Luke 17

Bobi bosisi

(Mt 18:6,7,21,22; Mk 9:42)

1Jisɔs ɔkanɛ banyɛgɛ mɔ ya, “Birɛ mbi bekosi bani basi bobi kubewu, nsu Ɛbrɔkpabi kuesinkanɛ oni ŋɔ okowu na eyumɛ nji ekosi bani basi bobi. 2Kueyiba ecia ya bakɨnɛ mɔ rɛta rɛrɛnɛ na kɛkɔrɔ. Batuɛ na manja manrɛnɛ, na ndi okosi bimbɔ mbɛ basi bobi. 3Gbɨra nu mbu minsiŋɛ,

‘Ara ɔma ɔyɛ osi wu bobi, tunɛ mɔ, mɨnɛ ara ɔkpɔlɛ wu, gbɛ sugɛ mɔ. 4Ara osi wu bobi begbu bɛnabɛtaa na reyi, mɨnɛ owu bi ɔjɛ wu begbu bɛnabɛtaa ya agbɛ asugɛ mɔ, akɔkɔgbɛ asugɛ mɔ.”

5Apɔsɨl bakanɛ Ɔkɔ-rokuku ya, “Si renyiɛ-etima reyua retigiri!”

6Ɔkɔ-rokuku ɔfɛlɛ bɛ ramu ya, “Ara afɔn egbigbɨra renyiɛ-etima aya emu ndug, akanɛkanɛ keti nci kɛbari nya ya, ‘Yibɛnɛ nfa na iyi kabanɛ na manja manrɛnɛ,’ mɨnɛ kukesi naŋa minkanɛ.

7“Ara oni ŋɔnɛ na kɔrɔkonua ɔfɔnɔ ori ŋɔ ɔkpaŋɛ rabira, na ɔbabɛrɛ bɔrɔri-ɛ, ara ɔgba, kuakanɛ mɔ ya owudi bedidi bɛmɔ-ɛ?’ 8Ojiŋɛ mɔ kanya. Ɔkɔkanɛ mɔ ya, ‘Kasi bedidi bemia wubarɛ mi. Mɨnɛ yuɛnɛ, afumanɛ mi ndi mɨnɛ nŋɔ, nayɛ akadi bɛyɛ. 9Ara ori osi mbu bɔyɔmɛ bɔjɛ ya osi, basamɛ mɔ ɔsamɛ-ɛ? Basamɛ. 10Ɛra kanya kɛmacinɛ na anu. Ara minsi mbu bɔyɔmɛ bɔjɛ ya minsi fɛb, kanɛ nu yɛ ya, ‘Ayu rɛrakanya bari, mɨnɛ resi mbu bɔyɔmɛ bɔjɛ ya resi.”

Jisɔs ɔgbana bafimɛ bafun iti jubi

11Ndi Jisɔs ɔra oruŋɛ Jɛrusalɛm, ɔkɔjagi na egbu Sameria na Galili. 12Naŋa ɔnɔŋɛ rorirɛ dunɛ, bani jubi mbɛ bafimɛ bafun babara nyaŋɛnyaŋɛ, 13bakuga, “Jisɔs, Ita, fɔnɔ erun na ayu!”

14Ndi Jisɔs ɔfɛ bɛ ɔkanɛ bɛ ya, “Taŋɛ kakɔgɛ bajɔmɔ-kɔya bɔkpaju bonua. Mɨnɛ naŋa baruŋɛ bafɛ ya bafun baninaŋ bɛ na ɛkpaju.

15Ndi ɔcɛmɛ ŋɔnɛ ɔfɛ ya ɛkpaju esi mɔ, ɔgbɨnɛnɛ owu bɨnɛ kɔka Ɛbrɔkpabi na remu rɛrɛnɛ. 16Ɔtɔ Jisɔs na bɔkpaga, mɨnɛ ɔsamɛ mɔ na resi ndi owusi ɔjɛ mɔ. Osi rɔrɛ Sameria.

17Nsu Jisɔs ɔsɨna, “Ŋbana bani jubi, iti itan na inaa mbɛka nɛ? 18Bu na ocincɛ ŋɔ igbɛ mɔ owuŋbɨnɛnɛ owu kɔsamɛ Ɛbrɔkpabi?” 19Minɛ Jisɔs ɔkanɛ mɔ ya, “Gbɛ bara taŋɛ; renyiɛ-etima rɛyɛ rɛgban wu.”

Rewu rɔrɛ-rɛkɨm Ɛbrɔkpabi

(Mt 24:23-28,37-41)

20Bafarisi bajuju basɨna Jisɔs ya bagakegbu nci ‘Rɔrɛ-rɛkɨm Ɛbrɔkpabi rokowu. “Ɔfɛlɛ bɛ ramu ya, ‘Rɔrɛ-rɛkɨm Ɛbrɔkpabi roŋuɛ nansɛrɛ anu minkɔfɛ na jɛnɛ ranua ndɛ. 21Oni ɔyɛŋɛ kɔkanɛ ya, ‘Kadu nfa’ mɨnɛ ɔyɛŋɛ kɔkanɛ ya, ‘Kadu ka!’ Ndi rɔrɛ-rɛkɨm Ɛbrɔkpabi rɔra nka nfa na anu.”

22Minɛ Jisɔs ɔkanɛ banyɛgɛ mɔ ya, “Kegbu kukewu nci minkodugi kɔfɛ reyi dinɛ ndi Wɔ Oni, nsu minfɛŋɛ di. 23Bani kubakanɛ nu ya, ‘Rɔ nu ka!’ Mɨnɛ kubakanɛ nu ya, ‘Rɔ nu nfa,’ nsu kajaga nu minkadugi mɔ. 24Ndi Wɔ Oni kuowu aya ŋbaŋbaŋ ɔŋbaŋa oyuma na kaju-rɔja ndɨm. 25Nsu kuɔbɛrɔsɔ ɔfɛ ɔkɨmkɨm rasinkanɛ mɨnɛ bani kɛsɛ nci kubakɨna mɔ.

26Reyi Wɔ Oni ɔkɔŋbɨnɛnɛ owu, kuretumɛ aya kegbu Nua. 27Bani bara badiŋɛ, baŋɔŋɛ, basaŋɛ raba mɨnɛ bajɛŋɛ bɔ na raba ta reyi ndi Nua ɔnɔ na kokugi kɔrɛnɛ kɔmɔ. Mani manwu nɔ maŋua bɛ fɛb.

28Kegbu nkɔŋbɨnɛnɛ nwu kuketumɛ aya kegbu Lɔd. Bani bara badiŋɛ, baŋɔŋɛ, bayama mɨnɛ bakwɛ, bakpaŋɛ mɨnɛ bariŋɛ. 29Nsu reyi Lɔd ɔjaga osugɛ Sodɔm, Ɛbrɔkpabi ɛtɔbɔ roku na rasisɔ ndɛ rajaga na kɛlɨŋa rata ndɛ rakɨmakɨma, rariɛ na kaju-rɔja na rɔrɛ Sodɔm, mɨnɛ raŋua bani rika rɔrɛ kandu fɛb.

30Reyi ndi Wɔ Oni ɔkɔmɨlɛnɛ na rɛkɨm rɛmɔ, naŋa rekotumɛ mɨnɛ. 31Reyi kandi ara rebigɛ, oni ŋɔ ɔra birebirɛ kɔkantɔ, ɔkariɛ ya amɔ ɔnɔ rika ɛtɔ ɔkatagi birɛ bɛmɔ. Kɛma cinɛ na oni ŋɔ orua kɛkana, ɔkanɔ rika ɛtɔ kɔsɛ gbatumbunɛ. 32Jinɛnɛ nu mbu bɔjaga bɔjɛ ɔwa Lɔd. 33Bani mbɛ baju ya batubɛrɛ rokpin rɔbɛ, rokpin ndu najunaju kurɔsɔrɔ bɛ mɨnɛ bani mbɛ banyiɛ ya rokpin rɔbɛ rɔsɔrɔ bɛ, kubafɔnɔ rokpin ndu najunaju. 34Yɔgɛ nkanɛ nu, jɔ kandi, bani bafa kubayɔmɛ na kɛyɔ cinɛ, kubabɛ ŋɔnɛ, ŋɔka osu.” 35Babanɛ bafa kubatumɛ kwacɛnɛ bakɔgɔ igu, kubabɛ ŋɔnɛ, ŋɔka osu.” 36Barumanɛ bafa kubasiŋɛ rɛsɛ na kɛkana, kubabɛ ŋɔnɛ, basugɛ ŋɔka. ▼

▼Bɔkpa manrɛ bojuju bokifɔnɔ ramu ndɛ.

37Banyɛgɛ-mɔ basɨna mɔ ya, “Ɔkɔ-rokuku, nfan di birɛ mbi bɛkɔjagi?” Ɔfɛlɛ bɛ ramu ya, ‘Kwa obureburɛ ɔra na kwa batɛrɛ bafiganɛ.”