Psa 7 | HUI | STEP | Anduane Homogo i̱naga Ngode Datagaliwabe-o waitigi bu karume i̱ handa walia nahelo í̠niha ha do hole eberogoni. Agali i̱ minule talima ibalu karume i̱ bo wa nahelo biamogo bialu i̱ mo ko nahelo í̠na i̱ pele ngibe.

a 7.1Iba 31.1, 31.15, 71.1

b 7.31 Sml 24.11

c 7.41 Sml 24.7, 26.7, Iba 109.4-5

d 7.6Iba 35.23, 94.2, 138.7

e 7.7Iba 22.27

f 7.8Iba 26.1, 43.1, 98.9

g 7.9Iba 34.21, 40.2, 94.23, Mo 2.23

h 7.10Iba 18.2, 18.30, 97.10-11

i 7.11Iba 50.6, 90.9

j 7.12Man 32.41-42, Iba 64.7

k 7.13Iba 18.14, 45.5

l 7.14Yob 15.35, Ais 59.4, Ya 1.15

m 7.15Iba 57.6

n 7.16Iba 140.9-11

‏ Psalms 7

Debidi ibu genda yu howa Anduane Homogohondo bi laminigo ogo

1 Anduane Homogo i̱naga Ngode Datagaliwabe-o ^a
waitigi bu karume i̱ handa walia nahelo
í̠niha ha do hole eberogoni.
Agali i̱ minule talima ibalu karume
i̱ bo wa nahelo biamogo bialu
i̱ mo ko nahelo í̠na i̱ pele ngibe.
2 Laiono gabuame wali agali bo budabaga biagadagua
i̱naga waitigi karume i̱ bo budabagabu waholani.
Tigua dindi ko mbirali i̱ biamogo bulene nahe ngagoha
minu waholigo i̱ pele ngibe.

3 Anduane Homogo i̱naga Ngode Datagaliwabe-o ^b
i̱ha biako hene mbira wiaguabi
i̱na mbirali kagohondo ko mbira bini wiaguabi
4 i̱na i̱naga nenege mendeali kago ndelene wiaguabi ^c
waitigi karuhondo bame ko biaede hene wiaguabi
urunidagua i̱na bini wiagua nde
5 waitigime i̱ minilo wahabe laro.
Tigua i̱ bo hengedo wahalu
i̱naga tingini bo budabaga bialu
dindini bame baa̱i̱ halu pelo wahabe.

6 Anduane Homogo-o í̠nime keba howa heyabelo hamelo ko. ^d
I̱naga waitigime i̱la wai hongo howa bialu karu
ti mo ko halu bai habe.
Í̠na mana tigabi hangu biaga kegoni ndobe.
Ani kego ai í̠na abale ibalu i̱ biamogo bibe.
7 Í̠ni dahuliya andaga biragane dagia ngegoriani biruwa ^e
í̠na wali agali bibahende karu í̠ni kegoha mo ngoai halu
handame ho habe.
8 Anduane Homogo-o í̠na wali agali bibahendeme mana ko birago mo tale bialu dabaga ke. ^f
I̱na mana bayale tigabi wiago bialu haabo halu harugo manda buwa
í̠nime i̱ dababe.
9 Ngode Datagaliwabe-o í̠ bayale tigabi biaga kegoni. ^g
Í̠na wali agali bibahendenaga bu miniha manda buwa
mo tale bialu dabaki biaga kegoni.
Wali agali mini kowi karume mana ko biraru
í̠nime mo wahai habe.
Dabaki bialu wali agali tigabi karu ti bayale helo
í̠na ti biamogo bigi bibe.

10 Ngode Datagaliwabe ibu i̱naga haru hagaore kagoni. ^h
Ibugua wali agali mana tigabi biaga karu biamogo biaga kagoni.
11 Ngode Datagaliwabe ibu mana tigabi ngadagua ⁱ
tigatigaore mo tale bialu dabaga ka.
Wali agali mana ko biaga karu
ibugua ti bope haabo haga ka.
12 Wali agali ko biaga karu tigua mana ko wahai halu ^j
mini beregeda nabi heagua nde
Ngode Datagaliwabe ibugua ibunaga wai biagane ayu tibu baya hangu nage wialu ne holebira.
Ibugua ibunaga danda ngago wai bule
manda manda bu wulebira.
13 Ibugua wali agali uruni bo waholenaga ^k
manda manda bialu timu edaho kagoni.

14 Wali agali ko biaga karume ogobi ka manda bidaba. ^l
Tigua mana ko ngaru bulenaga buleore lalu
miniha hongo haga ka.
Tigua mana ko ngaru hangu bialu haabo holenaga
ke̱ haabo haga kagoni.
15 Agali mende kago minule lowa ^m
gundu uli tombo wu haga ka.
Uli ogoni tombo wu kagoha
tini pu aribia holebira.
16 Anidagua dege ko tigua biyagome
tiniha wiadambi hai holebira.
Agali mende kagola keba howa lai lalu gungu bule mandabu heagua nde
o biagohondo bule mandabu kago tiniha biadai bulebira. ⁿ

17 Anduane Homogo ibugua tigabiore bialu haabo haga kagonaga
i̱na ibuhondo ka̱i̱ lalu ko.
Anduane Homogo Daligaorene Daliga kagonaga mini yaraga halu
i̱na iba gana bayaleru laga bialu holebero.