Psa 19 | HUI | STEP | Hari daligani li bigi biragome Ngode Datagaliwabe ibuninaga mini mo yaraga holene inahondo bayuwaore walia haga bialu kagoni. Mbirale li harini bu karu bibahendeme Ngode Datagaliwabe ibugua bayaore wabiniyaru panigiore mo walia haga bidagoni.

a 19.1Iba 8.1, 50.6, Lm 1.19-20

b 19.2Iba 74.16, 139.12

c 19.4Lm 10.18

d 19.6Iba 113.3

e 19.7Iba 119.130

f 19.8Iba 12.6, 36.9, 119.128

g 19.9Iba 119.138, 119.142

h 19.10Iba 119.72, 119.103, 119.127

i 19.11Iba 17.4

j 19.12Iba 40.12, 51.1-2, 90.8

k 19.13Iba 18.32, 25.11, 119.133

l 19.14Iba 18.2, 31.5, 104.34

‏ Psalms 19

Ngode Datagaliwabehanda mbirale wabu heledarume ibuninaga mini mo yaraga holene walia kago ogo

1 Hari daligani li bigi biragome ^a
Ngode Datagaliwabe ibuninaga mini mo yaraga holene
inahondo bayuwaore walia haga bialu kagoni.
Mbirale li harini bu karu bibahendeme
Ngode Datagaliwabe ibugua bayaore wabiniyaru
panigiore mo walia haga bidagoni.
2 Horo mbira mbira haga beramago bibahendeme inahondo ^b
Ngode Datagaliwabe ibugua mbirale wabini harini li bu karunaga lalu langigi bialu ka.
Mbiragabi mbi mbira mbira bibahendengi bi langialu dege kagoni.
3 Horobi mbibi libuni ne hariga nawi bi nalabehe kagoni.
Ogoni labo libugua bi mbira lararia hale naharamaligoni.
4 Bi hale naharamaligoyu horola mbila libugua bigi biragome ^c
wali agali bibahendeme de handalu manda bilonaga lamialu kagoni.
Libunaga bi ogoni dindi bibahendeni pume haragola
wali agali bibahende hale haiho kagoni.
Ngode Datagaliwabehanda li harini hona ni ibu palelonaga
balai anda mbira bu heledagoni.
5 Igiri mbirame wandari dabu buwa ibu andaga haru pialu
igiri ibu turu hama piagadagua
ni ibu egerebagi turuho yalu tagira ibugu biaga.
Agali gerai lagame gerai lo yalu hariga pu bola galo nabi
tiga tigaore polene ngadagua
ni ibu hariga ibuni piaga ngadaguaore turu halu piaga.
6 Ni ibu lirayagi howa tagira ibalu nairayagi anda piaga. ^d
Ani biagago mbirale mbira ni ibunaga tandaga biragome daba nahelo
mo do habe nahe nga.

Anduane Homogonaga bi lowini ngago ogo

7 Anduane Homogonaga bi lowini ngago ^e
baya gibi tigabiore lowini ngagoni.
Ibunaga bi ogonime wali agali holene gahenge ngialu
ina mo hongo hodai biaga.
Anduane Homogonaga bi lo ngaru ina hanaho habehe kama.
Wali agali mini nawi karu
ibunaga bi ogonime mini gigabi mo wia haga.
8 Anduane Homogonaga bi lowigi bidaru tigabiore lowigi bidagoni. ^f
Bi uruni hale halu biaga karu ti turuho haga ka.
Anduane Homogonaga bi lo ngaru duniniore lo ngagoni.
Bi urunime ina manda bayale bulene ngiaga nga.
9 Anduane Homogohondo giho holenego mana bayaleore ogoni. ^g
Ibuhondo giho holenego mana ogoni
wali agalime bialu haho wiaaboore holebira.
Anduane Homogohanda bi o langiradaruni
henenebi tigabiorebi langiaabo haga ka.
10 Anduane Homogonaga biore baya duniniore ^h
wali agalime hame loabi muni ngolo dindiha lowa nga.
Muni ngolo uruni koda lowa
ibunaga bi ogoni baya gibiore ngago iname gubaliniore howa hame lolene nga.
Anduane Homogonaga biore dendebi tombehe
mone ibane dendebiore mbaria ngaru magubida lowa
bi ogoni dende taraorebi ngagoni.
11 Anduane Homogo í̠naga bi lowigi bidegome ⁱ
i̱ í̠naga biabe biaga kogoni mana lalu mo tiga bigi biaga.
I̱na í̠naga bi lo ngegodagua hale halu bigi berogola
í̠na nde i̱hondo turu halu i̱ buru pado alego tiga handalu ngiaiore hariligoni.

12 Mbiralime ibuninaga ko biyago ibunime handabe nahe ka. ^j
Mana ko mbira bigi buwa
i̱nime bu dambiho ko lo manda nabi koyagua
mana ko o birudarunigo í̠na domai habe.
Ani beregola í̠naga deni i̱ dodo nahe holebero.
13 Mana ko mbira i̱na bero lalu buligobi ^k
í̠na i̱ yaniho habe.
Ko bulene tara tara ngarume i̱ mo pila haabo haragola
i̱ ko andaneha haabo holigo í̠na i̱ gi mibe.
Ani beregola i̱ ko mbira para nahe tigabiore holebero.

14 Anduane Homogo-o í̠ i̱naga ha do haganebi i̱ gi miaganebi kegoni. ^l
I̱na bi larogobi mitangi berogobi
í̠naga deni karulape helo hame ledo.