a34.1-221 Sml 21.13-15
b34.1Eb 5.20, 1 Te 5.18, 2 Te 1.3, 2.13
c34.3Iba 69.30, Lg 1.46
d34.4Iba 18.6, Md 7.7, Lg 11.9
e34.6Iba 3.4, 34.17-19
f34.72 Kin 6.17, Dan 6.22, Seg 9.8, Hi 1.14
g34.8Iba 2.12, 1 Pi 2.3
h34.9Iba 31.23
i34.10Yob 4.10-11, Iba 84.11
j34.12-161 Pi 3.10-12
k34.131 Pi 2.22
l34.14Ais 1.16-17, Lm 12.18, Hi 12.14
m34.15Yob 36.7, Iba 34.6, 34.17
n34.16Min 10.7, Yar 44.11, Amo 9.4
o34.17Iba 34.6, 34.15, 34.19, 145.19-20
p34.18Iba 51.17, Ais 57.15, 66.2
q34.19Min 24.16, 2 Ti 3.11-12
r34.20Yo 19.36
s34.222 Sml 4.9, 1 Kin 1.29, Iba 103.4

‏ Psalms 34

Anduane Homogo ibu baya gibiore biaga kagonaga ibuhondo ka̱i̱ lenego ogo

1I̱na Anduane Homogohondo ka̱i̱ore laabo halu holebero. a , b
I̱na ibunaga mini yaraga nahe naholebero.
 2Ibugua bigi biyarunaga i̱na ibunaga mini mo yaraga halu holebero.
Wali agali marume hengedope haragola genda ho haga kamiru
tí i̱na bi o larogoni hale howa turu halimulonaga laro.
 3Tíbi i̱bi ina Anduane Homogo ibu daliga gibiore ka lama. c
Ibunaga mini ina haru mandagi mo yaraga hama.

4I̱na Anduane Homogohondo bi larugola d
ibugua hale halu ladai biya.
I̱ gi bulene tara tarame daribaho wiaria
ibugua i̱ golope haya.
 5Marume hengedope haragola miniha gendaho haga karu
ti Anduane Homogo ibugua biamogo birago hondowa turu haga.
Anigo ti miniha genda howa turu nahe mbira naholebiraore.
 6Hongo nahe karume Anduane Homogo olaragola e
ibugua hale halu biamogo biagaore ka.
Ti genda tara tara yu haga bidaria
ibugua ti pele miaga ka.
 7Wali agali Anduane Homogohanda laradagua hale halu biaga karu f
ibunaga dahuliyalime mamage helaga biaga.
Uruni ti kagoria gendabi hiriribiru íbu wigi bidagoria howa
ti ibunime gi miaga ka.

8Anduane Homogo baya gibiore ka laramagoni g
heneneore leneda lole í̠nime manda bialu handabe.
Ibuha ha doho karu ti bayale holene handa walia howa turuho ka.
 9Anduane Homogonaga wali agali kamiru bibahendeme h
ibunaga andaneha halimu.
Ibugua bia laradagua hale halu biaga karu
ti mbirale mbira buru palia nabi karulapeore holebira.
 10Tomo garibilo habe nahe laiono hongoheru heba mbiru garibilo hagagoyu i
wali agali Anduane Homogohanda bia laradagua biaga karu
ti mbirale bayale damenego mbira buru palu naholebira.

11I̱ nenege kamiru-o i̱na bi larogo hale hole ibidaba.
Tí Anduane Homogonaga andaneha halimulonaga bulene
i̱na lawai holiya ibidaba.
 12Tí turu ho holene hamelo kamibe. j
Tí luore bayale halu hodagua holene hamelo kamibe.
 13Anidagua holene hamelo kamiyagua k
tínaga ne harigaha howa
bi ko nale tindule ke̱bi naheore halimu.
 14Ko bulene ngaru erembira mialu
mana bayale bialu halimu. l
Tínaga gubalinioreme mbirale mo palia howa bigi bulenego dabalu bialu halimu.

15Wali agali mini tigabiwi karu m
Anduane Homogo ibunime de handaya howa mamage haga ka.
Tigua genda yu howa ibu olaga biragola
ibunime hale halu biamogo biaga ka.
 16Mana ko biaga karu hondowa n
Anduane Homogo ibu turu nahaga ka.
Ko biagaru homaragola
wali agalime uruni ti abaleore embedaho waholebira.
 17Mini tigabiwi karume Anduane Homogo olaragola o
ibugua hale halu ladai biaga ka.
Ti genda tara tara yu howa ibu olaga biragola
ibugua hale halu biamogo bigi biaga ka.
 18Wali agali mini dege dindi howa turu nahe karu p
Anduane Homogo ibu ti kagoria kaware ka.
Miniha hanaho holene mbira nawioredagola
agini hanaho hoabe tobaho karu ibugua pele miaga ka.

19Mbirali mini tigabiwi kago ibu tandaga nolenebi genda yulenebi handalu holebira.
Ibu ani tandaga nalu kariabi genda yu kariabi
Anduane Homogo ibunime ibu pele mulebira. q
 20Anduane Homogo ibunime mbirali mini tigabiwi kago hondo haga ka. r
Ibunaga kuni emeneorebi mbira bu lolani handalu ibunime yaniho holebira.
 21Ko bulene bibahende ngarume
wali agali ko biaga karu bo home lolebira.
Wali agali mini tigabiwi karuhondo handabe manga haga karu
Anduane Homogohanda ti pani mulebira.

22Anduane Homogohanda ibuninaga wali agali pele mulebira. s
Ibuha ha do hole ibu karia poraru ti bayale holebira.
Copyright information for HUI