Amo 1 | HilAPD | STEP | Amo ini ang mensahi ni Amos nga taga-Tekoa nga manugbantay sang mga karnero. Ini nga mensahi parte sa Israel. Kag ginpahayag ini sa iya sang Dios duha ka tuig antes matabo ang linog, sadtong panahon nga si Uzia amo ang hari sang Juda kag si Jeroboam nga anak ni Joash amo ang hari sang Israel.

‏ Amos 1

1 Amo ini ang mensahi ni Amos nga taga-Tekoa nga manugbantay sang mga karnero. Ini nga mensahi parte sa Israel. Kag ginpahayag ini sa iya sang Dios duha ka tuig antes matabo ang linog, sadtong panahon nga si Uzia amo ang hari sang Juda kag si Jeroboam nga anak ni Joash amo ang hari sang Israel.

2 Nagsiling si Amos, “Nagangurob ang Ginoo halin sa Zion; ^{▼▼Zion: Amo ang isa ka tawag sa Jerusalem.} ang iya tingog nagadaguhob halin sa Jerusalem. Kag tungod sini nagakalaya ang mga palahalban sang mga manugbantay sang karnero pati ang mga tanom sa putokputokan sang Bukid sang Carmel.”

Ang Silot sa Nasyon sang Syria

3 Amo ini ang ginasiling sang Ginoo parte sa Syria:

“Tungod sa sige-sige nga pagpakasala sang mga taga-Damascus, ^{▼▼Damascus: Amo ini ang kapital sang Syria kag nagarepresentar sang bilog nga nasyon sang Syria.} pagasilutan ko gid sila.
Kay ginpintasan nila ang mga taga-Gilead nga daw sa gin-agyan sang tapi nga panglinas
nga may mga ulounto nga salsalon.
4 Gani pagasunugon ko ang palasyo ni Haring Hazael
kag ang mabakod nga mga parte sang Damascus nga ginpahimo sang iya anak nga si Haring Ben Hadad.
5 Pagagub-on ko ang puwertahan sang Damascus
kag pagalaglagon ko ang pangulo sang Kapatagan sang Aven kag sang Bet Eden. ^{▼▼Kapatagan sang Aven…Bet Eden: Mga lugar ini nga sakop sang Syria.}
Pagabihagon sa Kir ang katawhan sang Syria. ^{▼▼Syria: sa Hebreo, Aram}
Ako, ang Ginoo, ang nagasiling sini.”

Ang Silot sa Nasyon sang Filistia

6 Amo ini ang ginasiling sang Ginoo parte sa Filistia:

“Tungod sa sige-sige nga pagpakasala sang mga taga-Gaza, ^{▼▼Gaza: Ang Gaza isa sa mga nagapanguna nga siyudad sang Filistia kag nagarepresentar sang bilog nga nasyon sang Filistia.} pagasilutan ko gid sila.
Kay ginbihag nila ang bilog nga pumuluyo sang mga banwa
kag ginbaligya nga ulipon sa Edom.
7 Gani pagasunugon ko ang mga pader ^{▼▼pagasunugon ko ang mga pader: Posible nga may mga parte sang sini nga pader nga masunog sang kalayo ukon ang kalayo diri nagasimbolo sang kalaglagan.} sang Gaza
kag ang mabakod nga mga parte sang sini nga siyudad.
8 Pagalaglagon ko ang mga pangulo sang Ashdod kag sang Ashkelon,
kag pagasilutan ko ang mga taga-Ekron. ^{▼▼Ashdod…taga-Ekron: Mga lugar ini nga sakop sang Filistia.}
Ang mga Filistinhon nga makapalagyo sa silot magakalamatay man.
Ako, ang Ginoong Dios, ang nagasiling sini.”

Ang Silot sa Nasyon sang Tyre

9 Amo ini ang ginasiling sang Ginoo parte sa Tyre:

“Tungod sa sige-sige nga pagpakasala sang mga taga-Tyre, pagasilutan ko gid sila.
Kay ang bilog nga pumuluyo sang mga banwa ginbaligya nila nga ulipon sa Edom.
Kag wala nila pagtumana ang ila kasugtanan sa sini nga mga tawo bilang mag-abyan.
10 Gani pagasunugon ko ang mga pader sang Tyre
kag ang mabakod nga mga parte sang sini nga siyudad.”

Ang Silot sa Nasyon sang Edom

11 Amo ini ang ginasiling sang Ginoo parte sa Edom:

“Tungod sa sige-sige nga pagpakasala sang mga taga-Edom, pagasilutan ko gid sila.
Kay ginpanglagas nila ang ila kadugo nga mga Israelinhon
kag ginpamatay nga wala sing luoy-luoy.
Indi gid madula ang ila kaakig sa mga Israelinhon.
12 Gani pagasunugon ko ang Teman kag ang mabakod nga mga parte sang Bozra.” ^{▼▼Teman…Bozra: Mga lugar ini nga sakop sang Edom.}

Ang Silot sa Nasyon sang Ammon

13 Amo ini ang ginasiling sang Ginoo parte sa Ammon:

“Tungod sa sige-sige nga pagpakasala sang mga taga-Ammon, pagasilutan ko gid sila.
Kay ginpangririan nila ang tiyan sang nagabulusong nga mga babayi sang Gilead,
para lang nga maglapad ang ila nga duta.
14 Gani pagasunugon ko ang mga pader sang Raba ^{▼▼Raba: Amo ini ang kapital sang Ammon.} kag ang mabakod nga mga parte sang sini nga siyudad
samtang nagasininggit ang ila mga kaaway nga nagasalakay sa ila,
nga nagahagunos pareho sang bagyo.
15 Kag pagabihagon ang hari sang Ammon pati ang iya mga opisyal.
Ako, ang Ginoo, ang nagasiling sini.”