Psalms 21
Kini ibu wayali hayagonaga Anduane Homogo mini yaraga henego ogo
1Anduane Homogo-o í̠na kini kago mo hongo harigonaga ibu turuho kagoni.Biamogo bialu wayali helarigonaga
ibugua í̠hondo turu timbuniho kagoni.
2Í̠na ibunaga bu miniha hamelo heago ale miai hariya.
Ibu wayali holenaga pele ngi layagola hale halu
í̠na nangule nale miaore birigoni.
3Í̠na ibu mo bayale hagane aleru ibu hearia ibilariyagoni.
Kininaga manda ngolome wabini wiago
ibunaga haguaneni í̠na mo karula hariya.
4Ibugua holene bayale ngibe lalu hale hayagola a
í̠na anidagua miriya.
Ibu dindi ogoriani holene luore helo
mo wia hariya.
5Í̠na ibu biamogo birigome
ibu agali mini lene mbira ka.
Ibuha hongo holenebi mini lenebi kago
í̠nime mirigoni.
6Í̠na ibuhondo bayale holeneru wiaabo helo mirigoni. b
Í̠ni ibu heba kaware haabo kegome
ibu mo turu haabo haga ke.
7Kini ibugua Anduane Homogohondo mini mbiraore hongohe wu kagoni. c
Anduane Homogo Daligaorene Daliga kago
ibugua kini gubalini ho haabo haga kagome
ibu hongohe ha ho wiaabo holebira.
8Kini ibugua waitigi bu karu bibahende minu yania hai holebira.
Agali ibu handabe manga haga karu hondowa
ibugua garabaya helai holebira.
9Ibuni hamani hapani ho howa d
ibugua irame bo dalu mbirale ngaru dai hagadagua
waitigi karu bo wahai holebira.
Anduane Homogohanda ti baba keba halu bope haragola
ti bibahende irame dalu do amo lai holebira.
10Kini ibugua tinaga waneigini bu karu bo wahai holebira.
Tinaga waneigini aguanene mani holebirarubi
mbira naheore ereba halu amo lai holebira.
11Tigua kini ibu mo ko hole lowa e
dindiha hendore ndi lama ibaga bialu howabi
tigua mo henene halu ibu bope naholebira.
12Kini ibugua danda tege lalu ti kagoha timu baede haragola
tigua gi halu ibida piai holebira.
13Anduane Homogo-o í̠ hongo haabo holene taraore kego inaha ibilariligo
ina í̠naga mini yaraga holeberema.
Iname iba gana lalu í̠naga mini yaraga holeberema.
Copyright information for
HUI