Matthew 25

Karapu aten wutaraya kum

1Tǝrgha ndagha Yeeso, “Kutǝryid talara nǝghǝn ƙǝla wutaraya kum tǝrang nanda patillad ndan ka ɗaa nda wal wutsamnda. 2Tuf ahur wutarayini nurya ni, tuf ƙǝm na nda ndǝndǝl. 3Fingya yini na nurghǝn takhkwa nda fǝɗeerha haɗǝ ka ɗaa nda ira hu patilla yindan hai wa. 4Amma fingyayini tuf na ndǝndǝl takh nda fǝɗeerha haɗǝ ahu ƙǝthlikrha ka patilla yindan. 5Ɓawana wutsamnda ɓa wed, ƙǝsgha ɓeena kanda shii nda ɗǝ.

6A manad fǝɗikrha thlii nda sǝ ka mbeela sǝk nanda. ‘Kulo wutsamnda ya thleema sǝ ɗun hwathlaghǝn fa!’ 7Tǝrgha wutaarayini kum thlii nda sǝ tangsang ngganda patilla yindan. 8Nurya wutaarayini tuf tsahang fǝɗeerha nda wutaarayini tuf na ndǝndǝl, Nan a hwan kun, ‘Ənaman fǝɗeerha kan ha ƙǝsǝr na patilla yinan a mǝra hai.’ 9Amma nggǝrangga fingyayina sǝ, ‘Mbǝ tsǝghang ƙǝm heu wa. Ɗama ɗǝ ɗun hii yinun ɓa.’ 10Wii nanda ka hii fǝɗedɗa ɗǝ, ɓagha wutsamnda ɓa. Tǝrgha fingya yini ngwagha fa kya nda a mbǝd wutsǝfayid kahadɗa ɗǝ, chang ngganda kwakirma.

11Tsǝɓaku sǝlgha fingya yina ɓa ɗǝgha ka hii fǝɗedɗa ɗǝ, isha nda a ƙǝshi na nda a aah farha, ‘Chinǝm! Chinǝm! Inang kwakirma kan hai!’ 12Amma nggǝranggǝn kanda sǝ, ‘Ƙǝkafek, sǝngwi kun wa.’

13Nanǝn kee tsawama nggungwa fa, ƙǝsǝr sǝnggun farɗi nduwa sayidɗi niya wutta ɓa wa.

Karapu aten mafaya mahan

(Luka 19:11-27)

14Tǝ ƙǝm kutǝryid Talara nǝghǝn ƙǝla niifa wiigha tala a mbǝrha ɗǝ inggun. Aah mafayighǝn nǝn ɓa fǝrang ƙǝnaghǝnǝn kanda. 15Fǝrang wuɗǝɓǝl wurirha nǝn yi tal yawarha tuf, yi sǝri fǝrang wuɗǝɓǝl wurirha nǝn yawarha sǝri, mafarha yi mahan fǝranggǝn yawarha tal, kowunni mǝmǝl tǝ ˈya nǝn a mbang. Tǝrgha wii fayighǝn nǝn. 16Yi mafarha thlǝgha wuɗǝɓǝla yawarha tuf ǝna shafili nǝn sǝ wal chikrha nǝn yawarha tuf. 17Yi thlǝgha yawarha sǝri ndǝghǝnggi ƙǝm ǝna shafili nǝn wal chikrha nǝn yawarha sǝri. 18Amma yi thlǝgha yawarha tal wiigha ɗǝgha ra kwaarha ɓǝɓenggǝn wuɗǝɓǝlɗi ki turighǝn sahai.

19Mǝnnǝnha wudgha turi ndan ɓa aah kanda nǝn ɓa a fǝrang kirassa ˈya nda ǝnana nda tǝ wuɗǝɓǝlghǝn. 20Yi mafarha fǝrang nǝn wuɗǝɓǝl wurirha yawarha tuf ɓagha ɓa ndǝghǝn, ‘Turina, fǝrenna wuɗǝɓǝl wurirha yawarha tuf ka a ǝna shafili ni sǝ, walɗi chikrha yawarha tuf atenggǝn.’ 21Falghǝna turighǝn, ‘Usakko ka mafanna. Ənanna ƙǝkafekkirha ahu ǝngya ngguchit. Niya ɗǝforha aten ǝngya hangga. Ɓoɓa ɓa ǝna wutsǝfayirha tǝ nggi.

22Mafadɗi thlǝgha wuɗǝɓǝl wurirha sǝri ɓagha ɓa ndǝghǝn, ‘Turina, fǝrenna wuɗǝɓǝl wurirha yawarha sǝri ka a ǝna shafili ni sǝ, walɗi chikrha yawarha sǝri atenggǝn.’ 23Ndangga turiɗi, ‘Usakko ka mafanna na tǝ ƙǝkafek fa. Ka ǝnana ƙǝkafekkirha ahu ǝngya ngguchit, niya ɗǝforha aten ǝngya hangga. Ɓoɓa ɓa ǝna wutsǝfayirha tǝ nggi.’

24Tǝrgha yi mafarha thlǝgha yawad wuɗǝɓǝl wurirha tal ɓagha ɓa ndǝghǝn, “Alvari, sa naa ngyangthlang, na hathla a mbǝrha hǝfwa nana tǝ ƙǝm na wumang ǝnnarhami huɗawana na. 25Nanǝn kee tǝrǝmɗi ɓǝɓengɗi wuɗǝɓǝl wa a kamu chehweerha, kulo ndǝghǝnya.”

26Amma ndangga turighǝn, ‘Sa tǝmbǝlfed mafarha na tǝ sǝbrha yid! A kyanna sǝnda sǝ ni hathla a mbǝrha hǝfwa ni tǝ ƙǝm wumanggi ǝnnarhami huɗawani, 27Mani ɗǝfewana wuɗǝɓǝlna ahu mbanki? A wuɗɗi ɓa kam niya thlǝghǝn tǝ chikrha atenggǝn.’ 28Tǝrgha ndagha, “Thlaama wuɗǝɓǝlɗi ahar mafadɗi ya, fǝrang nggǝnun yanɗi natǝ wuɗǝɓǝl wurirha yawarha kum. 29Ƙǝsǝr kala yanɗi natǝ ˈyaha na nda chighanggǝn, tǝnǝn waala ha kaan. Amma kala niifa mbuwagha tǝghǝn ha, ko yanɗi na ngguchit nanǝn tǝghǝn ha na nda a thlang hai a haarghǝn. 30Nanǝnya muwaman ka wuɗi mafadɗiya a ƙǝsha ɗǝ, ahu wula ɗǝ, a mbǝɗani na nanda a tǝrha sǝ tǝ ƙǝt mee.’

Far ngwala mii ngwa kumaarha

31A fara ɓana Wan Niifa ɓa ahu mamnggitghǝn, tǝ fathlǝngya Faara a thlǝmadghǝn, nǝn a tsaurha ahu tsǝnggam mamnggitghǝn a talara. 32Nafiya ƙǝshiirha na nda a wumnda a mbedghǝn ɓa, nǝn wurang nda fiya ɗǝ ƙǝla na tǝlafrha wurang nda chauraya ɗǝ ahur ˈwalya. 33Nǝn a sang chauraya a yisǝmadghǝn ˈwalya ƙǝm a yikawadghǝn. 34Tǝrgha na kutǝra a ndang nda fingya na a yisǝmadghǝn, ‘Ɓama ɓa, kun fǝrangna Pǝpa parka, harama langaad kutǝryidɗi ɗǝfang nanda ka kun ka ǝnana nda ƙǝshiirha. 35Ƙǝsǝr ƙǝs miirha nggi fǝree ɗun ǝnnarhami. Ƙǝs hushimnda nggi fǝree aam saarha nun. Tsauɗi ronga, thlǝ nggi nun fa ahu wurayinun. 36Niyi tawalth hai fǝree ǝn ƙǝnda nun. Fanna ɓee, pu nggi nun. Muwenda ahu porsǝna ɗǝ, ɗun ka ndee ˈyaɗǝ.’

37Tǝrgha ka nafiya na nda a nggǝrang sǝ, ‘Chinǝm, akwanni nanan sa a miirha fǝro ǝnnarhami nan? Nduwa ƙǝs hushimnda sa furo aam saarha nan? 38Nduwa ronga ni sa thlǝ sa nan fa? Nduwa sa tawalth furo ǝn kaala nan? 39Akwan nanan sa fadwa ɓee nduwa ahu porsǝna ɗan ndoˈya?’ 40Na kutǝrɗi a nggǝrang kanda sǝ, ‘Niya pǝrang ƙǝkafek kun, a ǝnang ɗun tal na ngguchit kaan ahur wanman nggini kyana ya, ǝna nun ndǝn a nggi.

41“Tǝrgha na kutǝrɗi a kyaharra thlǝmad nafina ɗǝ na a yikawadghǝn ndanggǝn kanda, ‘Weema ma thlǝmadna, kun shiwangna Faara, ɗun hu waarha ɗǝ mbuwagha mǝra hai tangsang nanda hai ka sheetan tǝ fathlǝnggighǝn. 42Ƙǝsǝr nggi hu miirha, fǝreewun ǝnnarhami wa. Ƙǝs hushimnda nggi fǝreewun aam saarha wa. 43Tsauɗi ronggirha thlǝwun nggi fa ahu wurayinun wa. Nggi tawalth hai, fǝreewun ǝn kaala fa wa. Fanna ɓee tǝ ƙǝm nggi ahu porsǝna ɗuwun ka ndee ˈyaɗǝ wa.’

44Kanda ƙǝm na nda a nggǝrang sǝ ndaa nda, ‘Chinǝm, akwan ni nanan sa a miirha nduwa a hushimnda nduwa ronga ni sa nduwa tawalth nduwa fadwa ɓee nduwa ahu porsǝna, ɗowan sǝ wa? 45Nǝn a nggǝrang nda kanda sǝ, ‘Niya pǝrang ƙǝkafek kun, a karɗun ɗang nda wanmanggina sǝ na nggu-ngguchit ya, kar nun ɗeerha sǝ.’ 46Tǝrgha na nda a ɗǝrha hu sǝsaarha ɗǝ mbuwagha tam ngwalaarha, amma ka nafiya na nda a ɗǝrha hu yibrha ɗǝ mbuwagha tam ngwalaarha.”