Luk 12 | IkoSC | STEP | Aya igɔd bani bafɛrɛ Jisɔs ta basakanɛ bacɛmɛ, ɔbɨnɛ na banyɛgɛ mɔ ya, “Babɛrɛ nu bɔkpaju bonua na rɛkpɛbɛ bawu ndi Bafarisi! Na ɛyɔ ɛbɛ nji babɛŋɛ bagbɔgɛ bani.

Luke 12

Kɔjam kotu na kɔrɔbi oni etima

(Mt 10:26,27)

1 Aya igɔd bani bafɛrɛ Jisɔs ta basakanɛ bacɛmɛ, ɔbɨnɛ na banyɛgɛ mɔ ya, “Babɛrɛ nu bɔkpaju bonua na rɛkpɛbɛ bawu ndi Bafarisi! ^{▼▼Rɛkpɛbɛ bawu ndi Bafarisi! Na bɔkpa manrɛ ramu Ɛbrɔkpabi rajuju bayumɛ Bafarisi na yis. Yis osiŋɛ idug nji babɛŋɛ bakaɛ ɔyɔ ɔtɨna. Na nyɛnɛ oni Farisi ŋɔnɛ okosi bani ecii basi mbu bɔbɔ bokibara.} Na ɛyɔ ɛbɛ nji babɛŋɛ bagbɔgɛ bani. 2 Gbanambunɛ mbu bayiyi kubayirɛ, mɨnɛ nambunɛ mbu bɔra ŋɨbaŋɨba kubɔjaga na rɛjaɛ. 3 Gbanambunɛ atanɛ na keru kubafugɛ ara reyi rɛcɛ, mɨnɛ gbanambunɛ amɨmini na ɛmaŋɔŋ bani ecii kubafugɛ.

Oni ŋɔ akɔwɔ

(Mt 10:28-31)

4 “Nkanɛ nu, bacɛmɛ bamia, kawɔ nu bani mbɛ ara baŋu ɛkpaju bakikɔfɔn gbabojuju kosi. 5 Nsu kunkɔgɛ nu oni ŋɔ minkɔwɔ: wɔ Ɛbrɔkpabi, nji, ara eŋu ɛkpaju, ɛfɔnɔ nsɨm kotubi nu na kwa rasinkanɛ. Ɛbrɔkpabi ji ɛra oni ŋɔ minfu kɔwɔ! 6 Tafararifad batan nɛ bakwɛ na peni bafa mbɛ bafɔnɔ rɛma-ɛ? Nsu Ɛbrɔkpabi ekijiɛ tafararifad tumŋɔnɛ. 7 Tum riria ndi rira nu na retu babagɛ. Kafɔnɔ nu yɛ bofu; minfa rofua gbɔg minci batafararifad ecii!

Kɔtam din kɔkɨn Krais

(Mt 10:32-33; 12:32; 10:19-20)

8 “Nkanɛ nu, oni naŋɔnɛ ŋɔ ɔbara na rɛkaba bani ɔkanɛ bɛ ya amɔ ɔra na ami, na mbu Wɔ Oni okosi mɨnɛ ɔjɛ bɛ na rɔsɔ banyiɛ-rotuma Ɛbrɔkpabi. 9 Nsu bani mbɛ bakɨna mi na rɔsɔ bani, Wɔ Oni kuɔkɨna bɛ mɨnɛ na rɔsɔ banyiɛ-rotuma Ɛbrɔkpabi. 10 “Oni naŋɔnɛ ŋɔ ɔtanɛ remu rebi ɔbaŋa Wɔ Oni, kubagbɛ basugɛ mɔ; nsu oni naŋɔnɛ ŋɔ ɔtanɛ birɛ bebi ɔbaŋa keriragi-Kɛkɔ, bagbɛŋɛ basugɛ mɔ.

11 “Ara babɛ wu banɔ na basam-rɔrɛ kotibi wu, na bɛya bakɨm rɔrɛ tum na bɛya bani mbɛ nsɨm ɔra bɛ na ibɔ, kaburanɛ nu retu kɛmanci minkosi minyaŋɛnɛ tum mbu minkɔtanɛ. 12 Fɛŋɛ keriragi-Kɛkɔ kukɛkanɛ nu kafa mbu minkɔtanɛ.”

Rɛkana ɔfɔnɔ birɛ ŋɔ ɔsɨlasɨla

13 Orumanɛ ŋɔnɛ na rɛkaba ɔkanɛ Jisɔs ya, “Ɔkpɛbɛ, kanɛ ɔma omia ɔjɛ mi reyibanɛ remia na birɛ mbi mintɛ oyua ɔba osugɛ.”

14 Jisɔs ɔfɛlɛ mɔ ramu ya, “Ayi, yɛnɛ mɔ ɔjɛ mi nsɨm ya ntiba mɨnɛ nyibanɛ birɛ njɛ nu?” 15 Mɨnɛ ɔkanɛ bɛ ya, “Babɛrɛ mɨnɛ jɨba nu bɔkpaju bonua na kɛlɨŋa ewud nanjinɛ; ndi rokpin rɔyɛ rokitumɛ na birɛ mbi afɔnɔ, tum afɔnɔ bi nyan.”

16 Jisɔs otuba yɛ rɛkana ndi ɔjɛ bɛ: “Kegbu cinɛ, ɛfɔnɔ ɔfɔnɔ birɛ ŋɔ ɔfɔnɔ rɔcɛ ndu royiba birɛ. 17 Ɔsɨnanɛ, ‘Nkosi nyan? Nkifɔnɔ kwancɛ nkɔyɔgɛ birɛ mbi nkɔfɨlɛ.’

18 Nsu ɔkanɛnɛ ya, ‘Ka mbu nkosi. Nkomugɛ bobuŋ bomia nri bɔrɛnɛ, kwa nkotubɛrɛ birɛ fɛb mbi nkɔfɨlɛ na kɛkana kemia. 19 Nkɔkanɛ yɛ ɛkpaju emia mɔ, bɔfa bɔtɔbɔjɛ mi! Nfɔn brika birɛ mbi nduga ju ecii ɛyɛrɔsɔ. Di rokpin dɛŋɛnɛ, di, ŋɔ, mɨnɛ fɔnɔ kɔrɔmetima na ɛkpaju ɛyɛ!’

20 “Nsu Ɛbrɔkpabi ɛkanɛ mɔ ya, ‘Awu nsɨl! Jɔ ndi kuaba. Yɛnɛ yɛ mɔ ɔkɔfɔn birɛ mbi fɛb mbi afigɛ ayɔgɛnɛ?”’

21 Jisɔs okurɛ rɛkana rɛmɔ ya, “Na mbu bɔkɔjagi bɔjɛ bani mbɛ baruma gbanambunɛ bayɔgɛnɛ, nsu bara baram na rɔsɔ Ɛbrɔkpabi.”

Fɔnɔ renyiɛ-etima na Ɛbrɔkpabi

(Mt 6:25-34)

22 Jisɔs ɔkanɛ yɛ banyɛgɛ mɔ ya, “Nkanɛ nu mɔ minka juŋanɛ bɔkpaju mimbaŋa rokpin ronua! Mimbaŋa bedidi mbi minkodi minkpina mɨnɛ mimbaŋa bɔfɔ ɛkpaju. 23 Rokpin rocia bedidi begbu ɛram, mɨnɛ ɛkpaju ecia bɔfɔ begbu ɛram. 24 Rɔ mankpayaŋ: bakpaŋɛkpaŋɛ din bafɨlɛfɨlɛ? Bakifɔnɔ bɔmaŋɔŋ mbu batubɛrɛ radidi na bobuŋ; Ɛbrɔkpabi ji ɛyɛŋɛ bɛ! Anu mincia minninɔn begbu ɛram! 25 Yɛnɛ mɔ ɔkɔyɛ ojuŋanɛnɛ okwɛ reyi na rokpin rɔmɔ? 26 Ara ayɛŋɛ kosi egbigbɨra gba mbu, bu na aduŋɛnɛ ɛkpaju abaŋa birɛ mbika?

27 Rɔ aya beti-ifu bɛtɨma! Besiŋɛ rɛsɛ din bɛjɨmanɛ bɔfɔ? Nsu nkanɛ nu mɔ tum ɔkɨm Sɔlɔmɔn na boyuɛ bɔmɔ fɛb okifɔnɔ ɛfɔ nji eyiba aya keti-ifu na kɛtɨma. 28 Ɛbrɔkpabi ji eyuɛ rawa kɛtɨma, rawa ndɛ afɛŋɛ ɛrɛn refu raninaŋ, bakɨm dɛ na roku. Aji ɛyɛŋɛ jugi kosi begbu ɛram ɛjɛ wu-ɛ? Minfɔnɔ egbigbɨra renyiɛ-etima! 29 Kajuŋanɛ nu bɔkpaju mimbaŋa mbu minkodi mɨnɛ miŋɔ. Kajuŋanɛ nu bɔkpaju bonua mimbaŋa birɛ mbi. 30 Ekicia bani mbɛ babɔ bakigbɨra Ɛbrɔkpabi mbɛ birɛ mbi bɛfaŋɛ bɛ rofua. Mintɛ onua ɔgbɨri ya minduga birɛ mbi. 31 Nsu bɛ nu kpa rɔsɔ duga rɔrɛ-rɛkɨm Ɛbrɔkpabi, mɨnɛ birɛ mbinka fɛb kuɛjɛ nu.

32 Kafɔnɔ nu bofu, bɔ bɔrɔri bomia, fɛŋɛ mintɛ onua oduga kɔjɛ nu rɔrɛ-rɛkɨm. 33 Kwɛ nu gbanambunɛ minfɔnɔ minjɛ baram bagbuga kambɛ. Si nu na bɔkpaju bonua bɔbam bagbuga mbu bɔbɔ bɔtɨmatɨma, tubɛrɛ ogbuga onua na rɔrɛ Ɛbrɔkpabi, kwa ɔbɔ ɔnyɛgɛnɛ, baji bajiŋɛ mɨnɛ bɔkpagalantuŋ bokubɛ bɛ. 34 Kegbu nancinɛ etima ɛyɛ etumɛ na kwa ogbuga ɔyɛ ɔra.

Brika ori na kekukubi ori

(Mt 24:45-51)

35 Jisɔs ɔkanɛ banyɛgɛ mɔ ya, “Fumanɛ mi nu kegbu nancinɛ aya bari mbɛ babɔ rɔbinɛ bɔfɔ rɛsɛ na kɛŋamɛ kenua ŋamɛŋamɛ, 36 aya bari mbɛ bafumanɛ mintɛ ɔbɛ ɔgba kɛtɔmɔ rɛba. Ara ɔgba mɨnɛ ɔlɨbi rɛma, bakoyirɛ mɔ adi kegbu cinɛ. 37 Kɔrɔmetima kɔyɔmɛ kɔjɛ bari mbɛ mintɛ ɔbɛ ɔkɨmanɛ babin mɨnɛ batubɛrɛ bɔkpaju ara ɔŋbɨnɛnɛ! Nkanɛ nu, amɔ kuoyugɛ kɔkpa kɔmɔ, osi bɛ batumetumɛ mɨnɛ otuɛnɛ ketu aya ori, ɔjɛ bɛ bedidi. ^b 38 Botima kubɔrɔmɔ bari mbɛ ara mintɛ ɔbɛ ɔkɨmanɛ bɛ batubɛrɛ bɔkpaju, tum ara ɔŋbɨnɛnɛ manti jɔ tum kegbu reyi. 39 Nsu jɔɛ nu mbu: ɔkɔɛtɔ ɔyɛŋɛ kosugɛ oji ɔjɔgɔrɔ ɔnɔ na ɛtɔ ɛmɔ, ara ɔgbɨri kegbu nci okowu. 40 Anu mɨnɛ minkɔ kotubɛrɛ bɔkpaju, ndi minkigbɨra kegbu nci Wɔ Oni okowu.”

41 Pita ɔsɨna ya, “Ɔkɔ-rokuku, rɛkana ndi atuba ajɛ yu mbɛ rɛnyɛgɛ wu, din atuba ajɛ oni naŋɔnɛ?”

42 Ɔkɔ-rokuku ɔfɛlɛ ramu ya, “Baga ori yɛ, mɔ ɔra brika ori mɨnɛ ɔgbɨra kɔtanɛ? Na oni ŋɔ mintɛ-ɛtɔ ɔkɔyɔgɛ oni retu, kɔbabɛrɛ ɛtɔ mɨnɛ kɔjɛ bari mbɛka bedidi bɛbɛ na brika kegbu. 43 Kɔrɔmetima kɔyɔmɛ kɔjɛ ori kaŋɔ ara mintɛ-ɛtɔ ɔbɛ owu kɨmanɛ mɔ osiŋɛ boyi mbu! 44 Nkanɛ nu kpikpɛ, mintɛ-ɛtɔ kuɔbarɛ mɔ na kɛbari nci ɔbabɛrɛ birɛ bɛmɔ fɛb. 45 Nsu ara ori ŋɔ ɔfɛ ya mintɛ-ɛtɔ ɔmɔ okubɛ kegbu kɔŋbɨnɛnɛ mɨnɛ ɔbɨnɛ kodu bari mbɛka, babanɛ na barumanɛ, mɨnɛ odiŋɛ ɔŋɔŋɛ itugi obuma, 46 mintɛ-ɛtɔ ɔkɔŋbɨnɛnɛ reyi ndi ɔbɔ okirigɛ etima mɨnɛ na kegbu nci ɔbɔ okigbɨra. Mintɛ-ɛtɔ kuɔjɛ mɔ rasinkanɛ mɨnɛ ɔrɔbɔ mɔ na kɔrɔbari mbɛ ɔbɔ okifɔnɔ korigɛ etima na abɛ.

47 “Ori ŋɔ ɔgbɨra mbu mintɛ-ɛtɔ ɔmɔ oduga mɔ ya osi, nsu okitubɛrɛ ɛkpaju ɛmɔ osi bu, bajɛŋɛ mɔ rasinkanɛ ndɛ rafifa. 48 Nsu ori ŋɔ ɔbɔ okigbɨra mbu mintɛ-ɛtɔ ɔmɔ oduga mɔ ya osi, mɨnɛ osi gba mbu bɔyɔmɛ bɔjɛ ya ɔfɛ rasinkanɛ, ɔfɛŋɛ egbigbɨra rasinkanɛ na bobi mbu osi. Ara Ɛbrɔkpabi ɛjɛ bani rɛjɛ, erigɛ etima ya bani kambɛ batuga ji oyiyi. Mɨnɛ oni ŋɔ Ɛbrɔkpabi ɛjɛ birɛ ecii, kuɛsɨna mɔ mɨnɛ birɛ ecii.

Nkiwu na reŋunɛ nwu na kɔtanɛ

(Mt 10:34-36)

49 “Nwu kɔkɔrɛ roku na rokuku, mɨnɛ ndi jugi rowu bɨnɛ kowumanɛ! 50 Ɛfɔnɔ rasinkanɛ ndɛ nkɔfɛ. Mɨnɛ nkɔkɔfɛ rasinkanɛ ndɛ ta njaga ntɨm! 51 Minrɔŋɛ ya nwu mɔ ratanɛ rayɛ na rokuku-ɛ? Kanya nɛ, nwu kosi bani bafabɛnɛ.

52 Bɨnɛ kunku aruŋɛ rɔsɔ ɛtɔ nji ɛra bani batan kueyibanɛnɛ, bataa banyiɛ na bafa mɨnɛ bafa banyiɛ na bataa. 53 Britɛ kubakpɛɛ bɔbarumanɛ irɨma, mɨnɛ bɔbarumanɛ bakpɛɛ britɛ irɨma; brika kubakpɛɛ bɔbabɛ mbɛ babanɛ irɨma, mɨnɛ bɔbabanɛ kubakpɛɛ brika babɛ irɨma. Brika ntaan kubakpɛɛ bɔbabanɛ ntaan babɛ irɨma, mɨnɛ bɔbabanɛ ntaan kubakpɛɛ brika ntaan babɛ irɨma.”

Kɔjɔɛ kegbu

(Mt 16:2-3)

54 Jisɔs ɔkanɛ mɨnɛ bani ya, “Ara minfɛ kaju-rɔja karubi mbari ŋɔ royi rɔjaga, kegbu cinɛ minkɔkanɛ ya ɔja okowu, mɨnɛ ɔtɔbɔ. 55 Mɨnɛ ara ɔfɨm osi ntunɛ, ya, “Kwa kafifi kawu,” mɨnɛ ɛjaga kanya. 56 Basiŋɛ-bobi! Mingbɨri kɛmanci minrɔŋɛ rokuku mɨnɛ na kaju-rɔja minkabara rɔja; bu na minkigbɨra yɛ mbu boruŋɛ rɔsɔ kunku?

Kakɔnanɛ na oni ŋɔ minfɔnɔ ifiri

(Mt 5:25-26)

57 “Bu na mimbɔ mintiba na bɔkpaju bonua mbu bɔra kɔŋ ya minsi? 58 Ara afɔnɔ kɔtanɛ na oni, ju kɛmanci minkɔ kɔnanɛ nabɔ ɔsɔgɛ wu orua esub. Ara minkikɔnanɛ, ɔkɔjam wu ɔkabarɛ na rɔsɔ ɔyɛrɛ ratiba. Ɔyɛrɛ ratiba ɔkɔsɛ wu ibɔ ɔjɛ bababɛrɛ mankpɔkɔbi, mɨnɛ bakomuri wu. 59 Nkanɛ wu, ajaga, na kwa akosu, ta akpɛɛ ogbuga naŋɔnɛ ŋɔ adi.”