1Jo 1 | IPI | STEP | Wamba wete Goteto yuu ati-la yakale lene atea-angi, wandakali saka atapowa ateakale lo ataya alane pii oko bala Ayiane Gote oko towa atu ateapele-pia. Goteto pii okone bala nanimanga mo pana ya-kola, nanimato bala lee-mane andalu, kii-mane minuto, bala okopene ya lo andema. Nanimato pii balato leane oko wisanisa atoto, balana pii ale emane tupapi, minditaka andema tupapi, utupane pitaka yakama langeyama.

a 1:1-2Jo 1:1,14

b 1:4Jo 16:23-24

c 1:51Ti 6:13-16; Jem 1:17-18

d 1:61Jo 2:3-6

e 1:8-10Sam 32:5; Man 28:13

‏ 1 John 1

Wandakali Saka Atapowa Ataya Alane Pii Oko

1 Wamba wete Goteto yuu ati-la yakale lene atea-angi, wandakali saka atapowa ateakale lo ataya alane pii oko bala Ayiane Gote oko towa atu ateapele-pia. Goteto pii okone bala nanimanga mo pana ya-kola, nanimato bala lee-mane andalu, kii-mane minuto, bala okopene ya lo andema. Nanimato pii balato leane oko wisanisa atoto, balana pii ale emane tupapi, minditaka andema tupapi, utupane pitaka yakama langeyama. ^a

3 Ayiane Gote okola, balana Iwanane Jisasa Kataisa-la, okonelapo towa nanima nembo mindiki palu ateyama-kola, yakamapi nanima towa nembo mindiki palu atalapale loto, nanimato minditaka andemane tupapi, ale emane tupapi, utupane yakama langeyama. 4 Nanima epele wete amakale nembo toto, nanimato yakamana pepa oko peyo epe leyama. ^b

Yakamato Mana Koo Minalaini Tupa Lapana Alapape Leane Oko

5 Wamba Jisasa Kataisato pii mindi lea-kola, nanimato pii okone ale ema. Nanimato pii okone teke yakama languato, Gote bala tii-pene eya-kola, balanga undupi-lene aŋakopi mindi nayene ateya leyama. ^c 6 Tene okonena, nanimato bala towa nembo mindiki palu ateyama loto teke, mana koo tupa wato minuto, undupi-lene okona epoko pua atemando, nanimato pii enene oko nalene, owato pii loloma-kola pulupeya. ^d 7 Wuane tekeko, Gote bala epene tii-pene okona pangosa ateya pua, nanimato tii-pene okona epoko pua atemando, nanima balana wandakali tupa towa nembo mindiki palu atoloma-kola, balana Iwanane Jisasa okona tundupa okomane nanimana mana koo minalamane tupa pitaka apialane.

8 Nanimato mana koo mindi mina na-piyamane lemando, Gotena pii enene oko nanimanga nayola-kola, nanima tane minakasa oloma-kola pulupeya. ^e 9 Nanimato mana koo mindi mina napema lemando, Gotena pii oko nanimanga nayola-kola, Goteto owato pii lalane loloma-kola pulupeya tekeko, Gote bala epene tika-pene wete. Balato mangene pukale lalane tupa enene piyane. Tene okonena, nanimato mana koo minalamane tupa lapana emando, mana koo minalamane utupanena yano tupa kondalu, balato nanimanga koo tene yalane tupa pitaka apolopeya.