Matthew 22

Karapu aten wutsǝfayid kakhrha

(Luka 14:15-24)

1Nggǝrgha Yeeso pǝrang laɓara kanda tǝ karapu, ndǝghǝn, 2Kutǝryid talara nǝghǝn ƙǝla kutǝra ngwaghafa ka ǝna wutsǝfayid kakhrha nǝn a wanggǝn. 3Thlǝnanggǝn mafayighǝn ɗǝ a mbu nafiya nda ɓa, amma kar nafini ɓarha fa ɓa. 4Tǝrgha nggǝrghǝn thlǝn fingya mafaya ɗǝ tǝ ndaarha, “Ndaaman nafini mbu ni, ngwaɗi wutsǝfayidɗa fa, thleeɗi urad thlaaya na ndǝndaura tǝ kwelya, ngwaɗi fa, ɓa ma ɓa ƙǝkar. 5Amma nafini mbu nǝn ɗǝf wanda teena sǝ wa, tal ɗǝgha heeɗǝ, tahadghǝn ƙǝm ɗǝgha ka ǝna shafilidghǝn ɗǝ. 6Fingya ƙǝsang ngganda mafayighǝn hai, ɗǝk kanda nda tǝ kǝm ɓǝllang ngganda kanda. 7Hufgha kutǝrɗa hur kaan. Thlǝnanggǝn sodjayighǝn ɗǝ ɓǝllang ngganda faɓǝlfayini tǝ kǝm njang ngganda wupǝri ndan ɗǝ. 8Tǝrgha ndanggǝn mafayighǝn, ʻNgwala ngwa wutsǝfayid kahadɗa fa, amma nafini mbu nǝm ɓa mbǝ kanda ni kamngga a ɓa nda ɓa wa. 9Nanǝnya, ɗaama hu kwaman hu wuraya ɗǝ mbu fiya nun ɓa kala niifa nanun ɓa nda hu wutsǝfayidɗa ɓa.’ 10Nanǝn kee, ɗǝgha mafayini ahu kwaman hu wuraya ɗǝ mbu ka nafiya nda ɓa na nanda tǝ ndǝrwaya, lǝghǝdgha ƙǝn wutsǝfayid kahadɗi tǝ rongya.

11Amma kyana kutǝr ɗa ɓa ka ɓagha na ronggi ni mbunǝn ɓa, na niifa nǝn kalwawa kari yi wutsǝfayid kahadɗi. 12Tsahang mee nǝn, ‘Pashinna, ƙǝƙǝn kyana mbǝɗa ɓa ya kula sa kal karid wutsǝfayid kahadɗa fa? Amma mbangwa kamshiɗi nggǝrang sǝ wa. 13Tǝrgha kutǝrɗi ndanggǝn nafiya na ǝnang taara, ‘Ƙǝnaman haarghǝn tǝ sarghǝn muwanggun ƙǝshaaɗǝ ahu wula ɗǝ mbǝɗi nanda a tǝrha tǝ ƙǝt mee.

14“Ƙǝsǝr nafiya hangga aah nanda, amma ngguchit wurna nda hasǝ.”

Tsakhmee aten tii tsamnda a Kaisar

(Markus 12:13-17; Luka 20:20-26)

15Tǝrgha Farisayini wuma nda hai kaɗa kwamana nda a ɗǝfang takthleera nda Yeeso ka a thlǝk ˈya nǝn tǝna nda ƙǝsang nda. 16Thlǝn fatsahayindan nda ɗǝ tǝ nafiya Hirdus ka a tsahang mee nda, ndaa nda “Mala sǝnɗansǝ ka niifa ni sa, na tsahang kwaman Faara fiya ha tǝ ƙǝkafekkirha. Sa kǝm mba wurahasǝ wa. 17Nanǝnya pǝranggǝn kan, mani numad wa aten ǝnɗiya, nǝghǝn mǝmǝl a teng tsamnda nan kaisar wa nduwa awo?

18Amma Yeeso sǝnɗǝ numad mɓǝlfedɗi na a hur ndan, ndagha, “Kun fathlǝrɓuya, kama na mid nun a ɗǝfee takthleera? 19Keɗeema pene tii tsamndǝɗi. Fǝrang pene ɗa nda.

20Tsahang mee nǝn kanda, “Shishingnda wunni tǝ thlǝm wun a tenggǝn?”

21Ndang ngganda, “Yi Kaisar.” Ndanggǝn kanda, “Fǝraman Kaisar ˈya tsauka yi Kaisar, tǝ kǝm fǝraman Faara ˈya tsauka yi Faara.”

22Sǝk nanda kee, ǝna ǝnwulteena nda pa wii fayindan nda.

Tsakhmee aten thliirha sǝ ahu mǝrra tǝ kakhrha

(Markus 12:18-27; Luka 20:27-40)

23Tsu a farɗi fingya Sadukiyaya ndagha mbǝ thliirha sǝ hu mǝrra wa ɓa nda thlǝmad Yeeso ɓa tǝ tsakhmee. 24Ndang ngganda, “Mala, ndangga Musa kan, ‘A mǝr wan man niifa malɗǝ nukkun hai kula nggǝtta, na wan man tǝrangsǝ hu langaarha ka a nggǝɗanggǝn sǝ.’ 25Nanǝnya, na nafiya sǝ mǝd a wan manggi. Tǝ pamǝnda kakhka mǝrgha kula wal wee, tǝrgha yi sǝri tǝranggǝn nuɗasǝ. 26Amma wan man yi sǝri mǝrgha ƙǝm, yi mahan wai kee har ta ten yi mǝd ɗǝ. 27Akwasamadghǝn, nuɗi ƙǝm mǝrgha. 28Nanǝnya, a hu thliirha sǝ a hu mǝrra na nuɗi tsaurha yi wun tsaunǝn kanda heu mǝd, tǝrang nda nuɗasǝ?”

29Nggǝrangga Yeeso kanda sǝ, “Numad nun mbǝ mǝmǝl wa ƙǝsǝr sǝnggun laɓar Faara tǝ sǝsǝmnɗǝghǝn wa. 30Ahu thliirha sǝ hu mǝrra mbǝ nishya tǝ hǝshya kakhrha wa. Nanda tsaurha kǝla fathlǝngya Faara a talara. 31Amma aten thliirha sǝ hu mǝrra, karantanggun ˈya ndang na laɓar Faara kun wa? 32‘Nggini Faara yi Ibrahim, Faara yi Ishaku, tǝ kǝm Faara yi Yakubu’. Mbǝ Faara ni yi mǝrya wa, amma yi fayibya ni.”

33Sǝkna fiya ndǝn wumngga hai, ǝna ǝnwulteena nda tǝ tsahayighǝn ha.

Ngyakhrha na manggǝn

(Markus 12:28-34; Luka 10:25-28)

34Amma sǝkna Farisayini tǝ ndaarha nggǝlangga Yeeso mii Sadukiyayini tǝ laɓaara nggǝrang nǝn kanda sǝ, wuma nda hai ka a nggǝra nda tsahang mee. 35Tal a hurndan, tǝ sǝn ngyakhrha, na midghǝn sǝ ɗǝfang takthleera nǝn tǝ tsakh miiɗi ya: 36“Mala yanggini manggǝn ahur ngyakhkya heu?”

37Nggǝmangga Yeeso, “Nggǝmu Chinǝm Faarwa tǝ hurwa heu, tǝ shingnduwa heu tǝ huten wa heu. 38Yanɗiya ndǝna katǝra ngyakhrha na mam. 39Yi sǝri ƙǝm nǝghǝn manggǝn: ʻNggǝmu tuladwa ƙǝla altenwa. 40Ngyakhrha na heu tǝ tsahad annabiya na nda aten ngyakhkini sǝri.”

Tsakh mee aten Almasihu

(Markus 12:35-37; Luka 20:41-44)

41Wumna Farisaya hai tsahangga Yeeso mee kanda, 42“Mani numad nun aten Almasihu? Wan wunni?”

Ndang ngganda, “Wan Ndauda ni.”

43Nggǝrangga Yeeso kanda sǝ, “Ƙǝƙǝn na Ndauda tǝ sǝsǝmnda Sǝsǝna aaghǝn ‘Chinǝm’? Ƙǝsǝr ndagha Ndauda,
44Ndangga Chinǝm yina China:
‘Tsawu a yisǝmanna,
ƙǝl a tsawangɗi fatsanggiwa
a kamu saryiwa. 45Ana Ndauda a aah Almasihu ‘Chinǝm,’ ƙǝƙǝn nǝn tsaurha wanggǝn?”

46Mbǝ niifa sǝ mbangga nggǝrang sǝ wa, ka farɗi mbǝ niifa sǝ ndengga yidghǝn nggǝrghǝn tsahang mee wa.