‏ Psalms 9

Anduane Homogo ibuni tigabi biaga kagonaga ka̱i̱ lenego ogo

1Anduane Homogo-o i̱naga bu miniha
i̱na í̠hondo ka̱i̱ timbuniore lo kogoni.
Í̠na baya taraore bialu harigonaga
i̱na wali agali bu karu lamigi bulebero.
2I̱na í̠ mitangi bialu turu ho holebero. ^a
Anduane Homogo Daligaorene Daliga kego
i̱na í̠ mini yaraga halu iba gana lolebero.

3Agali i̱ baba waitigi hayaru í̠ de handalu ti ibida piai haya.
Ti pilalu homai haya.
4Í̠na dabagane dagiani biruwa mana mo tale biagadagua
tigatiga hangu mo tale biaga kegoni.
I̱na bialu hewaru hondowa í̠na mo tale bialu heria
i̱ tigabi bolanguahe hewaria handari.

5Wali agali í̠ mitangi nahaga hearu í̠na ti mo dabaki harigoni. ^b
Wali agali ko biaga
o biaru ti abogo ogoria hene lalu mani te mbira nalelo
í̠na bo wahai harigoni.
6Ngode Datagaliwabe í̠na inanaga waitigi uruni bo wahai halu
tinaga tano wiaru bibahende bo gialo wahai harigoni.
Uruni bibahende mo ko hene wiaabobo bu ngago
manibi mitangi bulene mbira naholebiraore.

7Anduane Homogo ibu kiniore haluhe haabo ka. ^c
Ibugua godi hale hole dagiani birule manda manda bu ka.
8Ibugua mana tigabiore biaga halu ^d
wali agali bibahende handayaho howa haru hai ka.
Ibugua mana tigabiore ngagoria howa
hameigini tara tara karume bialu hayaru bibahende
mo talebuki bulebira.

9Anduane Homogo ibuniore anda hongohe kaligobi kagoni. ^e
Mbirali ibunaga waitigime bole taliragola
ibu kagoha pu holebira.
Genda tagira ibirangi ibu kagoha pialu ha do holebira.
10Anduane Homogo-o wali agali í̠ni keria ibiraru ^f
erembira mialu napiaga kegoni.
Í̠ ogonibi kegonigo wali agali í̠ mini manda bu karume í̠hondo mini mbiraore wu holebira.

11Anduane Homogo ibu Saiono tanoni kini kago ^g ibunaga mini yaraga halu
ibuhondo iba gana lolene nga.
Ibugua biabe hongohe tara biyarunaga
wali agali hameigini tara tara karume hale hai helo bi loyogo lolene nga.
12Wali agali genda yu karu ^h
Anduane Homogo ibugua ti mitangi ho haga kagoni.
Ibugua wali agalime dugu bialu karu
helalu handa tara nahaga kagoni.
Wali agali uruni mo ko haga karu
ibugua ti pani nelo miaga ka.

13Anduane Homogo-o í̠na i̱ dara habe.
Genda tandagala i̱ waitigime mo ngirago í̠na de handabe.
I̱ homolene kaware wiagoria pu hewaria
í̠na i̱ haru dai bialu mo wirigoni.
14Í̠na uruni bibahende biai haga kegonaga ⁱ
i̱na bi te loyogo lai halu
í̠naga mini mo yaraga holebero.
I̱na Saiono tanonaga pabe haraba ngagoria heyu howa
í̠na biriru bibahende latagi halu
i̱ mo wirigonaga turuho holebero.

15Wali agali hameigini tara tara í̠ mitangi nahaga karume ^j
I̱ uli pelonaga uli tombo wu hearia
habolo puwa tini ogoniha pilaya.
Tigua wena nuha minule nu wiaho hearia
tini nu ogoniha do wiya.
16Anduane Homogohanda manani tigatiga mo tale birangi ^k
ibunaga mini tigabi ngago mo walia haga ka.
Wali agali ko biaga bu karume maru mo ko hole lowa
wai hanalu bu karu
mo habo lalu tini mo ko henego polebira.

17Wali agali hameigini tara tara mana ko biagaru ^l
Ngode Datagaliwabe erembira miaga bu karu
ti bibahende humbirini andaga pu hai holebira.
18Ngode Datagaliwabehanda wali agali yagibano bu karu ^m
embeda nahe mitangi biaabo haga ka.
Genda yu karu Ngode Datagaliwabehanda ti biamogo bilo
ibuhondo mini dunu biaho kagola
ibugua ti genda yuwa lu helowa naholebira.

19Anduane Homogo-o dindini wali agali bu karume
í̠hondo ngui higi buyu helo wanahe
í̠ni abale heyalu ibabe.
Wali agali hameigini tara tara í̠ mitangi nabiaga karu
ti í̠naga deni íbu helowa
í̠ni manani tigatiga mo dabaki habe.
Anduane Homogo-o í̠na wali agali uruni mo gi hai habe. ⁿ
Wali agali hameigini tara tara bu karu
tini habane nabulene kamarunida lo manda bilo helabe.
20

MBUGA MANE

(Iba Gana 90-106)