Psa 17 | HUI | STEP | Anduane Homogo-o í̠na i̱naga bi larogo hale habe. I̱ tigabi ibaga bu henego ai i̱naga genda ngaru í̠ keria mo yalu eberogoni. I̱na í̠hondo bi ke̱ howa ndo larogo hale habe.

a 17.3Iba 16.7, Seg 13.9, Mal 3.2-3, 1 Pi 1.7

b 17.5Iba 119.133

c 17.7Iba 31.21

d 17.8Man 32.10, Iba 91.1, 91.4, Seg 2.8, Md 23.37

e 17.101 Sml 2.3, Yob 15.27, Iba 73.7

f 17.15Iba 4.6-7, 16.11, 1 Yo 3.2

‏ Psalms 17

Debidi ibu mini tigabi howa Anduane Homogohondo bi lenego ogo

1 Anduane Homogo-o í̠na i̱naga bi larogo hale habe.
I̱ tigabi ibaga bu henego
ai i̱naga genda ngaru í̠ keria mo yalu eberogoni.
I̱na í̠hondo bi ke̱ howa ndo larogo hale habe.
2 Í̠na i̱ biamogo beregome
i̱na godi lalu wayali holebero.
Í̠na mana bayale ogo nga de handabelo hame ledogoni.

3 I̱naga miniha ngogo í̠ manda biaiho ke. ^a
Í̠na mbiraga ibuwa i̱ ba handariyagua
mini ko i̱ha mbira ngaria handa nabulebere ndobe.
I̱na i̱ninaga ne harigaha howa bi ko nalolebero lo wirugoni.
4 Agali maru karume bi ko lagadagua i̱ nalaga kogoni.
I̱na í̠naga bi lowini ngago hongo howa yu halu
keba holenebi wai bulene ngarubi bibahende erembira miai harugoni.
5 I̱na í̠naga hariga ngagoria pialu kogome ^b
i̱naga geme hariga mendeha pubagi nahene kogoni.

6 Ngode Datagaliwabe-o i̱na í̠hondo bi larogola í̠ hale harili.
Ani kego manda bialu
i̱na í̠hondo bi áyu larogo haleore habe.
7 Í̠naga gubalini holene timbuniore ngego ^c
ina kamagohondo mo walia habe.
Í̠na í̠naga gi tigame ina yania haga kegonigo
ina waitigi hondoligo í̠ni andaneha ha do kama.

8 Í̠ninaga deore baya hangu handayaho harilidagua ^d
i̱ handayaho habe.
Ega angibunime ibu igini babaganeme dambi hagadagua
i̱ mo do howa handayaho habe.
9 Agali ko karume i̱ mo ko nahelobi
i̱naga waitigi ho mabu bupe karume i̱ bo wa nahelobi
ani handayaho habe.

10 Tigua agali mende kago dara nahagaore ka. ^e
Tigua bi hongo howa laabo halu
tininaga mini hangu yaraga halu bi laga kagoni.
11 Tigua i̱ ge porogoha talima ibaga bialu
i̱ ho mabu bupe haiho kagoni.
Tigua i̱ gi dolaho yu ibaga bialu
i̱ bope hole manda mandabu ka.
12 Ti laiono gabua ale howa
mbirale ema bialu porago minu bo nole lowa ha do haga ka.
Laiono daluame mbira bo nole yu bira do ho hagadagua
i̱ bo wahole manda manda bu hai ka.

13 Anduane Homogo-o í̠ ibalu
waitigi bu karu baba wai bialu ti bope hai habe.
Í̠naga ayu tibu ne gadele biago yu ibalu
waitigi karu bo wahai habe.
Agali ko uruninaga giha howa
i̱ mo wialu haru dai bibe.
14 Anduane Homogo-o
agali ko uruni ti dindini wini ngaru hangu mo tene haga bu karu
tinaga giha koria í̠naga hongome i̱ mo wialu biamogo bibe.
Wali agali í̠ hame nalaga ho karu
ti pani karulape nelo mibe.
Tinaga waneigini aguanene maha holebiraruhondobi
pani mia dege bibelo hameledo.

15 Ai i̱ni agali tigabiore kogodago ^f
mani í̠ninaga denguiore hondolebero.
De ngalalu heyu howa í̠ kegobi hondowa
i̱ turu timbuniore holebero.