Luke 24

Jisɔs ofiɛ na rɔbɔ

(Mt 28:1-10; Mk 16:1-8; Jn 20:1-10)

1Isobisobi reyi kɔka babanɛ barua na kɔba Jisɔs, na rawa ndɛ bawu fɨri. 2Bafɛ rɛta ndi babɛ batɨmɛ rɛma kɔba babuŋunu basɛ, 3nsu ndi banɔ rika, bakifɛ ɛkpaju Ɔkɔ-Rokuku Jisɔs. 4Mbu bafɛ bɔba bɛ ɛkpaju, ndi ɔmɛ kandi barumanɛ bafa na bɔfɔ mbu bɔraga aya ɔkpɔwɔ babari bɛ na rokpinkpa. 5Na bofu kambu, babanɛ kambɛ batɨbɛ isɔ ibɛ na rɔcɛ, mɨnɛ barumanɛ kambɛ bakanɛ bɛ ya, ‘‘Bu na mingumɛ oni obin na rɛkaba babureburɛ? 6Nfa ɔra; ofiɛ na rɔbɔ! Jinɛnɛ nu mbu ɔkanɛ nu, ndi ɔbɛnɛ na anu na Galili: 7‘Bakɔkɔsɛ ibɔ na Wɔ Oni barɔbɔ na ibɔ basiŋɛ bobi, mbɛ bakomuri mɔ na bɔkpati-rasinkanɛ mɨnɛ ara esi mɔ rayi rataa na kɔba kuofiɛ na rɔbɔ.’” 8Babanɛ kambɛ bajinɛnɛ yɛ ramu Jisɔs.

9Ndi basi na kɔba bagbaŋɛ, bakanɛ Apɔsɨl Jisɔs iti jubi na ŋɔnɛ na mbɛka birɛ mbi fɛb. 10Babanɛ mbɛ bara Meri Madalin, Joana, Meri minka Jems; abɛ na babanɛ mbɛka mbɛ bara na abɛ bakanɛ bapɔsɨl birɛ mbi. 11Nsu bapɔsɨl Jisɔs bakinyiɛ na mbu babanɛ kambɛ bakanɛ bɛ, ndi kɔtanɛ kɔbɛ kɔrabɛ aya gba ɛyɛŋɛyɛŋɛ. 12Nsu Pita ɔgbɛ ɔbɨrɛ oruŋɛ na kɔba; Ɔka tuɛnɛ ɔrɔ rika, ɔfɛ ɔkpɔwɔ ŋɔ babɛ bafua mɔ okpin, ɔŋbɨnɛnɛ ɔgbaŋɛ, etima ɛcɛŋɛ na mbu bowujagi.

Mbu bɔjaga na ɛyɔ ndi baruŋɛ Ɛmaus

(Mk 16:12,13)

13Reyi kandi dinɛdinɛ banyɛgɛ Jisɔs iti ifa bara baruŋɛ na rorirɛ ndu royinɛ ya Ɛmaus. Rorirɛ ndu rɔra mal banabataa bɨnɛ na Jɛrusalɛm. 14Bara batanɛ na bacɛmɛ, babaŋa gba nambunɛ mbu bowujagi. 15Aya batanɛ mɨnɛ bakura babaŋa ratanɛ ndɛ, Jisɔs amɔ okikɔ ɔcɛ okunɛ bɛ ɔcɛŋɛ na abɛ, 16bafɛ mɔ nsu bakicɛ mɔ.

17Jisɔs ɔsɨna bɛ ya, “Minkura bu anu iti ifa aya mincɛŋɛ?” Babarakpa kwacɛnɛ, isɔ ibɛ iriɛ wɔg. 18Ŋɔnɛ ŋɔ oyinɛ Kɨliopas ɔsɨna Jisɔs ya, “Awuawu mɔ ara ocincɛ ŋɔ ɔra na Jɛrusalɛm ŋɔ ɔbɔ okigbɨra birɛ mbi bɛjaga kaka rayi ndɛ-ɛ?”

19“Baga birɛ?” Jisɔs ɔsɨna. Bafɛlɛ mɔ ramu ya, “Abaŋa Jisɔs ŋɔ Nasarɛd. Apɔsɨl Ɛbrɔkpabi, remu rɛmɔ rɛfɔnɔ nsɨm na resi rɛmɔ na rɔsɔ Ɛbrɔkpabi mɨnɛ na rɔsɔ bani. 20Bakɨm bajɔmɔ-kɔya na bani retu bayua basɛ mɔ ibɔ bajɛ ya baŋua, mɨnɛ bamura mɔ na bɔkpati-rasinkanɛ; 21Ayu rɛra rerigɛ etima ya amɔ mɔ ɔra oni ŋɔ ɔkɔsɛ Isɨrɛl na botiga. Na birɛ mbi fɛb, ɛrɛn na rayi rataa ndi birɛ mbi bɛjaga. 22Kokuɛ kafa babanɛ bayua bajuju mbɛ bara na ogbigbɛ oyua basi ɛkpaju ɛba yu. Barua na kɔba isobisobi, 23nsu bakifɛ ɛkpaju ɛmɔ. Baŋbɨnɛnɛ bawukanɛ yu ya abɛ bafɛ banyiɛ-rotuma Ɛbrɔkpabi mbɛ bakanɛ bɛ ya ɔra obin. 24Mɨnɛ bacɛmɛ bayua bajuju mbɛ bara na ogbigbɛ oyua baruŋɛ na kɔba bakafɛ nansɛrɛ babanɛ kambɛ bakanɛ, nsu bakifɛ Jisɔs.” 25Jisɔs ɔkanɛ bɛ yɛ ya, “Minsɨlasɨla, mɨnɛ minwaga kɔfɔn renyiɛ na gbanambunɛ mbu Bakanɛ-rotuma Ɛbrɔkpabi bakanɛ! 26Minkigbɨra ya Ɔnyaŋɛ-rokuku ɔkɔkɔfɛ rasinkanɛ ndɛ nayɛ ɔtama rɛkɨm rɛmɔ-ɛ?” 27Jisɔs obɨnɛ kɔkanɛ bɛ bɨnɛ na Mosis na bɔkpa manrɛ bakanɛ-rotuma Ɛbrɔkpabi mbɛka fɛb, ɔkabara ɔjɛ bɛ mbu Manrɛ Ɛbrɔkpabi mankanɛ mambaŋa mɔ.

28Aya bakunɛ rorirɛ ndu baruŋɛ, Jisɔs osi aya amɔ ɔbɛnɛ oruŋɛ ɛyɛrɔsɔ; 29Nsu bakpɔlɛ mɔ ya, “Tumɛ na ayu, ka reyi rɛta; kwa kabɨnɛ kobi.” Oruŋɛ ɔkatumɛ na abɛ.

30Ndi otumɛ na abɛ kodi bedidi, ɔbɛ ɔyɔ, ɔsamɛ Ɛbrɔkpabi, ɔgbagɛ mɔ mɨnɛ ɔjɛ bɛ. 31Kafa ndi jɛnɛ rakpanɛ bɛ mɨnɛ bacɛ mɔ, nsu ɔyɨma bɛ na jɛnɛ. 32Basɨna bacɛmɛ, “Nyan di rɛkɔ kabara kɔrɔmetima nku rɛfɔnɔ ndi ɔra ɔtanɛ na ayu na ɛyɔ mɨnɛ ɔkabara Manrɛ Ɛbrɔkpabi ɔjɛ yu?” 33Bagbɛ baŋbɨnɛnɛ ndu Jɛrusalɛm ɔmɛ kandi. Bakakɨmanɛ bacɛmɛ mbɛka iti jubi na ŋɔnɛ mɨnɛ na mbɛ bara na abɛ, babɨbi kwacɛnɛ 34mɨnɛ ya, “Ɛra kpikpɛ! Ɔkɔ-rokuku ofiɛ na rɔbɔ mɨnɛ ɔkɔgɛ Saimɔn ɛkpaju ɛmɔ.” 35Mbɛ iti ifa bakanɛ kɔbɛ kɔsɛ mbu bɔjaga bɔjɛ bɛ na ɛyɔ, mɨnɛ kɛmanci bacɛ Jisɔs ndi ɔgbagɛ ɔyɔ.

Mbu banyɛgɛ Jisɔs bakɔkosi

(Mt 28:16-20; Mk 16:14-18; Jn 20:19-23; Ak 1:6-8)

36Aya babɛnɛ bakanɛ kɔsɛ kɔbɛ, Jisɔs amɔ okikɔ owubari na abɛ mɨnɛ ɔkanɛ bɛ ya, “Reŋunɛ retumɛ na anu.”

37Ɛkpaju ɛyɛbɛ mɨnɛ bofu bosi bɛ, barɔŋɛ ya abɛ bafɛŋɛ ɔsa. 38Nsu Jisɔs ɔkanɛ bɛ ya, “Bu na bofu bosi nu? Bu na minkifɔnɔ renyiɛ-etima? 39Rɔ nu ramɛgɛ ramia na bɔkpaga bomia. Ami! Kpɨma mi nu minfɛ; risa riki fɔnɔ eti ɛkpaju na rakɨba, aya minfɛ mi nfɔnɔ.”

40Ndi ɔkanɛ bɛ ramu ndɛ, ɔkɔgɛ bɛ ramɛgɛ na bɔkpaga bɔmɔ. 41Babɛnɛ bakiginyiɛ, nsu kɔrɔmetima na kɔba-ɛkpaju kojugi bɛ. Ɔsɨna bɛ, “Minfɔnɔfɔnɔ gba nfa kodi-ɛ?” 42Bajɛ mɔ kɛkpɨn eti-mani nji bajɨbajɨba, 43ɔtama odi na jɛnɛ rabɛ.

44Ɔkanɛ bɛ yɛ ya, “Nfa na mbu nkanɛ nu ndi mbɛnɛ na anu: Gbanambunɛ mbu barɛ babaŋa mi na Ibina Mosis, bakanɛ-rotuma Ɛbrɔkpabi mɨnɛ na Sam bɔkɔkɔjagi kanya.”

45Oyirɛ bɛ yɛ botima kɔjɔɛ Manrɛ ɔkɨm. 46Mɨnɛ ɔkanɛ bɛ ya, “Barɛ ya, Krais kuɔfɛ rasinkanɛ mɨnɛ kuofiɛ na rɔbɔ ara esi mɔ rayi rataa na kɔba, 47mɨnɛ na rirɨna rimɔ rotuma kosugɛ bobi mɨnɛ kɔgbɛ asugɛ bobi kubakanɛ rokuku ndɨm, bɨnɛ na Jɛrusalɛm. 48Minkɔkɔkanɛ gbanambunɛ mbu bɔjaga. 49Mɨnɛ amiokikɔ kuntigɛ nu mbu Mintɛ omia ɔsa ɔŋɔŋɔ. Nsu minkɔ kofumanɛ nfa na Jɛrusalɛm ta nsɨm ŋɔ osi na kaju oriɛ ɔnyɛgɛ nu.

Jisɔs ɔŋbɨnɛnɛ na kaju

(Mk 16:19,20; Ak 1:9-11)

50Ndi ɔbɛ bɛ ɔjaga rika rɔrɛ baruŋɛ na rorirɛ Bɛtani, obirɛ kɔbɔ ɔjɛ bɛ reŋunɛ. 51Aya ɔjɛŋɛ bɛ reŋunɛ, osugɛ bɛ mɨnɛ babɛ mɔ oruŋɛ na kaju. 52Bakpɔgɛ mɔ minɛ baŋbɨnɛnɛ na Jɛrusalɛm na ɔkɨmkɨm kɔrɔmetima. 53Mɨnɛ batumɛ na ɛtɔ-Ɛbrɔkpabi, bakaŋɛ Ɛbrɔkpabi.