13.1Yob 13.24, Iba 88.14, Ais 59.2

b 13.3Ya 51.39

c 13.4Iba 25.2, 35.19, 38.16

d 13.6Iba 116.7, 119.17

‏ Psalms 13

Anduane Homogohanda biamogo bilo bi lenego ogo

1 Anduane Homogo-o í̠na i̱ angi mitangi bule kebe. ^a
Í̠na i̱ embeda halu yu waore haribe.
Í̠naga dengui lone hondoliya
i̱hondo angi mo walia holeberebe.
2 I̱ genda yu kogonigo angi mo waholeberebe.
I̱ miniha tandaga ngelo koruni
horombe mbiragabi agiru hondo holeberebe.
I̱ waitigi karunaga andaneha naholiya
í̠na i̱ angi biamogo buleberebe.

3 Anduane Homogo i̱naga Ngode Datagaliwabeore-o ^b
Í̠na i̱ mitangi halu i̱naga bi larogo hale habe.
I̱ nahomoliya i̱naga de mo ngalalu lone mo hongo habe.
4 I̱ homaruyagua i̱naga waitigime lalu, ^c
Iname ibu bope harimadagoni, loligo nalelo.
Tigua i̱ pilarogo hondowa turu holigo nahelo.

5 Ani lolebiragoyu í̠na i̱ gubalini holebeda lo manda bialu
mini mbiraore wu kogoni.
Í̠na i̱ pele ngiaabo holeberegonaga
i̱ turu timbuniore ho kogoni.
6 Anduane Homogo í̠na i̱hondo bayale dege biaabo harigonaga ^d
i̱na í̠naga mini yaraga halu
iba gana laga bialu holebero.