Luke 15

Ɛrɔri nji ɛyɨmayɨma

(Mt 18:12-14)

1Reyi dinɛ batama bagbuga-retu ecii na basiŋɛ-bobi bawu kofugɛ Jisɔs, 2Bafarisi na bakpɛbɛ Ibina Mosis babɨnɛ kɔmɨmini, “Oni ŋɔ osiŋɛ ɛcɛmɛ na basiŋɛ-bobi. Odiŋɛ mɨnɛ bedidi na abɛ!” 3Jisɔs otuba yɛ rɛkana ndi ɔjɛ bɛ: 4Ara oni na kɔrɔ konua ɔfɔnɔ iram bɔrɔri itan, mɨnɛ ɛrɔri jinɛ ɛjaga ɛyɨma, akosi nyan? Asugɛ iram bɔrɔri inaa irɨma rokura na inaa na kwa ayɛŋɛ bu akadugi nji ɛyɨmayɨma ta afɛ ji-ɛ? 5Mɨnɛ ara afɛ ji, na kɔrɔmetima kanku akorigɛ ji na bɔfɛgɛ 6agbaŋɛ na aji. Akoji yɛ bacɛmɛ bayɛ na bani mbɛ batumɛ bakunɛ wu, akanɛ bɛ ya, fɔnɔ nu kɔrɔmetima na ami; nfɛ ɛrɔri emia nji ɛyɨma!’ 7Nkanɛ nu na kɛmanci brika kɔrɔmetima kokotumɛ na rɔrɛ Ɛbrɔkpabi ara osiŋɛ-bobi osugɛ bobi bɔmɔ, kukocia iram brika bani inaa irɨma rokura na banaa mbɛ bara brika bani.

Ogbuga ŋɔ ɔyɨmayɨma

8Jisɔs ɔkanɛ bɛ rɛkana rejuju: “Ara ɔwanɛ ɔfɔnɔ ogbuga siliba jubi nsu ɔyɨmɛ ŋɔnɛ. Ɔŋamɛ roku, ɔta ɛtɔ oduga oyiyi kwa nancɛnɛ ta ɔfɛ-ɛ? 9Mɨnɛ ara ɔfɛ mɔ, ojia bacɛmɛ bamɔ na bani mbɛ batumɛ bakunɛ mɔ ɔkanɛ bɛ ya, ‘Kana nu na ami; fɛŋɛ nfɛ ogbuga omia ŋɔ ɔyɨma.’ 10Nkanɛ nu, na kɛmanci rɛkan rekotumɛ na rɛkaba banyiɛ-rotuma Ɛbrɔkpabi ara osiŋɛ-bobi osugɛ kosi bobi.”

Wɔ orumanɛ ŋɔ ɔyɨmayɨma

11Jisɔs oruŋɛ rɔsɔ na rɛkana rejuju: Ɛfɔnɔ orumanɛ ŋɔ ɔfɔnɔ bɔ barumanɛ bafa. 12Ŋɔ winwɔ ɔkanɛ mɔ ya, ‘Mintɛ, jɛ mi reyibanɛ remia ndi birɛ bɛyɛ kunku.’ Mintɛ oyibanɛ birɛ bɛmɔ ɔjɛ bɛ iti ifa. 13“Rayi rakifɨranɛ ndi mintɛ ɔbɛ oyibanɛ birɛ ɔjɛ bɛ, ŋɔ winwɔ otubɛrɛ gbanambunɛ mbu ɔfɔnɔ, oruŋɛ rɔcɛ kɛgbanta ɛyɔ na rɔrɛ rojuju ɔkadi rokpin sagasaga. 14Ndi owu kubɛ gbanambunɛ mbu ɔfɔnɔ, ŋbɔ minɔ na rɔrɛ kandu, mɨnɛ nka ɔra ibɔibɔ. 15Oruŋɛ ɔkatɔ botiga ɔjɛ oni ŋɔ osi na rɔrɛ kandu aya ori, ŋɔ otigɛ mɔ ya ɔkayɛ bakug bamɔ. 16Ɔra otimanɛ kodi bedidi mbi bakug badiŋɛ, ndi tum oni okijɛ mɔ bedidi. 17“Ndi manfɔl maŋbɨnɛnɛ mambira mɔ, ɔkanɛ ɛkpaju ɛmɔ ya, “Bari mintɛ omia barakaka na bedidi jɔgjɔg, ka ami nka mbaŋɛ ŋbɔ! 18Kuŋbɛ nruŋɛ ɛyɛ mintɛ omia nkakanɛ mɔ mɔ, ‘Mintɛ, nsi bobi na rɔsɔ Ɛbrɔkpabi mɨnɛ na rɔsɔ rɔyɛ. 19Nkikofu kotumɛ wɔ ɔyɛ; jɨba mi aya ori ɔyɛ ŋɔnɛ.’ 20Mɨnɛ ɔgbɛ oruŋɛ ɛyɛ mintɛ ɔmɔ. “Nsu ndi ɔbɛnɛ ɛyɔ ɛfɨra, mintɛ ɔmɔ ɔfɛ mɔ mɨnɛ owufɔn erun na amɔ; ɔbɨrɛ ɔkakɨmanɛ mɔ, origɛ mɔ ibɔ na kɛfɛgɛ mɨnɛ okugɛ mɔ kama. 21“Wɔ ɔmɔ ɔkanɛ mɔ ya, ‘Mintɛ, nsi bobi na rɔsɔ Ɛbrɔkpabi mɨnɛ na rɔsɔ rɔyɛ. Nkikofu ŋɔ ajiŋɛ mi ya wɔ ɔyɛ.’ 22“Nsu mintɛ ɔkanɛ bari bamɔ ya, ‘waga nu ikari! Ŋuɛ nu na brika bɔfɔ wu rɔbi mɔ. Rɔbɔ mɔ nu nkpagandɨra na bininɔ mɨnɛ minrɔbɔ mɔ birɛ ikari na ikari. 23Ŋuɛ nu na ɛfɔm nji efifa reŋua. Yɔgɛ rɛfɔnɔ nu kɛtɔmɔ mɨnɛ rɛkana. 24Ndi wɔ omia ŋɔ ɔba, nsu ɔŋbɨnɛnɛ ofiɛ na rɔbɔ; ɔyɨmayɨma mɨnɛ nfɛ mɔ. Babɨnɛ yɛ kɔkan. 25Wɔ ɔmɔ ŋɔ onintɨma ɔra na kwa ɔyɛŋɛ boti. Ndi ɔgbaŋɛ, aya okunɛ ɛtɔ, ofugɛ rabɨna mɨnɛ bani batuba. 26Ojia ori ŋɔnɛ ɔsɨna mbu bɔjaga. 27Ɔfɛlɛ mɔ ramu ya, ‘Ɔma ɔyɛ ɔŋbɨnɛnɛ ɔgba mɨnɛ mintɛ ɔyɛ oŋu ɛfɔm nji efifa ndi ɔgba na kotigiri ɛkpaju.’ 28Etima ɛma ɔma ɔmɔ ŋɔ onintɨma ɔkɨna kɔnɔ rika ɛtɔ. Mintɛ ɔmɔ ɔjaga owu kpɔlɛ mɔ ya ɔnɔ rika. 29Nsu ɔfɛlɛ mintɛ ɔmɔ ramu ya, ‘Rɔ! Ju ndi fɛb ntuga wu aya otiga, nkiginɔŋɔ kpɛnɛ remu rɛyɛ. Akiginɔŋɔ jɛ mi tum wɔ ebu ya nkana na bacɛmɛ bamia. 30Nsu ndi wɔ ɔyɛ ŋɔ ɔbɔ ta ɔkakubɛ birɛ bɛyɛ na basasa ɔŋbɨnɛnɛ ɔgba, aŋu ɛfɔm nji efifa ajɛ mɔ!’ 31Mintɛ ɔmɔ ɔfɛlɛ mɔ ramu ya, ‘Wɔ omia, ara na ami sɛnsɛn kegbu, mɨnɛ gbanambunɛ nfɔnɔ bɔyɛ. 32Nsu rɛkɔ kɔkan mɨnɛ rɛfɔnɔ kɔrɔmetima, ndi ɔma ɔyɛ ŋɔ obiba mɨnɛ ɔŋbɨnɛnɛ ofiɛ na rɔbɔ; ɔyɨmayɨma mɨnɛ rɛfɛ mɔ.’