Luk 23 | IkoSC | STEP | Bani retu Jus fɛb mbɛ barakafa, babɛ Jisɔs baruŋɛ ɛyɛ Pailɛd.

Luke 23

Babɛ Jisɔs baruŋɛ ɛyɛ Pailɛd

(Mt 10:5-15; Mk 6:7-13)

1 Bani retu Jus fɛb mbɛ barakafa, babɛ Jisɔs baruŋɛ ɛyɛ Pailɛd. 2 Babɨnɛ kɔlagɛ mɔ ratanɛ, ya, “Rɛfɛ oni ŋɔ ɔtɨmɛrɛ bani bayua, ɔkanɛ bɛ ya bakakpɛɛ bagbuga-retu bajɛ ɔkɨm Sisa mɨnɛ ya amɔ mɔ ɔra Ɔnyaŋɛ-rokuku, Ɔkɨm oyua.”

3 Pailɛd ɔsɨna Jisɔs, “Awu mɔ ara ɔkɨm bani Jus-ɛ?” Jisɔs ɔfɛlɛ mɔ ramu ya, “Awu mɔ atanɛ kanya.”

4 Mɨnɛ Pailɛd ɔkanɛ bakɨm bajɔmɔ-kɔya na bani mbɛ babɨbi kafa ya, “Nkifɛ mbu oni ŋɔ osi.”

5 Nsu baruŋɛ rɔsɔ ya, “Na rɛkpɛbɛ rɛmɔ ɔbɨnɛ kɔfɔdkanɛ botima bani na Judia. Ɔbɨnɛ na Galili mɨnɛ kunku owu nfa.”

Batigɛ Jisɔs bajɛ Hɛrɔd

6 Ndi Pailɛd ofugɛ mbu batanɛ, ɔsɨna bɛ ara oni ŋɔ osi Galili. 7 Ndi owu gbɨri ya Jisɔs osi mbari ŋɔ ɔra irɨma ntunɛ Hɛrɔd, otigɛ mɔ ɔjɛ Hɛrɔd, ŋɔ ɔra mɨnɛ na Jɛrusalɛm kegbu kanci.

8 Ndi Hɛrɔd ɔfɛ Jisɔs, ɔfɔnɔ ɔkɨmkɨm kɔrɔmetima, ndi ofugɛ ratanɛ ɔbaŋ mɔ mɨnɛ ɔra oduga kɔfɛ mɔ rayi ɛrɛn nɛ. Ɔra oduga kɔfɛ Jisɔs osi gba kɔba-ɛkpaju. 9 Hɛrɔd ɔsɨna Jisɔs rasɨn ecii, nsu Jisɔs okisɛ mɔ remu. 10 Bakɨm bajɔmɔ-kɔya na bakpɛbɛ Ibina Mosis babari kafa mɨnɛ batanɛ bokukubi ratanɛ bawu babaŋa Jisɔs. 11 Hɛrɔd na baju-reku bamɔ basɔŋɔ Jisɔs mɨnɛ basɛgɛlɛ mɔ. Bayuɛ mɔ yɛ na brika bɔfɔ baŋbɨnɛnɛ batigɛ mɔ bajɛ Pailɛd. 12 Na reyi ndi Hɛrɔd na Pailɛd bakɔnanɛ na bacɛmɛ; nabɔ reyi ndi, barakpa na ɛban.

Bayɛrɛ itiba rɔbɔ bajɛ Jisɔs

(Mt 14:1-12; Mk 6:14-29)

13 Pailɛd ojia bakɨm bajɔmɔ-kɔya, bani retu, na bani mbɛnka kwacɛnɛ, 14 ɔkanɛ bɛ ya, “Anu bɛ minwu na oni ŋɔ ɛyɛ emia ya okubɛ botima bani bayua. Nsɨn mɔ rasɨn na rɔsɔ ronua nkifɛ kwa oruɛ na mbu mintanɛ mimbaŋa mɔ. 15 Tum Hɛrɔd okifɛ kwa oruɛ, ɔŋbɨnɛnɛ otigɛ mɔ ɔjɛ yu. Aya minfɛ, okiruɛ Ibina nji rekoŋu mɔ. 16 Nkodu mɔ na yɛ nsɛ mɔ ibɔ orua.” 17 Kegbu Pailɛd ɔra ɔkɨm, ɛfɔnɔ rɛmaɛ ndi ya ɔkɔkɔsɛ oni nkpɔkɔbi ŋɔnɛ ŋɔ ɔra na ɛtɔ-nkpɔkɔbi ɔjɛ bɛ na kɛtɔmɔ cia taŋɛ.

18 Abɛ fɛb bakuga, “Ŋua Jisɔs jɛ yu Barabas!” 19 Bamura Barabas na ɛtɔ nkpɔkɔbi ndi ɔtɨmɛrɛ rɔrɛ mɨnɛ oŋua oni.

20 Pailɛd otimanɛ kɔsɛ Jisɔs ibɔ, ɔkpɔlɛ bɛ okwɛ. 21 Nsu bakuga bakwɛ, “Mura mɔ na bɔkpati! Mura mɔ na bɔkpati!”

22 Pailɛd ɔtanɛ na abɛ okwɛ begbu bɛtaa, “Bagadɔdi, bagabobi mbu owusi? Nkifɛ mbu owusi ndi nkoŋu mɔ. Nkodu mɔ na yɛ nsɛ mɔ ibɔ.”

23 Nsu bakuga kaŋkaŋ ya bamura mɔ na bɔkpati, na kekurɛ kɛtɨbi rekuga rɛbɛ rejaga ɛyɔ. 24 Pailɛd ɔyɛrɛ itiba rɔbɔ ɔjɛ Jisɔs mbu bara basɨna. 25 Ɔsɛ oni ŋɔ ɔra na ɛtɔ nkpɔkɔbi ŋɔ ɔtɨmɛrɛ rɔrɛ mɨnɛ oŋua oni ŋɔ abɛ baduga ɔjɛ bɛ, nsu Jisɔs ɔsɛ ibɔ ɔjɛ bɛ basi kɛmanci baduga.

Bamura Jisɔs na bɔkpati

(Mt 27:32-44; Mk 15:21-32; Jn 19:17-27)

26 Aya baju-reku baruŋɛ na Jisɔs, bakɨmanɛ Saimɔn ŋɔ osi Sirin, ŋɔ osi na rɔrɛ rɔrɛnɛ oruŋɛ Jɛrusalɛm. Babɨma Saimɔn, bajɛ mɔ bɔkpati mbu babotunkanɛ ya ɔsɔgɛ ɔnyɛgɛ Jisɔs ɛyɛbirɨma. 27 Bani ecii banyɛgɛ mɔ. Nakɔrɔ kɔbɛ babanɛ bajuju bara rika, mbɛ bafaba ijiɛ mɨnɛ babiŋɛ mɔ. 28 Jisɔs ocimɛnɛ ɔkanɛ bɛ ya, “Babanɛ Jɛrusalɛm! Kabi mi nu, bi bɔkpaju bonua na bɔ banua. 29 Fɛŋɛ kegbu kukewu nci minkɔkanɛ ya, ‘Bɔfa bonua anu bakuma, rajua ndɛ rabɔrakigi nɔŋɔma na raba ndɛ bɔ babɔ bakiginɔŋɔ ŋɔ!’ 30 Na kegbu bani bakɔkanɛ ikuku irɛnɛ ya, “Gbirɛ nyakanɛ yu!” Mɨnɛ ikuku ikikɨri, “ŋɨba yu!” 31 Ara bani kubasi birɛ mbi ndi keti kɛra kebin, bu bɔkɔjagi ara keci?”

32 Barumanɛ iti ifa bajuju, abɛ iti ifa mbɛ baji, basɔgɛ bɛ mɨnɛ na kɔrɔ bakaŋu na Jisɔs. 33 Ndi bawu na kwa bajia ya “Kɛkpaŋankpu retu,” ^{▼▼Kɛkpaŋankpu retu Bani bakigbɨra mbu bosi na bajia kwancɛ kɛkpaŋankpu retu. Ɛra aya rokuku nsan rɔra aya kɛkpaŋankpu retu, ara kanyanɛ, kwetumɛ ya baju-reku mbɛ Rom baŋua bani ecii kafa.} bamura Jisɔs kafa, na baji mbɛ bafa, ŋɔnɛ na koruma kɔmɔ, ŋɔka na kofiri kɔmɔ. 34 Jisɔs ɔkanɛ ya, “Mintɛ! Gbɛ sugɛ bɛ, ndi bakigbɨra mbu basiŋɛ.” Batuba bagɨri na bayibanɛ bɔfɔ bɔmɔ bajɛ bɔkpaju bɔbɛ.

35 Bani babari kafa barɔŋɛ kɛmanci bani retu Jus basɔŋɔ mɔ: Ya, “Ɔnyaŋɛ bani; yɔgɛ mɔ ɔnyaŋɛ ɛkpaju ɛmɔ ara amɔ ɔra Ɔnyaŋɛ-rokuku ŋɔ Ɛbrɔkpabi ewura!”

36 Baju-reku mɨnɛ bawu sɔŋ mɔ, bacɛ bakunɛ mɔ, bajɛ mɔ mantugi. 37 Mɨnɛ bakanɛ mɔ ya, “Ara awu ara ɔkɨm bani Jus, nyaŋɛ ɛkpaju ɛyɛ!”

38 Barɛ balagɛ birebirɛ kɛkpati rasinkanɛ nci bamura mɔ ya: “NFA NA ƆKƗM BANI JUS.”

39 Oji ŋɔnɛ ŋɔ bamura kafa ɔsɔŋɔ Jisɔs mɨnɛ, ya, “Awunɛ ara Ɔnyaŋɛ-Rokuku-ɛ? Nyaŋɛ ɛkpaju ɛyɛ na ayu!”

40 Nsu oji ŋɔka otunɛ mɔ ya, “Akifɔnɔ bofu Ɛbrɔkpabi-ɛ? Rasinkanɛ ndɛ afɛŋɛ nɛ amɔ mɨnɛ ɔfɛŋɛ? 41 Ayu rɛfɛŋɛ rasinkanɛ ndɛ na mbu resi; Nsu oni ŋɔ okisi bobi tumbunɛ.”

42 Mɨnɛ ɔkanɛ ya, “Jisɔs, jinɛnɛ mi ara awu aya ɔkɨm.”

43 Jisɔs ɔfɛlɛ mɔ ramu ya, “Nkanɛ wu kpikpɛ mɔ ɛrɛn kuatumɛ na ami na rɔrɛ-Ɛbrɔkpabi.”

Rɔbɔ Jisɔs

(Mt 27:45-56; Mk 15:33-41; Jn 19:28-30)

44 Igbaŋ jubi na ifa nji ekujaga, keru ketuba kwa nancɛnɛ ta igbaŋ itaa. 45 Ndi royi rɔyɨma, ikpege nji bakɨnɛ na kamagakwa ɛtɔ-Ɛbrɔkpabi iwarɛ bɛbɛm bɛfa. 46 Jisɔs ojia na remu rɛrɛnɛ, “Mintɛ! Nsɛ ibɔ na kɛkɔ kemia nrɔbi wu na ibɔ.” Ndi ɔtanɛ ramu ndɛ, owumanɛ kekurɛ kɛtɨbi ɔba.

47 Ɔkɨmkɨm oni baju-reku, ndi ɔfɛ mbu bɔjaga, ɔka Ɛbrɔkpabi mɨnɛ ɔkanɛ ya, “Kpikpɛ oni ŋɔ brika oni!” 48 Ndi bani mbɛ babɨbi kafa baduga kɔfɛ mbu bɔjaga, bafɛ mbu bɔjaga, abɛ fɛb baŋbɨnɛnɛ bagbaŋɛ, balɨba ibɔ na bikɨm nji erun. 49 Nsu bani fɛb mbɛ bagbɨra Jisɔs, na babanɛ mbɛ banyɛgɛ mɔ bɨnɛ na Galili, babari nyaŋɛnyaŋɛ barɔŋɛ.

Kofiɛ Jisɔs

(Mt 27:57-61; Mk 15:42-47; Jn 19:38-42)

50 Ɛfɔnɔ orumanɛ ŋɔ oyinɛ Josɛb, ɔra na ogbigbɛ ŋɔ batiba Jisɔs, ɔra brika oni mɨnɛ ɔfɔnɔ rejubi, 51 okinyiɛ na retiba mɨnɛ na resi rɛbɛ. Osi Arimatia rika Judia. Mɨnɛ amɔ okikɔ ɔra ofumanɛ rewu rɔrɛ-rɛkɨm Ɛbrɔkpabi. 52 Oruŋɛ ɛyɛ Pailɛd ɔkasɨn ɛkpaju Jisɔs. 53 Oriɛ oburɛ ɛkpaju Jisɔs na bɔkpati rasinkanɛ mbu bamura mɔ mɨnɛ ofua mɔ na ɔkpɔwɔ, oruŋɛ yɛ ɔkarɔbi mɔ na kɔba nku batɔ na itakpa kwancɛ babɔ bakigi nɔŋɔ fiɛ oni. 54 Reyi kotubɛrɛ ɛkpaju, mɨnɛ Sabad okowu kɔbɨnɛ.

55 Babanɛ mbɛ banyɛgɛ Jisɔs bɨnɛ na Galili baruŋɛ na Josɛb bakafɛ kɔba mɨnɛ kɛmanci bayɔmɛ mɔ rika kɔba. 56 Baŋbɨnɛnɛ yɛ bagbaŋɛ, bakafɨri rawa na itana nji ifɔnɔ brika kɛnyam, nji bakɔbɔ obureburɛ. Nsu baŋunɛnɛ reyi Sabad nansɛrɛ Ibina Mosis ikanɛ.