Psa 110 | HilAPD | STEP | Ang kanta nga ginsulat ni David. Nagsiling ang Ginoo sa akon Ginoo, “Pungko diri sa akon tuo hasta mapaidalom ko sa imo ang imo mga kaaway.”

‏ Psalms 110

Ang Ginoo kag ang Pinili Niya nga Hari

Ang kanta nga ginsulat ni David.

1 Nagsiling ang Ginoo sa akon Ginoo, ^{▼▼Ginoo: ukon, agalon (nga amo ang hari). Ini nga bersikulo gin-aplikar sa kay Cristo sa Bag-o nga Kasugtanan (tan-awa ang Mat. 22:41-44; Mar. 12:35-37).}
“Pungko diri sa akon tuo hasta mapaidalom ko sa imo ang imo mga kaaway.”

2 Halin sa Zion, ^{▼▼Zion: ukon, Jerusalem} palaparon sang Ginoo ang imo ginharian,
kag magagahom ka sa imo mga kaaway.
3 Sa adlaw nga magpakig-away ka sa imo mga kaaway,
magabulig sa imo sing kinabubut-on ang imo katawhan.
Ang imo pamatan-on nga mga katawhan magakadto sa imo sa balaan nga mga bukid
pareho sa tun-og sa kaagahon. ^{▼▼Indi klaro ang buot silingon sang Hebreo sa sini nga bersikulo.}
4 Nagsumpa ang Ginoo, kag indi gid magbaylo ang iya hunahuna,
nga pari ikaw hasta san-o, pareho sang pagkapari ni Melkizedek. ^{▼▼Tan-awa sa Gen. 14:17-20.}
5 Ang Ginoo ara sa imo tupad;
pagalaglagon niya ang mga hari sa tion nga ipakita niya ang iya kaakig.
6 Pagasilutan niya ang mga nasyon kag madamo ang iya pamatyon.
Pagalaglagon niya ang mga nagadumala sa bilog nga kalibutan.

7 Ikaw, Mahal nga Hari, ^{▼▼Ikaw, Mahal nga Hari, magainom: sa Hebreo, magainom siya. Suno sa iban nga mga eksperto sa Biblia, ang “siya” amo ang Ginoo (tan-awa sa bersikulo 6). Pero ang kalabanan sa ila nagasiling nga ang “siya” amo ang hari nga ginasiling sang bersikulo 1-5b.} magainom sa ililigan sang tubig nga ara sa higad sang dalan,
gani magabalik ang imo kusog kag magamadinalag-on ka.