Mat 24 | HwoSC | STEP | Nana Yeeso a mal Ƙǝn Faara na a Urshalima, kyaɗangga fatsahayighǝn tur tǝngya Ƙǝn Faara.

Matthew 24

Əngya na a katǝrarha hai a mii ngwala ƙǝshiirha

(Markus 13:1-2; Luka 21:5-6)

1 Nana Yeeso a mal Ƙǝn Faara na a Urshalima, kyaɗangga fatsahayighǝn tur tǝngya Ƙǝn Faara. 2 Amma nggǝranggǝn kanda sǝ, “Naɗun tur tǝnggini na heu ya? Niya pǝrang kǝkafek kun, mbǝ feera sǝ ko tǝtal na nda a mala aten shadghǝn wa, kahad nanda chang nda kanda hai!”

Katǝra sǝsaarha

(Markus 13:3-13; Luka 21:7-19)

3 Tsǝɓaku na Yeeso tsau a ten ɗǝfya wumnda Dzaitun, ɓagha fatsahayighǝn thlǝmadghǝn ɓa ɓǝɓee ndang ngganda, “Pǝranggǝn kan a kwan na ǝnggini katǝrarha hai ya? Mani a tsaurha ǝnsakhrha wuttuwa ɓa tǝ ngwala mii ƙǝshiirha?”

4 Ndangga Yeeso kanda, “A nggǝmɗun fa kala niifa nggaɓa kun nǝn wa, 5 ƙǝsǝr nafiya hangga na a ɓarha ɓa tǝ thlǝmna, na nda a ndaarha, ‘Nggini Almasihu,’ har na nda nggaɓa fiya hangga. 6 Nun a sǝk laɓar yangya, tǝ mii ndaama aten yangya, amma a tǝrǝmɗun wa, tsauɗǝ tǝtani a katǝragha ǝnggini hai, amma ɓawa mii ngwaladghǝn ɓa ˈwan wa. 7 Na tur a thleng tur fa tǝ yanda, na kutǝryirha a thleng kutǝryirha fa. Na miirha a narha sǝ tǝ rǝprha ƙǝshiirha fa a mbǝya ɗǝɗamǝn-ɗǝɗamǝn. 8 Amma heu ǝngginiya katǝra mii sǝsarha ni kee.

9 “Na nda a ƙǝsang nda kun, sǝsang ngganda kun tǝ kǝm ɓǝlang ngganda kun. Ƙǝshiirha heu na nda kar kun ƙǝsǝr ka thlǝmna. 10 Fiya hangga na a mal fǝr ƙǝkafekkid ndan, na nda a fǝr ndan tǝ kar ndan. 11 Na annabiya fa nggaɓaya a kyarhaɓa hangga, nggaɓa fiya nda hangga. 12 Na mbǝlfeerha a mulgha hai, nggǝm ndan nǝn a tsaurha shishiu. 13 Amma kala niifa ƙǝrǝsgha ta mii ngwaladghǝn ɗǝ nǝn a hǝrǝkrha. 14 Laɓarɗi na Mbǝnggǝn yi kutǝryid Faara na nda a pǝrghǝn kahad hu ƙǝshiirha, ƙǝsǝr ka sǝkka talya ndǝn; a mbǝra ɓagha mii ngwaladghǝn ɓa.

Na Ƙǝn hwan Faara a sǝbrha ɗǝ

(Markus 13:14-23; Luka 21:20-24)

15 “Nun a naa ǝn tsanda na rǝk fiya, ƙǝt hu Ƙǝnna na Chahal ƙǝla ndaana annabi Ndaniyel. (Ngwa walangga tǝ karatarha), ^{▼▼Tar fathlǝngya 16:13; Ndaniyel 9:27; 11:31; 12:11} 16 “Tǝrgha nafiya na ahur Yahudiya tǝtani ɗanda wumngya ɗǝ. 17 Niifa na ten ƙǝnna a ndaa ɗǝ nǝn a tǝra hai ɗǝgha tǝr ˈya a wuri wa. 18 Niifa na hee a ndaa ɗǝ nǝn wutta wure ɗǝ ɗǝgha tǝrang kootodghǝn ɓa wa. 19 Nǝn a tsaurha ǝn kawa a nishya na hur tǝ nishya na tǝ waya ƙǝsǝr a hu sayidɗi! 20 Hwanama Faara mana ɗadɗi a sayid mbiirha nduwa afar yibrha Yahudaya wa. 21 Ƙǝsǝr a farɗi na sǝsarha sǝ kaan ˈwawagha tam naarha sǝ kee ka far katǝra ƙǝshiirha ta weeri ɓa ya wa, mbǝ turghǝn a nggǝr naarha sǝ ɓalwa. ^{▼▼Ndaniyel 12:1; Sǝsǝnid Yahaya 7:14} 22 A mbǝ thlaghang nanda ɓenggina haaɗǝ ya wa, mbǝ niifa sǝ na a naarha tǝ yibrha wa. Amma ƙǝsǝr ka nafiya wurna Faara ndǝn nanda thlahang ɓenggina haaɗǝ.

23 A hu sayidɗi a ndang niifa kun, ‘Kuloɗǝ, kulo Almasihu ɗiya!’ Nduwa ‘Kulo ndǝghǝn taarha! A fǝrna ƙǝkafek sǝ wa. 24 Ƙǝsǝr na fanggaɓaaya Almasihu sǝ tǝ fanggaɓaaya annabiya a kyarhaɓa, na nda a ǝna ǝnsakhkya mǝmanggǝn tǝ ǝnwuteengya ka a nggaɓa fiya nda har tǝ fingya wurna nda anaɗǝ a ǝnaarha hai.

25 Ƙǝlama hai, ˈWaɗi teena yanangɗi kun ƙǝtǝm.

26 “Nanǝn kee a ndang niifa kun, ‘Kulo ndǝghǝn taarha a kaheerha,’ a kyaɗun ƙǝsha ɗǝ wa; nduwa, ‘Kulo ndǝghǝn a hur ƙǝnna ya,’ a fǝrɗun ƙǝkafek sǝ wa. 27 Ƙǝsǝr ƙǝla na ˈyaara kyatta a man kyat faara nǝn djaara hai ta man hǝmndǝghǝn ɗǝ, nanǝn kee na wutta Wan niifa ɓa a narha kee. ^{▼▼Luka 17:24; Matta 8:20}

28 Mbǝrha nana mǝrra sǝ, a mbǝɗani na sǝkhɗiya wumnda sa hai.

Wutta Wan niifa ɓa

(Markus 13:24-27; Luka 21:25-28)

29 “Akwasamad sǝsadɗi ya,
“‘Na yanfaara a tsaurha wula,
ndǝree ƙǝm mbǝ a kyat kukwaryirha wa.
Na wufǝlngarya mukrha hai a fǝrakh-amshi,
ǝngya na mǝmanggǝn na talara nanda tsǝˈyafa.’ ^{▼▼Ishaya 13:10; 34:4; Ezikiyel 32:7; Djoyel 2:10,31; Dzafaniya 1:15; Sǝsǝnid Yahaya 6:12, 13; 8:12}

30 “Ahu sayidɗi na nda a na ǝnsakhrha a fǝrakh-amshi yi Wan niifa. Nafiya ƙǝshiirha heu nanda tǝrha ka hǝreenga. Nanda a na Wan niifa ɓayi a hu hashmbe a fǝrakh-amshi hai, tǝ sǝsǝmnda tǝ mamnggirha kaan. 31 Nǝn a thlǝn fathlǝnggighǝn ɓa tǝ pi kodwomnda, na nda wumang nafighǝn ɓa na wuwura hu kudma faɗa na ahu ƙǝshiirha.

Tsaharhaha a ten ɗǝf shiɓarha

(Markus 13:28-31; Luka 21:29-33)

32 “Nanǝnya tsahama ˈya a fat shiɓadɗiya, ana wuhwaryighǝn a kyaharra hai, nǝn a tsǝtsǝtta, nun sǝndasǝ nduwus fegrha ɓa. 33 Nǝghǝn kee kǝm, anaɗun ǝnggini heu ya, nun a sǝnda sǝ nduwus wuttǝghǝn ɓa, nǝghǝn a mii kwatminda fa. 34 Niya pǝrang kǝkafek kun, nafiya ƙǝshiidɗiya mba nda mǝra wa, kǝl ma katǝra ǝnggina hai ya. 35 Nda talara tǝ hweeɗe na nda a ngwalarha hai amma Laɓarna mbǝ tam ngwalarha hai wa.”

Mbǝ niifa sǝ sǝngga far ɓad Almasihu ɓa wa

(Markus 13:32-37; Luka 17:26-30,34-36)

36 “Mbǝ niifa sǝ sǝngga farɗi, nduwa sayi na ǝnggini a katǝrarha hai ya wa, ko fathlǝngya Faara na talara nduwa Wanggǝn tafadghǝn wa, ƙǝl Chin katenggǝn. 37 Ƙǝla katǝra nǝn hai a thlakh mbǝd Nuhu, nǝn a naarha kee a far wutta Wan niifa ɓa. 38 A faryini kapa na aam afa-afa ɗi ɓarha ɓa, fiya a hǝbrha tǝ saarha, kanda kakhrha tǝ fǝr wanggindan chimarha ɗǝ, ta farɗa ɗǝ kyana Nuhu hu kombuwol hai. 39 Sǝngwanda ˈya na katǝrarha hai wa, har ɓana aam afa-afa ɗaɓa hwanggǝn kanda ɗǝ. Nǝn a naarha kee a far wutta Wan niifa ɓa. 40 Nafiya sǝri a ǝna taara kyab a hee, na nda tǝr tal mal tahadghǝn nda. 41 Nishya sǝri a hǝrha ahu fǝna, na nda tǝrang nda tal mal tahadghǝn nda.

42 Tsaunǝn kee, tsawama nggungwa fa, ƙǝsǝr sǝnggun farɗi na Chinun a ɓarha ɓa wa. 43 Amma a sǝnunsǝ: A ndam na turi ɗi a sǝn farɗi na ngaara a ɓarha ɓa a fiɗikrha, kam mbǝ a shiirha malanggǝn ngaarɗi kyagha minda keeghǝn hai wa. 44 Nanǝn kee tsawama nggugwafa, ƙǝsǝr na Wan Niifa a ɓaarha ɓa a sayidɗi sǝngwawa nun sǝ. ^{▼▼1 Tasalonikaya 5:6}

Ka niifa tǝ ndǝdwid niifa

(Luka 12:41-48)

45 “Wunni mafadɗi na tǝ ƙǝkafek fa, ɗǝfang na turighǝn tǝkǝla wurighǝn ha, na fǝrang ǝnnarhami fingya mafaya ahu sayidɗi kamngga? 46 Nǝn a naarha ngga a fad mafadɗi a wud turighǝn ɓa ɓagha walghǝn a ǝna targhǝn. 47 Niya pǝrang kǝkafek kun, nǝn a ɗǝfang nda tsauka mam a ten karidghǝn heu. 48 Amma a ndam mafadɗi tǝ mbǝlfeerha ni, nǝn a ndang nda altenggǝn, ‘Turina mbǝ a wutta ɓa wet wa.’ 49 Tǝrgha katǝranggǝn ɗǝk fingya mafaya hai, ndǝghǝn a hǝbrha tǝ sarha tǝ fingya na a nggal mbalya, 50 a ǝnaɗǝ kee na turighǝn a wutta ɓa a hu sayidɗi tǝ farɗi sǝngwawa nǝn sǝ. 51 Nǝn a kyathlang nda ɗǝ ɗawal-ɗawal tǝ kǝm fǝrang mbǝrha nǝn a thlǝmad fathǝrɓuya. A mbǝɗi na tǝrha sǝ tǝ ƙǝt mee.