Luke 4

Eyumɛ Jisɔs

(Mt 4:1-11; Mk 1:12,13)

1Ndi Jisɔs osi ndu manja Jɔdan ɔgbaŋɛ, nsɨm Keriragi-kɛkɔ ɔra na amɔ, mɨnɛ kɛbɛmɔ keruŋɛ na kwabani babɔbatumɛ, 2kwa kɛkɔ-kebi kɛrɔbɔmɔ na eyumɛ na iram rayi ifa. Mɨnɛ na kegbukanci fɛb okiditumgba. Ndi ɔyɛ, ŋbɔ minrummɔ.

3Kɛkɔ-kebi kɛkanɛ Jisɔs ya, “Ara awu Wɔ Ɛbrɔkpabi, jɛ nsɨm rɛtandi recimɛnɛ ɔyɔ.”

4Jisɔs ɔkpɛɛ ci ya, ‘‘Barɛ ya: ‘Oni otumɛ na rokpin na ɔyɔ amɔamɔ.’” ▼

▼Dit 8:3

5Kɛkɔ-kebi kɛbɛ yɛ Jisɔs keruŋɛ na kerigɛ mɨnɛ kegbucinɛ kɛkɔgɛmɔ botu-rɛkɨm rokuku ndɨm. 6Mɨnɛ kɛkanɛmɔ ya, “Kunjɛwu nsɨm na boyimbu fɛb. Basɛ ibɔ na birɛmbi fɛb bajɛmi, mɨnɛ nkɔjɛ oni naŋɔnɛ ŋɔ ɔragami ya njɛ. 7Ara akpɔgɛmi, birɛmbi fɛb bɛra bɛyɛ.”

8Jisɔs ɔfɛlɛ ci ramu ya, ‘Barɛ ya: “Kpɔgɛ Ɔkɨm-Kaju Ɛbrɔkpabi ɛyɛ mɨnɛ tuga ji ajiaji!”

9Na kekurɛ kɛtɨbi, kɛkɔ-kebi nci kɛbɛ Jisɔs keruŋɛ Jɛrusalɛm kɛka barɛmɔ na esisɔ kerigɛ ɛtɔ-Ɛbrɔkpabi. Kɛkanɛmɔ ya, “Ara awu Wɔ-Ɛbrɔkpabi fuguru kura na rɔcɛ. 10Ndi manrɛ Ɛbrɔkpabi mankanɛ ya,
“‘Ɛbrɔkpabi kuɛjɛ banyiɛ-rotuma
bamɔ nsɨm ya bakpɛmɛwu,
11mankanɛ mɨnɛ ya, abɛ kubayabɛwu na ibɔ ibɛ
esikafa akatɨrɛ kɛkari kɛyɛ na rata.’”
12Jisɔs ɔfɛlɛ ci ramu ya, manrɛ Ɛbrɔkpabi mankanɛ mɨnɛ ya, “Karɔbɔ Ɔkɨm-Kaju, Ɛbrɔkpabi ɛyɛ na eyumɛ.’”

13Ndi kɛkɔ-kebi kewuyumɛ Jisɔs sɛn na ɛyɔ nanjinɛ, kesugɛmɔ kpa.

Jisɔs ɔbɨnɛ rɛsɛ rɛmɔ na Galili

(Mt 4:12-17; Mk 1:14,15)

14Ndi Jisɔs ɔŋbɨnɛnɛ na Galili, mɨnɛ nsɨm Keriragi-kɛkɔ ɔra na amɔ. Rɛkanɛ rɛbaŋamɔ rekudkanɛ kwanancɛnɛ. 15Ɔkpɛbɛ na basam-rɔrɛ bani Jus, mɨnɛ oni naŋɔnɛ ɔkamɔ.

Bani Nasarɛd bakɨna Jisɔs

16Jisɔs ŋbɨnɛnɛ oruŋɛ Nasarɛd, kwabayɛmɔ, mɨnɛ nansɛrɛ ɔmɔ, oruŋɛ na ɔsam-rɔrɛ reyi Sabad. Ndi ɔgbɛ ɔbara koji manrɛ Ɔkɨm, 17bajɛmɔ kɛkpa-manrɛ ɔkanɛ-rotuma Ɛbrɔkpabi Aisaya. Oyirɛci mɨnɛ ɔfɛ kekpena nci barɛ ya:
18“Kɛkɔ Ɔkɨm-Kaju kɛra na ami,
ndi ɔrami ɔsɛ kɔkanɛ baram brika ramu.
Otigɛmi ya,
nwukanɛ bani mbɛbara na botiga ya,
kubasɔrɔ na botiga bɔbɛ,
mɨnɛ bajagajɛnɛ kubaŋbɨnɛnɛ bafɛ ɛyɔ,
mɨnɛ kɔsɛ oni naŋɔnɛ ŋɔ ɔra na rasinkanɛ.
19Ɔkanɛ mɨnɛ ya, kegbu kebigɛ nci Ɔkɨm-Kaju ɔkɔnyaŋɛ bani bamɔ.’”

20Jisɔs oyi kɛkpa-manrɛ, mɨnɛ ɔsɛ ibɔ na aci ɔjɛ oni ŋɔ ɔjɛmɔ nsu otumetumɛ. Oni naŋɔnɛ rika ɔsam-rɔrɛ ɔrɔŋɛmɔ. 21Jisɔs ɔkanɛbɛ ya, “Mbu minfugɛmi njia na kɛkpa manrɛ nci ɛrɛn bɔjagi cɛrɛrɛ.”

22Abɛ fɛb ojugabɛ na kɛrɔ mɨnɛ ɛkpaju ɛbabɛ na ɛdɔ ramundɛ bafugɛ mɔ ɔtanɛ. Babɨnɛ kɔsɨnnɛ, “Wɔ Josɛb nɛnya-ɛ?”

23Jisɔs ɔkanɛ bɛ ya, “Ɛra kpikpɛ ya kuminkanɛ mi rɛkana ndi, ‘Ɔgbana ifiɛ, bɛrɔsɔ gbananɛ.’ ‘Kuminkanɛ mi mɨnɛ ya, nsi birɛmbi minfugɛ ya nsi na Kapanɔm nfa na rɔrɛ romia.’”

24Jisɔs okwɛ ya, “Nkanɛ nu kpikpɛ, ɔkanɛ-rotuma Ɛbrɔkpabi ɔra ŋɔ batama mɔ na rɔrɛ rɔmɔ. 25Yumɛnu ratu: ɛra kpikpɛ ya na kegbu Ɛlaija, babanɛ ekud ecii bara na Isɨrɛl ndi keyum kɛbara ju ritaa na rafɛ ratabarataa mɨnɛ ŋbɔ minɔ kwanancɛnɛ. 26Nsu bakitigɛ Ɛlaija ɛyɛ oni tumŋɔnɛ na Isɨrɛl, ekicia batigɛmɔ ɛyɛ ɔwanɛ ekud ŋɔ ɔra na rɔrɛ Sarɛfad okunɛ rɔrɛ Sidɔn. 27Mɨnɛ bani bara ecii mbɛ bafimɛ bafun na Isɨrɛl kegbu ɔkanɛ-rotuma Ɛlaicia; nsu tumŋɔnɛ bakigbana ekicia Naman ŋɔ otumɛ na Siria.”

28Ndi bani mbɛbara na ɔsam-rɔrɛ bafugɛ mbu Jisɔs ɔtanɛ, botima bɔmabɛ. 29Bagbɛ babara, bajamkanɛmɔ bajaga basugɛ rɔrɛ, babɛmɔ baruŋɛ birebirɛ rokuku kwabari rɔrɛrɔbɛ. Batimanɛ kɔtɨnɛmɔ batuba ntunɛ rokuku, 30nsu ɔcɛ ociabɛ manti rɛkaba mɨnɛ oruŋɛ ɛmɔ ɛyɔ.

Jisɔs okpu kɛkɔ-kebi

(Mk 1:21-28)

31Jisɔs oruŋɛ Kapanɔm, rɔrɛndu rɔra na Galili, kwaɔkpɛbɛ bani reyi Sabad. 32Rɛkpɛbɛ rɛmɔ rɛbabɛ ɛkpaju ndi ramu ramɔ rafɔnɔ nsɨm.

33Kafa rika ɔsam-rɔrɛ, ɛfɔnɔ oni ŋɔ ɔfɔnɔ kɛkɔ-kebi. Okuga kaŋkaŋ, 34“Ee! Jisɔs ŋɔ osi Nasarɛd, adugabu na ayu? Awu kokubɛyu-ɛ? Ŋbɨri oni ŋɔ ara. Ara keriragi onyiɛ-rotuma Ɛbrɔkpabi.”

35Jisɔs ɔŋama ci, “Ŋuabɛm mɨnɛ jagamɔ na ɛkpaju!” Kɛkɔ-kebi nci kɛmagamɔ na rɔcɛ na rɔsɔrɔbɛ mɨnɛ kɛjagamɔ na ɛkpaju kekisimɔ tumgba.

36Ɛkpaju ɛba bani fɛb mbɛ barakafa mɨnɛ babɨnɛ kɔkanɛ bacɛmɛ, “Bagadɔ ramu dɛnya? Na erug mɨnɛ na nsɨm oni ŋɔ ɔŋama bɔkɔ-bobi mɨnɛ bɔjaga na bɔkpaju bani!” 37Mɨnɛ rɛkanɛ rɛbaŋa resi Jisɔs rekudkanɛ irɛ fɛb mbari kaŋɔ.

Jisɔs ɔgbana bani ecii

(Mt 8:14-17; Mk 1:29-34)

38Jisɔs osugɛ ɔsam-rɔrɛ oruŋɛ na ɛtɔ Saimɔn. Ndi ɔjagakaka, bakanɛmɔ ya jobirɔbɔ ɔsa minka ɔwa Saimɔn. 39Oruŋɛ ɔkabari na kwaɔyɔm mɨnɛ ɔŋama jobirɔbɔ ya rosugɛmɔ. Mɨnɛ rosugɛmɔ ɔmɛ kandi, ɔbɨnɛ kɔyɛbɛ.

40Ndi royi rotuɛ, bani mbɛ bafɔnɔ bani na bɔlɨŋa ifiɛ nanjinɛ basɔgɛbɛ baruŋɛ ɛyɛ Jisɔs. Origɛ naŋɔnɛ ibɔ imɔ mɨnɛ ɔgbanabɛ fɛb. 41Bɔkɔ-bobi mɨnɛ bɔjaga bani ecii na bɔkpaju, bokuga, “Awu Wɔ Ɛbrɔkpabi!” Nsu Jisɔs ɔŋamabu ya bɔkatanɛ, ndi bɔgbɨri ya amɔ mɔ ɔra Ɔnyaŋɛ-rokuku.

42Ndi reyi rɛcɛ Jisɔs osugɛ rɔrɛ oruŋɛ ɔkatumɛ na kwa igbɛ. Bani babɨnɛmɔ kodugi. Mɨnɛ ndi bafɛmɔ, babuma kɔdɔbɛlɛmɔ ɔkasugɛbɛ. 43Nsu ɔkanɛbɛ ya, “Nkɔkɔkanɛ irɛ ijuju Brika Ramu mbaŋa Rɔrɛ-rɛkɨm Ɛbrɔkpabi mɨnɛ, ndi nambu Ɛbrɔkpabi etigɛmi kosi.” 44Mɨnɛ oruŋɛ rɔsɔ ɔkanɛ bani brika ramu Ɛbrɔkpabi na basam-rɔrɛ Judia.