Song 8 | HUI | STEP | I̱ ai̱yahanda í̠ i̱ mbalini taba honowa andu nabelo nginidale i̱na ogoni bayaleda lalu kole. Ogonigo i̱na í̠ harigani lola haruyagua í̠ nu̱nu̱ larogola wali agali karume hondowa í̠ ko bere lolene nawulebira.

‏ Song of Solomon 8

1 I̱ ai̱yahanda í̠ i̱ mbalini taba honowa andu nabelo nginidale
i̱na ogoni bayaleda lalu kole.
Ogonigo i̱na í̠ harigani lola haruyagua
í̠ nu̱nu̱ larogola wali agali karume hondowa í̠ ko bere lolene nawulebira.
2 Í̠na i̱ gubalini holenenaga mana lawai habelo
i̱ ai̱ya andaga í̠ haru polebero.
I̱na í̠waini iba bayalego mbirale mo dende bia hagane ale heba bimaga maga binigo
í̠ nabelo mo yalu ibuwa ngulebero.

3 I̱ lawini ibunaga gi lehagome i̱naga mahayagi yani halu
ibunaga gi tigagome i̱naga tinginini yani haya.

4 Yarusaleme waliru-o tígua mbira nabuleore lalu i̱hondo bi lo widaba.
Mbirale ogoni iyanagago tígua iya mo mogola howa
gubalini holene mo dala hangu hangu nahalimu.

Iba gana waragane

Walirume iba gana lenego ogo

5 Dindi ko dalu naibaga ngagoha howa ibunaga yamalila gi pingipongo bialu ibiragoni wali aibe.

Igirime iba gana lenego ogo

Í̠ ai̱yahanda ira mini abelo teha í̠ taba heneneyago
i̱na í̠ ogoniha paleria mo barila harugoni.

Wandarime iba gana lenego ogo

6 Í̠na wali mende gubalini nahe i̱ hangu gubalini haabo habe.
Wali mende í̠naga gime yani nahe i̱ hangu yani habe.
Homame hongo howa agali bope hagadagua i̱na í̠ gubalini holene hongohe ngo.
I̱na í̠ hame lolenego ira hungu bialu daradagua bida.
7 Ira ogonibi dedago iba odo hundia hole biyaguabi
iba li ibalu hundia hayaguabi nahundulebiraore.
Agali mbira ibugua walime ibu gubalini halu hame lelo lowa
ibunaga muni bibahende wali biago miai hayaguabi
ibu bo yagibano halu wali biagome ibu mege bu dai bulebira.

Wandari mbalinirume iba gana lalu ladai binigo ogo

8 Inanaga mbalini ibu wandari emene ogoni ibu andu naibi beda.
Ibu wandari mabuage bedaria igiri mbirame ibu dabu bule ibiragola
iname wandari biagohondo agi bia holeberemabe.
9 Ibu tanonaga ege pabe bedayagua
ogoriani iname silibame anda luni wa hondo biragane ale mbira ibunaga bia holeberema.
Ibu tano to̱le̱ pabe panga hayagua
iname ibu pele mialu ira tamia hongoheme panga hongohe wabu heloleberema.

Wandarime iba gana lenego ogo

10 I̱ tanonaga to̱le̱ pabe halu
i̱naga andu tano pabe ogoninaga anda lu wa hondo birule kira bu helene haradagua bida.
I̱ yamalila iya haru mandagi haribayagua
i̱ mini dungulo haruligo ibu bayuwa manda bu kagoni.

Igirime iba gana lalu ladai binigo ogo

11 Kini Solomono ibunagagerebi mabu mbira dindi Bala Hamono lagagoha winigo nga.
Agali maru ti mabu ogoniha gerebi lini dole hame layagua
ibu muni siliba daosini (1000) mbira mbira migi biaga.
12 Solomono ibu muni siliba daosini mbira (1000) ogoni mo yilo.
Agali maru mabu ogoni yolo mule hongo hayaru ti tininaga muni siliba handari kira (200) ogoni mo yilo.
I̱ aginaga mogo lolebe.
I̱ i̱ninaga gerebi mabu mbira bayale ngogodago.
13 I̱naga gubalini-o í̠na mabuha howa bi labelo hame ledo.
Í̠na bi labelo i̱naga nenegeru ti hale hole hondo kagoni.

Wandarigo ibugua iba gana lenego ogo

14 I̱naga gubaliniore-o í̠na nogo mini dia aleme dai lagadagua lalu
nogo dia wangabe hongoheme dai lagadaguabi lalu
hari bare hombene mbirale ngabi buwi ngaruniha howa pogolama ibagadagua abale dai bibelo hame ledo.