Luke 9

Jisɔs otigɛ apɔsɨl iti jubi na ifa

(Mt 10:5-15; Mk 6:7-13)

1Jisɔs ojia banyɛgɛ mɔ iti jubi na ifa kwacɛnɛ. Ɔjɛ bɛ nsɨm kokpu bɔkɔ-bobi nambunɛ mɨnɛ kɔgban ifiɛ. 2Otigɛ bɛ yɛ ya bakakanɛ bani ratanɛ rɔrɛ-rɛkɨm Ɛbrɔkpabi mɨnɛ bagbana bani ifiɛ. 3Ɔkanɛ bɛ ya, “Kabɛ nu tum gba na rɔcɛ ndu minruŋɛ kanya: kabɛ nu ɛsaŋ, kabɛ nu ɛbam rɔcɛ, kabɛ nu bedidi, kabɛ nu bagbuga, kajɨba nu bɔfɔ mbu minkɔ fɔdkanɛnɛ. 4Ɛtɔ nanjinɛ minriɛnɛ bocincɛ, tumɛ nu kafa ta minsugɛ rɔrɛ kandu. 5Ara bani bakitama nu, kpuna nu bɔkpaga bonua minsugɛ rɔrɛ kandu kɔkɔgɛ ya bakɨn nu.” 6Apɔsɨl Jisɔs bagbɛ rɔcɛ baruŋɛ rɔrɛ na rɔrɛ, bakanɛ brika ramu Ɛbrɔkpabi mɨnɛ bagbana bani ifiɛ kwa nancɛnɛ.

Rɔbɔ Jɔn oru-raku

(Mt 14:1-12; Mk 6:14-29)

7Ndi Hɛrɔd, ɔkɨm Galili ofugɛ birɛ mbi bɛjaga, ɔdabiri, ndi bani bajuju ya, Jɔn oru-raku ofiɛ na rɔbɔ. 8Bajuju ya Ɛlaija owu, mɨnɛ bajuju ya ɔkanɛ-rotuma Ɛbrɔkpabi ŋɔ biyɛn oŋbɨnɛnɛ ofiɛ na rɔbɔ. 9Nsu Hɛrɔd ya, ŋburi retu Jɔn! Baga oni mɔnya ŋɔ nfugɛ birɛ mbi mbaŋa?” Ɔra oduga kɔfɛ Jisɔs.

Jisɔs ɔyɛ igɔd bani jubi na ifa

(Mt 14:13-21; Mk 6:30-44; Jn 6:1-14)

10Ndi Apɔsɨl Jisɔs baŋbɨnɛnɛ, bakanɛ mɔ gba nambunɛ mbu basi. Ɔbɛ bɛ yɛ oruŋɛ na rɔrɛ Bɛsaida kwa bakotumɛ abɛabɛ. 11Nsu ndi ɛrɨm bani bafugɛ kwa ncɛ bara, banyɛgɛ mɔ. Ɔtama bɛ mɨnɛ ɔkanɛ bɛ ratanɛ ɔbaŋa rɔrɛ-rɛkɨm Ɛbrɔkpabi mɨnɛ ɔgbana mbɛ baduga rɛgbana.

12Ndi royi rɔbɨnɛ kotuɛ, apɔsɨl Jisɔs mbɛ iti jubi na ifa bawu kɨmanɛ mɔ bakanɛ mɔ ya, “Tigɛ ɛrɨm bani mbɛ barua na irirɛ mɨnɛ na bɔtɨma bɔyɔ mbu bɔra manti mmɛ, bakadugi bedidi na kwa kɛyɔ, fɛŋɛ nfa tumgba bɔra.”

13Nsu Jisɔs ɔkanɛ bɛ ya,

“Anu jɛ bɛ nu gba badi.”

Bafɛlɛ mɔ ramu ya, “Mbu rɛfɔnɔ nfa ekicia bɛkpɨn ɔyɔ bɛtan na iti mani ifa. Aduga ya rerua rɛkayam bedidi mbi rɛkɔyɛ ɛrɨm bani mbɛ-ɛ?” 14Igɔd barumanɛ jubi na ifa bɛ barakafa.

Jisɔs ɔkanɛ banyɛgɛ mɔ ya, kanɛ bɛ nu batumetumɛ, iram bani ifa irɨma jubi na rɛkaba.” 15Basi bɛ batumɛ kɛmanci Jisɔs ɔkaba. 16Jisɔs ɔbɛ bɛkpɨn ɔyɔ mbi bɛtan na iti mani nji ifa, obirɛ jɛnɛ na kaju, ɔsamɛ Ɛbrɔkpabi, ɔgbagɛ bɛkpɨn ɔyɔ mbi bɛtan na iti mani nji ifa mɨnɛ ɔsɛ ibɔ ɔjɛ banyɛgɛ mɔ ya bayibanɛ bajɛ bani. 17Abɛ fɛb badi bajɔɛ, mɨnɛ banyɛgɛ Jisɔs bataga mbu bosu balaŋa besigi jubi na bɛfa.

Pita osi bagbɨra ya Jisɔs mɔ ɔra Ɔnyaŋɛ-rokuku

(Mt 16:13-19; Mk 8:27-29)

18Reyi dinɛ ndi Jisɔs ɔra igbɛ ɔrɔbɔ njɔm, banyɛgɛ mɔ bawu kɨmanɛ mɔ. Ɔsɨna bɛ ya, “Bani batanɛ bu babaŋa mi?”

19Bafɛlɛ mɔ ramu ya, “Bajuju ya awu Jɔn oru-raku; baju ya awu Ɛlaija, bajuju ya awu ara oni ŋɔnɛ na kɔrɔ bakanɛ-rotuma Ɛbrɔkpabi mbɛ reyikandi ŋɔ owu ŋbɨnɛnɛ ofiɛ na rɔbɔ.”

20Jisɔs ɔsɨna bɛ ya, “Nsu anu minkanɛ ya ami nra yɛnɛ?”

Pita ɔfɛlɛ mɔ ramu ya, “Awu mɔ ara Ɔnyaŋɛ-rokuku ŋɔ Ɛbrɔkpabi etigɛ.”

Jisɔs ɔtanɛ ɔbaŋa rasinkanɛ na rɔbɔ rɔmɔ

(Mt 16:20-28; Mk 8:30-38; 9:1)

21Jisɔs otunɛ banyɛgɛ mɔ ya bakakanɛ oni tum ŋɔnɛ mbu amɔ ɔkanɛ bɛ. 22Ɔkanɛ bɛ mɨnɛ ya, Wɔ Oni kuɔfɛ ɔkɨmkɨm rasinkanɛ mɨnɛ banintɨma, bakɨm bajɔmɔ-kɔya, na bakpɛbɛ Ibina kubakɨna mɔ. Kubaŋua mɔ, nsu ara ɔyɔmɛ rayi rataa kuɔŋbɨnɛnɛ ofiɛ na rɔbɔ.”

23Ɔkanɛ bɛ mɨnɛ ya, oni naŋɔnɛ ŋɔ oduga kɔnyɛgɛ mi, yɔgɛ mɔ ɔkɨna ɛkpaju ɛmɔ, ɔsɔgɛ kɛkpati-rasinkanɛ kɛmɔ reyi rokuku nandinɛ ɔnyɛgɛ mi. 24Oni naŋɔnɛ ŋɔ oduga kɔnyaŋɛ rokpin rɔmɔ kurɔsɔrɔ mɔ, nsu ara rokpin rɔyɛ rɔsɔri wu ndi anyɛgɛ mi kuafɔnɔ du. 25Nsɔl ɔyɛ ɔra bu, ara rokuku ndu fɛb rɔra wu na rɛmɛgɛ, nsu awu okikɔ ayɨma? 26Ara ami nsiŋɛ wu gbobi mɨnɛ na rɛkpɛbɛ remia, kuasi Wɔ Oni gbobi mɨnɛ ara owu na boyi bɔmɔ mɨnɛ na boyi Mintɛ mɨnɛ na mbu keriragi banyiɛ-rotuma Ɛbrɔkpabi.

27Nkanɛ nu kpikpɛ mɔ anu bajuju mbɛ mimbari nfa mimbaŋɛ ta minfɛ rɔrɛ-rɛkɨm Ɛbrɔkpabi.

Banyɛgɛ Jisɔs iti itaa bafɛ rɛkɨm rɛmɔ

(Mt 17:1-8; Mk 9:2-8)

28Ndi ɛyɔmɛ rɛfɨn dinɛ ndi ɔkanɛ bɛ ratanɛ ndɛ, Jisɔs ɔbɛ Pita, Jɔn, na Jems oruŋɛ birebirɛ rokuku kɔrɔbi njɔm. 29Ndi ɔra ɔrɔbɔ njɔm, rɔsɔ rɔmɔ rɔfɔdkanɛnɛ, mɨnɛ bɔfɔ mbu ɔrɔbɔnɛ bɔraga kpɨraŋ ta boluŋaluŋa. 30Ɔmɛ barumanɛ bafa bamɨlɛnɛ kafa na boyi kaju bakura na amɔ. Bara Mosis na Ɛlaija. ▼

▼Na kɛkpa manrɛ Matiu 17:2, ya rɔsɔ Jisɔs rɔraga aya royi.

31Bamɨlɛnɛ na boyi kaju bakura na Jisɔs, kɛmanci okowu kɔba na Jɛrusalɛm. Na kɛmanci Ɛbrɔkpabi eduga ya mbu aji etimanɛ ɛbaŋa mɔ bɔjaga. 32Pita na mbɛka mbɛ bara na amɔ, bara baraɛraɛ. Nsu ɔmɛ bafiɛ na rɔra bafɛ boyi Jisɔs mɨnɛ na bani bafa mbɛ babari na amɔ. 33Ndi Mosis na Ɛlaija bakosugɛ Jisɔs, Pita ɔkanɛ Jisɔs ya, “Ita, eyibi ya rɛranfa! Rekori bada bataa nfa, ŋɔnɛ ɔyɛ, ɔnyakanɛ ŋɔ Mosis, ŋɔka ŋɔ Ɛlaija.” (Pita okigbɨra mbu ɔra ɔtanɛ.) ▼

▼Pita oduga ya juju bani mbɛ basu na rokuku ndu. Na mbu bosi na otimanɛ kori rakugi ndɛ rataa.

34Ndi ɔbɛnɛ ɔtanɛ, koku rɔja kɔmɨlɛnɛ koyi bɛ mɨnɛ bofu bosi bɛ. 35Remu resi na rɔja ndu royi bɛ ya, “Nfa Wɔ omia, ŋɔ nwu ra; fugɛ mɔ nu!” 36Ndi remu ndi bafugɛ rewu kunɛnɛ kɔtanɛ, Pita, Jɔn, na Jems bafɛŋɛ Jisɔs igbɛ ɔbari. Basu mɔb, bakikanɛ oni tum ŋɔnɛ mbu bafɛ mɨnɛ bafugɛ kegbu kanci.

Jisɔs ɔgbana wɔ ŋɔ ɔfɔnɔ kɛkɔ-kebi

(Mt 17:14-18; Mk 9:14-27)

37Ɔnyakanɛ reyi, ndi Jisɔs na banyɛgɛ mɔ mbɛ iti taa bariɛ ntunɛ rokuku, bani bakpunɛ bakɨmanɛ mɔ. 38Oni otibɛ remu na rɛkaba, “Ɔkpɛbɛ! Nkpɔlɛ wu, nyaŋɛ wɔ omia wɔ orumanɛ omia ŋɔnɛŋɔnɛ. 39Kɛkɔ-kebi kejuŋanɛ mɔ mɨnɛ kesiŋɛ mɔ ɔtɔ na rɔcɛ okuga, kegbuga mɔ ta efua ɛjaga mɔ na kama. Na kɛmanci kɛkɔ-kebi nci kesinkanɛ mɔ, kɛjɛŋɛ mɔ reŋunɛnɛ. 40Nkpɔlɛ banyɛgɛ-wu mɔ bakpu kɛkɔ-kebi nci kɛjaga, nsu bakiyɛ.”

41Jisɔs ɔfɛlɛ bɛ ramu ya, “Minkifɔnɔ renyiɛ mɨnɛ mintɨma ratu. Rayi ramɛn ndɛ nkotumɛ na anu? Bu na ntumɛ na anu?” Jisɔs ɔkanɛ yɛ orumanɛ kaŋɔ ya, “Bɛ wɔ ɔyɛ kaŋɔ wu nfa.”

42Aya wɔ kaŋɔ oŋuɛ, kɛkɔ-kebi nci kemaga mɔ na rɔcɛ, mɨnɛ efua ɛbɨnɛ mɔ kɔjagi na kama. Jisɔs otunɛ kɛkɔ-kebi kanci, ɔgbana mɔ, mɨnɛ ɔsɛ mɔ ibɔ ɔjɛ mintɛ. 43Ɛkpaju ɛyɛ bani mbɛ bara kafa fɛb na nsɨm Ɛbrɔkpabi.

Jisɔs ɔtanɛ okwɛ ɔbaŋa rɔbɔ rɔmɔ

(Mt 17:22-23; Mk 9:30-32)

44Mɨnɛ ɔkanɛ ya, “Kajiɛ nu mbu nkɔkanɛ nu! Bakɔsɛ ibɔ na Wɔ Oni barɔbɔ na ibɔ bani ɛban bamɔ.” 45Nsu banyɛgɛ mɔ bakijɔɛ mbu ɔtanɛ. Rejua kɔtanɛ resu ŋɨbaŋɨba. Bakijɔɛ ku, mɨnɛ bofu bosiŋɛ bɛ kɔsɨn mɔ.

Yɛnɛ mɔ ɔfa ocia?

(Mt 18:1-5; Mk 9:33-37)

46Ifiri ijaga na banyɛgɛ Jisɔs ya, baga oni na kɔrɔkɔbɛ mɔ ɔfa ocia. 47Jisɔs, ɔgbɨri mbu bɔra bɛ na botima, ɔbɛ wɔ mbɔd, ɔbarɛnɛ na rokpinkpa. 48Mɨnɛ ɔkanɛ banyɛgɛ mɔ ya, “Oni naŋɔnɛ ŋɔ ɔtama wɔ ŋɔ na rirɨna rimia, ɔtama mi. Mɨnɛ oni naŋɔnɛ ŋɔ ɔtama mi, ɔtam oni ŋɔ otigɛ mi. Oni naŋɔnɛ ŋɔ ɔtɔ botiga ɔjɛ bacɛmɛ, mɔ ɔfa ocia.”

Oni naŋɔnɛ ŋɔ ɔbɔ okiju na awu ɔbari na awu

(Mk 9:38-40)

49Jɔn ya, “Ita, rɛfɛ oni ŋɔ ɔbɛŋɛ rirɨna riyɛ okpuŋɛ bɔkɔ-bobi na bɔkpaju bani nsu retunɛ mɔ ya okunɛnɛ, ndi na kɔrɔkoyua ɔra.”

50Jisɔs ɔkanɛ bɛ ya, “Katunɛ mɔ nu! Oni naŋɔnɛ ŋɔ ɔbɔ okikpɛnɛ resi renua ɔra na anu.”

Bani Sameria bakɨna kɔtam Jisɔs

51Ndi kegbu kewu kunɛ nci bakɔbɛ Jisɔs barua na rɔrɛ Ɛbrɔkpabi, Jisɔs osi etima ɛmɔ koru Jɛrusalɛm. 52Otigɛ banyiɛ-rotuma mbɛ babɛ mɔ rɔsɔ, baruŋɛ na rorirɛ ndu rɔra rika Sameria kotubɛrɛ gbanambunɛ bayɔgɛ mɔ. 53Nsu bani mbɛ bara kafa na rorirɛ kandu bakitama Jisɔs, ndi ɛra jaɛ ya ɔra ociŋɛciŋɛ oruŋɛ Jɛrusalɛm. 54Ndi banyɛgɛ mɔ Jems na Jɔn bafɛ mbu bɔjaga, basɨna, “Ɔkɔ-Rokuku, aduga ya rejia roku rosi na kaju-rɔja rowukɨm bani mbɛ?” 55Nsu Jisɔs ocimɛnɛ otunɛ bɛ na mbu batanɛ. 56Amɔ na banyɛgɛ mɔ baruŋɛ yɛ na rorirɛ rojuju.

Mbu ɛbɛŋɛ kɔnyɛgɛ Jisɔs

(Mt 8:19-22)

57Aya bara bacɛŋɛ na ɛyɔ baruŋɛ, orumanɛ ɔkanɛ Jisɔs ya, “Ami kunyɛgɛ wu kwa nancɛnɛ arua.”

58Jisɔs ɔkanɛ mɔ ya, “Bɔgba kɛtɨma bɔfɔnɔ rama ndɛ bɔyɔmɛ, mininɔɔn minfɔnɔ bɔtɔ, nsu Wɔ Oni okifɔnɔ kwa ncɛ ojia ya kamɔ.”

59Jisɔs ɔkanɛ orumanɛ ojuju ya, “Nyɛgɛ mi.”

Nsu orumanɛ nsan ya, “Ɔkɔ-rokuku, yɔgɛ mi nruakpa nka fiɛ mintɛ omia.”

60Jisɔs ɔkanɛ mɔ ya, “Yɔgɛ babureburɛ bafiɛ babureburɛ babɛ. Awu taŋɛ kakanɛ brika ramu Rɔrɛ-rɛkɨm Ɛbrɔkpabi.”

61Oni ojuju ɔkanɛ Jisɔs ya, “Ami kunyɛgɛ wu, Ita; nsu yɔgɛ mi mbɛrɔsɔ nkakanɛ bani bamia mɔ ami nta.”

62Jisɔs ɔkanɛ mɔ ya, “Oni naŋɔnɛ ŋɔ owu jɨbi keru mɨnɛ ɔbɨnɛ kɔkpa nsu ocimɛnɛ ɔrɔŋɛ irɨma, ɔra gba ɛyɛŋɛyɛŋɛ na rɔrɛ rɛkɨm-Ɛbrɔkpabi.”