Luk 5 | IkoSC | STEP | Reyi dinɛ Jisɔs ɔbari na rɛga regbu Jɛnɛsarɛd, ɔkpɛbɛ bani mbɛ bafuamɔ kofugɛ ramu Ɛbrɔkpabi.

Luke 5

Jisɔs ojia kɛbɛrɔsɔ banyɛgɛ mɔ

(Mt 4:18-22; Mk 1:16-20)

1 Reyi dinɛ Jisɔs ɔbari na rɛga regbu Jɛnɛsarɛd, ɔkpɛbɛ bani mbɛ bafuamɔ kofugɛ ramu Ɛbrɔkpabi. 2 Ɔfɛ rakugi rafa ndɛ babɨma boti-mani balagɛ na rɛga. Bakikɔ bajagi na adɛ baruŋɛ minyiri mimbɛ. 3 Jisɔs ɔnɔrika kokugi kunɛ, nku Saimɔn, ɔkanɛmɔ ya ɔtɨnɛku kɨri osugɛ rɛga. Jisɔs otumɛ rika kokugi ɔkpɛbɛ bani mbɛ babɨbi na rɛga.

4 Ndi ɔtanɛ sɛn, ɔkanɛ Saimɔn ya, “Tɨnɛku korua na kwamani mandɨmɛdɨmɛ mɨnɛ tuba minyiri minua, awu na bani bayɛ kɔbɨm boti.”

5 Saimɔn ɔfɛlɛmɔ ramu ya, “Ita, resi ɛgbasi rɛsɛ ta reyi rɛcɛ tumgba rekibɨma. Nsu ndi akanɛ kanya, kuntuba minyiri.”

6 Batuba minyiri kɛmanci ɔkanɛbɛ, mɨnɛ babɨma enyi boti-mani ta minyiri mimbɛ mimbɨnɛ kɔwarɛ. 7 Bajia bacɛmɛ mbɛka na kokugi nkuka ya bawutɔnɛbɛ. Bawu, balaŋa boti-mani na rakugi ndɛ rafa, rajuga, ta rabɨnɛ kɔsɨm.

8 Ndi Saimɔn Pita ɔfɛ mbubɔjaga, ɔkpɔgɛ radu na rɔsɔ Jisɔs ɔkanɛ ya, “Ɔkɔ-rokuku, taŋɛ, sugɛmi! Ami osibobi!” 9 Ɛkpaju ɛyɛ Pita na bani mbɛ bara na amɔ na enyi boti mbu babɨma. 10 Bani mbɛbara na amɔ bara Jems na Jɔn, bɔ Sɛbɛdi, ɛkpaju ɛyɛbɛ mɨnɛ.

Jisɔs ɔkanɛ Saimɔn ya, “Kafɔnɔ bofu! Bɨnɛ kunku taŋɛ rɔsɔ, akɔbɨnɛ kɔbɨm bani.” 11 Ndi bafira rakugi ndɛ bakalagɛ na rɛga, basugɛ gbanambunɛ, banyɛgɛ Jisɔs.

Jisɔs ɔgbana orumanɛ bafun

(Mt 8:1-4; Mk 1:40-45)

12 Kegbucinɛ Jisɔs ɔra na rɔrɛ ndu orumanɛ ŋɔnɛ ofimɛ bafun. Ndi ɔfɛ Jisɔs, ɔtɔmɔ na bɛya ɔkpɔlɛ, “Ɔkɔ-rokuku, afɔn nsɨm kɔgbanmi, ara ɛragiwu.”

13 Jisɔs ɔnabɛ kɔbɔ ɔkpɨmamɔ, mɨnɛ ɔkanɛmɔ ya, “Ɛragimi, “Raga!” Mɨnɛ ɔmɛkafa bafun basugɛmɔ.

14 Jisɔs ɔkanɛmɔ ya, “Kakanɛ oni tumŋɔnɛ, nsu taŋɛ ɔmɛ kakɔgɛ ɔjɔmɔ-kɔya ɛkpaju ɛyɛ. Jɛ ɔjɔmɔ kɔya rɛjɛ aya Ibina Mosis ikanɛ, mɨnɛ oni naŋɔnɛ kuɔgbɨra ya bagbanwu.”

15 Nsu rɛkanɛ rɛbaŋa resi Jisɔs rekudkanɛ kwanancɛnɛ, mɨnɛ ɛrɨm bani bawukofugɛ mbuɔkpɛbɛ mɨnɛ kɔgbanbɛ ifiɛ. 16 Nsu Jisɔs ɔra osugɛbɛ na kegbu na kegbu oruŋɛ otumɛ na kwa igbɛ ɔrɔbɔ njɔm.

Jisɔs ɔgbana ɔba kɔbɔ na kɛkari

17 Reyi dinɛ ndi Jisɔs ɔkpɛbɛ, Bafarisi bajuju na bakpɛbɛ Ibina mbɛ basiirɛ sɛnsɛn mbari Galili, Judia na Jɛrusalɛm batumkafa. Nsɨm Ɔkɨm-kaju ɔra na Jisɔs kɔgban bani ifiɛ. 18 Barumanɛ bajuju basɔgɛ oni na kɛkpa bawu ŋɔ ɔba ibɔ na ikari, babuma kɔsɔgɛmɔ banɔ rika ɛtɔ bakayɔmɛ na bɛya Jisɔs. 19 Ndi bani bajaba nya, bakiyɛ bafɛkɛfɔŋ nci bakoci na amɔ banɔ rika ɛtɔ bafɛ Jisɔs. Babɛmɔ babira basitɛb bariganɛ na kɔkantɔ, balɨmɛ rɛma na kɔkantɔ, batuɛmɔ ta ɔjaga ɛyɛrɔsɔ Jisɔs.

20 Ndi Jisɔs ɔfɛ ɛdɔ renyiɛ-etima ndi bafɔnɔ, ɔkanɛ oni bofiɛ kaŋɔ ya, “Ayi, ŋbɛ nsugɛwu na bobi bɔyɛ.”

21 Bakpɛbɛ Ibina na Bafarisi babɨnɛ kɔsɨnnɛ ya, “Bagadɔ oni mɔnya ŋɔ ɔtanɛ ɛdɔ bobi mbu! Ɛbrɔkpabi igbɛ ji ɛgbɛŋɛ esugɛ bobi oni.”

22 Jisɔs ɔgbɨri mbu bɔrabɛ na botima, mɨnɛ ɔkanɛbɛ ya, “Bu na minfɔnɔ ɛdɔ retimanɛ ndi na botima bonua? 23 Mbun bubɔra warr kɔkanɛ, ‘Bobi bɔyɛ bosugɛwu,’ din kɔkanɛmɔ ya, ‘Gbɛ barabara cɛ?’ 24 Kunsinu mingbɨra yɛ ya, Wɔ Oni ɔfɔnɔ nsɨm na rokuku kɔgbɛ osugɛ bani na bobi bɔbɛ.” Mɨnɛ Jisɔs ɔkanɛ ɔba ibɔ na ikari kaŋɔ ya, “Gbɛ! Fua kɛkpa kɛyɛ taŋɛ gba.” 25 Ɔmɛ ɔgbɛ ɔbarabara na rɔsɔrɔbɛ fɛb, ɔbɛ kɛkpa kɛmɔ oruŋɛ ɔgbaŋɛ, ɔkaŋɛ Ɛbrɔkpabi. 26 Ɛkpaju ɛyɛ oni naŋɔnɛ mɨnɛ baka Ɛbrɔkpabi. Mbu bafɛ bɔbabɛ ɛkpaju, mɨnɛ bakanɛ ya, ‘Rɛfɛ ɔkɨmkɨm gba kɔba-ɛkpaju ɛrɛn!’

Jisɔs ojia Lɛbai

(Mt 9:9-13; Mk 2:13-17)

27 Ndi egbigbɨra kegbu kecia, Jisɔs ɔjaga ɔkafɛ oni ŋɔ ɔtama bagbuga-retu ŋɔ oyinɛ ya Lɛbai, otum na kwaɔtama bagbuga retu. Jisɔs ɔkanɛmɔ ya, “Nyɛgɛmi.” 28 Mɨnɛ Lɛbai ɔgbɛ, osugɛ gbanambunɛ, ɔnyɛgɛmɔ.

29 Lɛbai ɔkayɔgɛ ɔkɨmkɨm kɛtɔmɔ na ɛtɔ ɛmɔ ɔjɛ Jisɔs. Batama bagbuga-retu bajuju ecii barakafa na bani bajuju kɔrɔ. 30 Bafarisi na bakpɛbɛ Ibina Mosis bajuju, bamɨmini bajɛ banyɛgɛ-Jisɔs, “Bu na anu mindiŋɛ mɨnɛ miŋɔŋɛ na batama bagbuga-retu mbɛ mɨnɛ na basiŋɛ-bobi?”

31 Jisɔs ɔfɛlɛbɛ ramu ya, “Bani mbɛ bara na kotigiri ɛkpaju baduga ɔgbana ifiɛ, ekicia bani ifiɛ. 32 Nkiwu mɔ nwuji brika bani basugɛ kosibobi, nwu mɔ nwuji basibobi.”

Rɛsɨn ndi rɛbaŋa kɔkarɛ ŋbɔ

33 Bani bajuju bakanɛ Jisɔs ya, ‘Banyɛgɛ-Jɔn bara barɔbɔ njɔm wɛgwɛg mɨnɛ bakarɛnɛ ŋbɔ, mɨnɛ na kɛmanci banyɛgɛ Bafarisi basiŋɛ. Nsu banyɛgɛwu basusu badiŋɛ mɨnɛ baŋɔŋɛ.’’

34 Jisɔs ɔfɛlɛbɛ ramu ya, “Bacɛmɛ oni ŋɔ ɔsaŋɛ-rɛba bakarɛnɛ ŋbɔ ndi amɔ ɔbɛnɛkafa na abɛ. 35 Nsu kegbu kukewu nci bakɔsɛmɔ na kɔrɔkɔbɛ, na kegbu bakɔkarɛnɛ ŋbɔ.”

36 Jisɔs otuba rɛkana ndi ɔjɛbɛ ya, ‘Oni ɔra ŋɔ ɔkɔbɛ ɔcɛ kɛkpa ɛfɔ okura ɔtɨma ɛfɔ. Ara osikanya na ɔwarɛ ɔcɛ ɛfɔ kanji, mɨnɛ ɔcɛ kɛkpa ɛfɔ kanci kefuŋɛ na ɔtɨma ɛfɔ kanji. 37 Oni ɔra ŋɔ okocimɛ ɔcɛ mantugi ɔrɔbɔ na ɔtɨma eru ^{▼▼Eru Na Isɨrɛl babɛ bɔkpa eti bajɨma aya boru, na mbu bosi na boru bɔbɛ bokpula ara basɨmanɛ kefua tugi na ɔcɛ.} Ndi ara asikanya, ɔtɨma eru kanji kuekpula, mantugi kumanwa mɨnɛ eru ɛyɨmawu. 38 Ɔcɛ mantugi bakɔkɔrɔbi na ɔcɛ eru. 39 Oni ɔra ŋɔ oduga kerua-tugi ara ɔŋɔ kefua. Bakanɛ ya, “Kefua tugi keyiba keci kerua-tugi.”