Hos 12 | HilAPD | STEP | Ang mga taga-Israel nagasalig sa mga butang nga wala sing pulos. Ang ginalagas nila sa bilog nga adlaw amo ang mga butang nga makahalit sa ila. Nagadugang ang ila pagbinutig kag pagpamintas. Nagahimo sila sang kasugtanan sa Assyria kag sa Egypt, amo gani nga nagadala sila sang lana sa Egypt bilang regalo .

‏ Hosea 12

1 Ang mga taga-Israel ^{▼▼Israel: sa Hebreo, Efraim. Makita man ang pulong nga Efraim sa Hebreo sa bersikulo 8 kag 14. Tan-awa ang footnote sa 4:17.} nagasalig sa mga butang nga wala sing pulos. Ang ginalagas nila sa bilog nga adlaw amo ang mga butang nga makahalit sa ila. Nagadugang ang ila pagbinutig kag pagpamintas. Nagahimo sila sang kasugtanan sa Assyria kag sa Egypt, amo gani nga nagadala sila sang lana sa Egypt bilang regalo. 2 May akusasyon man ang Ginoo kontra sa mga taga-Juda nga mga kaliwat man ni Jacob. Silutan niya sila suno sa ila mga pamatasan; balusan niya sila suno sa ila mga hinimuan. 3 Sang ara pa lang ang ila katigulangan nga si Jacob sa tiyan sang iya iloy, gusto na niya nga labawan ang iya kapid. ^{▼▼gusto…kapid: sa literal, gin-uyatan niya ang tikod sang iya utod.} Kag sang nagdako na siya, nagpakigdumog siya sa Dios 4 paagi sa pagpakigdumog sa isa ka anghel, ^{▼▼anghel: ukon, pinadala sang Dios} kag nagdaog siya. Nagahibi siya samtang nagapangayo sang bendisyon sa anghel. Nakita niya ang Dios sa Betel, kag didto nagpakighambal sa iya ^{▼▼iya: Amo ini sa Septuagint kag sa Syriac. Sa Hebreo, aton.} ang Dios. 5 Siya ang Ginoong Dios nga Makagagahom; Ginoo ang iya bantog nga ngalan.

6 Gani kamo nga mga kaliwat ni Jacob, magbalik na kamo sa inyo Dios, kag ipakita ninyo ang gugma kag ang hustisya. Kag padayon kamo nga magsalig sa inyo Dios.

Ang Dugang nga mga Akusasyon Batok sa Israel

7 Mahilig mangdaya ang inyo mga negosyante; nagagamit sila sang indi husto nga kilohan. 8 Nagapabugal pa kamo nga mga taga-Israel, “Nakatipon kami sang manggad kag puwerte na kami ka manggaranon. Wala sing may makaakusar sa amon nga nakatipon kami sang manggad sa malain nga paagi, kay sala ina nga buluhaton.”

9 “Gani ako, ang Ginoo nga inyo Dios nga nagpaguwa sa inyo sa Egypt, magapaestar liwat sa inyo sa mga payag, pareho sang ginahimo ninyo sa panahon sang Piesta sang Pagpatindog sang mga Payag. ^{▼▼Tan-awa ang Lev. 23:41-43.}

10 “Nagpakighambal ako sa mga propeta kag ginhatagan ko sila sang madamo nga palanan-awon. Paagi sa ila ginpaandaman ko kamo nga malaglag kamo.” ^{▼▼ginpaandaman…kamo: ukon, ginsugiran ko kamo sang mga paanggid.}

11 Pero sa gihapon ang katawhan sang Gilead mga malain kag wala gid sing pulos, kag ang katawhan sang Gilgal nagahalad sang mga turo nga baka sa mga dios-dios. Sigurado gid nga pagagub-on ang ila mga halaran kag mangin pareho ini sa mga tinumpok nga mga bato nga ginpanguha sa gin-arado nga duta.

12 Nagpalagyo si Jacob sa Aram, ^{▼▼Aram: isa ka lugar sa Mesopotamia.} kag didto nagserbisyo siya bilang manug-atipan sang mga sapat para maangkon niya ang iya pangasaw-on. 13 Paagi sa isa ka propeta, ginpaguwa sang Ginoo ang mga Israelinhon sa Egypt kag gin-atipan. 14 Pero ginpaakig gid nila ang ila Ginoo tungod sang ila pagpamatay, gani silutan niya sila. Balusan niya sila sang ila pagpakamalaot sa iya.