John 6

Hǝɓang Yeeso fiya haru kumnggit tuf

1A kwasamadghǝn, tǝɗangga Yeeso wuri aam Nggalili teena na nda aarha wuri aam Tibariyas. 2Fiya hangga mbuwa samadghǝn ƙǝsǝr nanda ǝnwulteengya ƙǝnang nǝn fingya mbuwa wa ƙǝkanglang. 3Tǝrgha Yeeso wumnda sǝ tsauka hai tǝ fatsahayighǝn a thlǝmadghǝn. 4Wutsǝfayid Yahudaya yi tǝɗaarha nduwusɗa ɓa.

5Ƙǝlana Yeeso ɗǝ na fiya nǝn hangga a ɓarha thlǝmadghǝn ɓa, tsahang mee nǝn Filibus, “A yanggi nǝm hii mburodi ɓa nǝm fǝrang nda nafiniya kii nda?” 6Tsahangna Yeeso mee Filibus kee ka a ƙǝƙǝranggǝn, ƙǝsǝr ˈwaɗǝ teena sǝnɗǝ ˈya nǝn a ǝnaarha. 7Nggǝrangga Filibus sǝ, “Ai ko wuɗǝɓǝl rapathlaarha yi ɓeena haru sǝri mbǝ heng mburodi ɓa na a walgha kowunni ngguchit ǝnagha mii wa!” 8Tǝrgha tal a hur fatsahayighǝn na thlǝmnggǝn Andrawus, wanman Siman Mbiturus ndǝghǝn, 9“Kulo wundakhnee ya tǝ mburodi tuf ǝnana nda tǝ humbad wan hwaliirha na nda aarha mbale, tǝ tǝna nggun-ngguchit sǝri, amma ma nǝn ǝnang nda fiya hangga kiya?”

10Ndangga Yeeso fatsahayighǝn, “Ndaman fiya tsawa nda hai.” Na hwaliiya sǝ a mbǝɗi tsawa nda sa hai, hǝshya ǝnanda haru kumnggit tuf. 11Tǝrgha harangga Yeeso mburodi yina sǝ usa Faara nǝn, ndǝghang nggǝnda fiya ɗǝ tsauka hai. Ənagha kee ƙǝm tǝ tǝnɗi. Kowunni ǝnagha mii ƙǝla na midghǝn. 12A kwasamadɗi ǝnana fiya mii nggal nda, ndangga Yeeso fatsahayighǝn, “Wuma man katǝbghǝn ɓa a sǝb ˈya ɗǝ wa.”

13Nanǝn kee wumangga fatsahayighǝn katǝbɗa ɓa lǝɗanggǝn kutasya kum kap sǝri, wato kukutethla mburodi ɗi tuf ǝnana nda tǝ humbarha kiina fiya. 14A kwasamadɗi nana fiya ǝnwulten ɗi ǝnana Yeeso, katǝrang ngganda ndaarha hai, “Ƙǝkafek Annabi ɗani ya na a ɓaarha hu ƙǝshiirha ɓa.” 15Ƙǝlana Yeeso hai na mindan sǝ tǝta a faɗang ngganda kutǝra, ngǝrgha hai nggǝrghǝn tǝra wumnda sǝ katenggǝn.

Wii Yeeso a ten aama

16Tsǝna figrha hai, ɗǝgha fatsahayighǝn a mii wuri aamɗa ɗǝ. 17Kya nda a hu kombuwol hai katǝrang ngganda tǝɗang aamɗi teena ka a ɗǝnda Kafarnahum ɗǝ. Wula a tsǝrha hai Yeeso kula wutta ɓa. 18Tǝrgha thliigha ɓereurha ɓa nagha tsang ˈya aamɗa fa. 19Hur nanda kombuwol ɗaɗǝ mel mahan nduwa faɗa, ƙǝla nda hai Yeeso a wiirha a ten aama, ɓayi thlǝmad kombuwol ɗa ɓa, tǝrma nda. 20Amma ndanggǝn kanda, “Nggini; a tǝrǝmɗun wa.” 21Tǝrgha Fatsahayini na mindan sǝ a kyangganda a hu kombuwol ɗa hai, amma ƙǝla nda hai tsu kee sǝl nda a mbǝɗaɗǝ na mindan ɗǝrha saaɗǝ.

Kaɗa fiya Yeeso

22Ɗalthna mbǝrha hai fingya fiya wumngga hai a pǝm wuri aamɗi ƙǝla nda hai kwambuwol tal ɓagha mbǝɗa ɓa kee, Yeeso ƙǝm kyawa a hur kombuwol ɗa hai tǝ fatsahayighǝn wa, amma wiigha fatsahayighǝn katen ndan. 23Kombuwolya hangga ɓagha ɓa a Timbariyas, isha nda hai tsau tǝ mbǝɗi kiina fiya mburodi ɗa sǝ a kwasamadɗi usana Chinǝm Faara. 24Ƙǝlana fiya ɗǝ wumngga hai nawa nda Yeeso wa, nduwa fatsahayighǝn a mbǝɗi wa, kya nda hu kombuwolyina hai, ɗǝnda Kafarnahum ɗǝ ka a kaɗa Yeeso nda.

Yeeso ni mburodi yi fǝr yibrha

25Ɗǝna fiya walghǝn a pǝm wuri aamɗi, tsahang mee nda, “Mala, a kwan ɓana mbǝɗa ɓa ya?”

26Nggǝrangga Yeeso kanda sǝ, “Niya pǝrang ƙǝkafek kun, nuwun a kaɗa nggi, mbǝ ka sǝnang nun ǝnwulteengya hai wa, amma ka kii nun mburodi ɗi nggal ɗun. 27A ǝnaɗun taara ka ǝnnarhami na a sǝbrha ɗǝ wa, amma ǝnama taara yi ǝnnarhami na fǝr yibrha mbuwa ngwalaarha, na Wan Niifa a fǝrang kun. Ƙǝsǝr Faara, na Chinɗi ndǝn fǝrangga kwaman fǝr yibrha.” 28Tǝrgha tsahang mee nda, “Ma nan ǝnaarha na a tǝranggan hur Faara sǝ?”

29Nggǝrangga Yeeso kanda sǝ, “ˈYa tǝtal ni kee na mid Faara a ǝnon, fǝrama ƙǝkafek a niifɗi thlǝn nǝn ɓa.” 30Ndangganda, “Kyaɗang ǝnwulteena kan ana midwa sǝ fǝro ƙǝkafek nan. Mana a ǝnaarha? 31Chichiyi nan kin nda manna a kaheerha, ƙǝla nanǝn chichirethlee hai: ‘Fǝrang ɗǝ mburodi kanda a talara hai a ǝna nda mii.’” 32Ndangga Yeeso kanda, “Niya pǝrang ƙǝkafek kun, mbǝ Musa ni fǝrangga mburodi ɗi kun na a talara hai wa, amma na Pǝpa naarha fǝrang ka mburodi kun hai a talara. 33Ka mburodi yi Faara ndǝghǝn ni ɓagha hai a talara, na fǝr yibrha a ƙǝshiirha.”

34Ndangganda, “Paɓa, no naarha fǝrang tur mburodi ɗi kan ya ƙǝtsar!”

35Tǝrgha Yeeso nggǝranggǝn kanda sǝ, “Nggini mburodi yi fǝr yibrha. Kala niifa ɓagha thlǝmanna ɓa mbǝ miirha nggǝr ƙǝsghǝn wa, kala niifa fǝrgha ƙǝkafek tǝ nggi ɓalwa hushimnda ƙǝsghǝn wa. 36Amma ƙǝla pǝrang ni kun, naɗun nggi, ta weeri ɗaɓa ya ɓalwun kula fǝr ƙǝkafek. 37Kala nafiya fǝree na Pǝpa na nda ɓaarha thlǝmanna ɓa, nggi ƙǝm mbi tam kar kanda wa. 38Ƙǝsǝr ɓayi hai a talara mbǝ ka ǝna tar altenna ni wa, amma ka ǝna tar ɗa ni na mid Faara thlǝngga nggi ɓa. 39Ənɗani na mid niifɗi thlǝngga nggi ɓa ya, a sahad tal a hur nafini fǝree nǝn ɓa wa, amma a thlenggi kanda sǝ tǝ yibrha a far ngwala ƙǝshiirha. 40Ƙǝsǝr ˈya na mid Pǝpa ndǝna kala niifa ƙǝlangga Wanɗa ɗǝ fǝr ƙǝkafek nǝn tǝghǝn, nǝn a wal yibrha mbuwagha ngwalaarha, tǝ ƙǝm ni a thleng sǝ a far ngwala ƙǝshiirha.”

41Tǝrgha Yahudayini katǝrangganda huhurumnda hai a tenggǝn ƙǝsǝr ndanǝn, “Nggini mburodi yi fǝr yibrha ɓagha hai a talara.” 42Nda nda “Kamshiɗi ya mbǝ Yeeso ɗani na wan Yisufu, sǝn nǝm nda man tǝ chin ya wa? Ƙǝƙǝn nǝn ndaarha, ‘Ɓaghǝn hai a talara’?”

43Nggǝrangga Yeeso kanda sǝ, “Malaman huhurumnda a pathlang nun. 44Mbǝ niifa sǝ na ɓaarha thlǝmanna ɓa wa ƙǝl Pǝpa thlǝngga nggi puwangga thlǝmanna ɓa, nggi ƙǝm niya thleng sǝ a far ngwala ƙǝshiirha. 45Nǝghǝn chichirethlee hai a hu ɗeleewarya Annabiya: ‘Kanda heu Faara ni a tsahang kanda ha.’ Kala niifa kangga thlǝmaarha Chinɗa fa, tǝ ƙǝm tsahagha a haarghǝn, nǝn ɓarha thlǝmanna ɓa. 46Mbǝ niifa sǝ nagha Chinɗi wa, ƙǝl niifɗi ɓagha hai a thlǝmad Faara, ndǝn nagha Chinɗi. 47Niya pǝrang ƙǝkafek kun, kala niifa fǝrgha ƙǝkafek nǝghǝn tǝ yibrha mbuwagha ngwalaarha. 48Nggini mburodi yi fǝr yibrha. 49Chichiyinun kin nda manna a kaheerha, amma mǝr nda heu. 50Amma kulo mburodi yi fǝr yibrha ya ɓagha hai a talara, kala niifa kiigha mbǝ mǝra wa. 51Nggini mburodi ɓagha hai a talara yi fǝr yibrha. A kii niifa mburodi ɗiya, nǝn a tsaurha pa kwanɗǝ. Mburodi ɗiya thlu fadna ni, niya fǝra tǝna ƙǝshiirha wal yibrha.”

52Tǝrgha Yahudayini katǝrangganda ngaala hai a pathlang ndan aten ǝnɗi ndanǝn tsakh mee nda, “Ƙǝƙǝn na niifɗi fǝrang thlu fadghǝn ƙǝmya kim?”

53Ndangga Yeeso kanda, “Niya pǝrang ƙǝkafek kun, a kiiwun thlu fad Wan niifa tǝ ƙǝm sa farghǝ nun wa, mbun wal yibrha mbuwa ngwalarha wa. 54Kala niifa kiigha thlu fadna tǝ sa farna, nǝn tsaurha tǝ yibrha fa mbuwa ngwalaarha, niya thleng kanda sǝ a far ngwala ƙǝshiirha. 55Ƙǝsǝr thlu fanna ka ǝnnarhami ni, farna ƙǝm ka ǝn saarha ni. 56Kala niifa kiigha thlu fanna tǝ sa farna, nǝn naarha a hurna nggi ƙǝm a hurghǝn. 57Ƙǝla na Chinɗi tǝ yibrha thlǝngga nggi ɓa, ƙǝsǝr ka ndǝghǝnni nani tǝ yibrha, nǝghǝn kee ƙǝm, kala yanɗi na a hǝbrha a fanna, ƙǝsǝr ka nggi, nǝn wal yibrha. 58Yanɗiya ndǝna mburodi ɗi ɓagha hai a talara, kala niifa kiigha mburodi ɗi ya nǝn wal yibrha pakwanɗǝ. Mbǝ tur mburodi ɗani kiina chichiyi nun wa, ko nanǝn kee mǝr nda ɗǝ.” 59Thlǝkka Yeeso ǝnggini ya heu ya a hu sayidɗi nanǝn a tsaharhaha a hu ƙǝn tsahad Yahudaya na a Kafarnahum.

Fatsahaya hangga mal nda Yeeso

60Sǝkna fa tsahayighǝn ndǝn kee, ndanda, “Tsahadɗa ha ya nǝghǝn pǝɗaghǝn kaan. Wunni mbang kang thlǝmaarha fa?”

61Sǝn Yeeso sǝ na fatsahayighǝn a huhurumnda, ndanggǝn kanda, “Tsahadɗa ha ya sǝɓang nǝn hur nun ɗǝ wa? 62Ma nun a numarha a naɗun Wan Niifa a tǝra a mbǝɗaɗǝ ɓanǝn sa ɓa? 63Sǝsǝna katenggǝn ni kee na fǝr yibrha; mbǝ ˈyasǝ na thlu farha mbang ǝnaarha wa. Palthɗi thlǝghang ni kun Sǝsǝna ni tǝ ƙǝm yibrha. 64Amma a hur nun na fingya sǝ fǝrwa wa ƙǝkafek tǝ nggi.” (Ƙǝsǝr Yeeso sǝnɗǝ fingya fǝrwa ƙǝkafek tǝghǝn, tǝ ƙǝm sǝnɗǝ niifa na a fǝrghǝn ka a ɓǝlang ngganda.) 65Ɗǝgha mbeeɗǝ tǝ ndaarha, “Ndǝghǝn ɗani ndang ni kun mbǝ niifa sǝ na ɓaarha thlǝmanna ɓa wa, ƙǝl a fǝre Pǝpa kanda.”

66Ƙǝsǝr ka palthɗi thlǝkna Yeeso ya, fa takkwayighǝn hangga malang ngganda mbu samadghǝn.

67Tǝrgha tsahangga Yeeso mee kum kap sǝriɗi, “Kun ƙǝm na minnun sǝ wiirha wa?” 68Nggǝrangga Siman Mbiturus sǝ, “Chinǝm, a ɗan thlǝma wun ɗǝ? Sa ni na tǝ laɓar yibrha ha mbuwagha ngwalaarha. 69Fǝr ɗan ƙǝkafek tǝ ƙǝm sǝnɗansǝ sa ni tǝ Peɗǝnda yi Faara.”

70Tǝrgha Yeeso nggǝranggǝn sǝ, “Nggi ndǝn wurgha kun kum kap sǝri. Amma tal a hur nun Sheetan ni.” 71Nǝghǝn a thlǝk laɓar Yahuda, wan Siman Iskaryoti, tal a hur kum kap sǝri ɗi, na a fǝrghǝn a ɓǝlang ngganda.