‏ Deuteronomy 27

1Binilin ni Moises ken dagiti panglakayen ti Israel dagiti tattao ket kinunada “Salimetmetanyo dagiti amin a bilbilin nga ibilinko kadakayo ita nga aldaw. 2Iti aldaw a ballasiwenyo ti Jordan a mapan iti daga nga ited kadakayo ni Yahweh a Diosyo, masapul a mangipasdekkayo kadagiti sumagmamano a dadakkel a bato ken palitadaanyo dagitoy. 3Masapul nga isuratyo kadagitoy dagiti amin a sasao ti daytoy a linteg inton nakaballasiwkayon, tapno makastrekkayo iti daga nga ited kadakayo ni Yahweh a Diosyo, daga nga agay-ayus iti gatas ken diro, kas inkari kadakayo ni Yahweh, ti Dios dagiti kapuonanyo.

4Inton nakaballasiwkayo iti Jordan, ipasdekyo dagitoy a bato nga ibilbilinko kadakayo ita nga aldaw, idiay Bantay Ebal ket palitadaanyo dagitoy. 5Masapul a mangbangonkayo sadiay iti maysa nga altar kenni Yahweh a Diosyo, maysa nga altar a batbato; ngem masapul a saankayo nga agaramat iti alikamen a landok a pangtrabaho kadagiti bato.

6Masapul a bangonenyo ti altar ni Yahweh a Diosyo babaen kadagiti saan a natikapan a bato; masapul a mangidatonkayo iti daton a maipuor iti rabaw daytoy a para kenni Yahweh a Diosyo, 7ken mangidatagkayonto kadagiti daton a pakikapia ken mangankayo sadiay; agragsakkayonto iti sanggoanan ni Yahweh a Diosyo. 8Isuratyonto iti nalawag unay kadagiti bato dagiti amin a sasao daytoy a linteg.”

9Nagsao ni Moises, dagiti papadi, ken dagiti Levita, iti entero nga Israel ket kinunada, “Israel, agulimek ken dumngegka: Ita nga aldaw nagbalinkayo a tattao ni Yahweh a Diosyo. 10Masapul ngarud nga agtulnogkayo iti timek ni Yahweh a Diosyo ken agtulnogkayo kadagiti bilbilin ken kadagiti alagadenna nga ibilbilinko kadakayo ita nga aldaw.”

11Binilin ni Moses dagiti tattao iti dayta met laeng nga aldaw ket kinunana, 12“Masapul nga agtakder dagitoy a tribu idiay Bantay Gerizim a mangbendision kadagiti tattao, kalpasan a maballasiwyo iti Jordan: Simeon, Levi, Juda, Issacar, Jose ken Benjamin.

13Ken masapul nga agtakder dagitoy a tribu idiay Bantay Ebal a mangiwaragawag kadagiti lunod: Ruben, Gad, Aser, Zabulon, Dan ken Naftali. 14Sumungbat ken kunaento dagiti Levita kadagiti amin a lallaki ti Israel babaen iti napigsa a timek:

15Mailunod koma ti tao a mangaramid iti nakitikitan wenno nasukog a ladawan, maysa a banag a makarimon kenni Yahweh, ti aramid dagiti ima ti kumikitikit, ken ti mangipatakder iti daytoy a sililimed.’ Ket masapul a sumungbat dagiti tattao ket kunaenda, ‘Amen.’

16‘Mailunod koma ti tao a di agraem iti amana wenno inana. ‘Ket masapul a kunaen dagiti amin a tattao, ‘Amen.’ 17‘Mailunod koma ti tao a mangikkat iti muhon iti karrubana.’ Ket masapul a kunaen dagiti amin a tattao, ‘Amen.’

18‘Mailunod koma ti tao a mangiyaw-awan iti bulag manipud iti dalan,’ Ket masapul a kunaen dagiti amin a tattao, ‘Amen.’ 19‘Mailunod koma ti tao a mangpilit a mangikkat iti kalintegan ti ganggannaet, ulila, wenno balo a babai,’ Ket masapul a kunaen dagiti amin a tattao, ‘Amen.’

20‘Mailunod koma ti tao a makikaidda iti asawa ti amana, gapu ta innalana ti karbengan ti amana.’ Ket masapul a kunaen dagiti amin a tattao, ‘Amen.’ 21‘Mailunod koma ti tao a makikaidda iti aniaman a kita ti ayup.’ Ket masapul a kunaen dagiti amin a tattao, ‘Amen.’

22‘Mailunod koma ti tao a makikaidda iti kabsatna a babai, ti anak a babai ti amana, wenno iti anak a babai ti inana.’ Ket masapul a kunaen dagiti amin a tattao, ‘Amen.’ 23‘Mailunod koma ti tao a makikaidda iti katuganganna a babai.’ Ket masapul a kunaen dagiti amin a tattao, ‘Amen.’

24‘Mailunod koma ti tao a sililimed a mangpatay iti karrubana.’ Ket masapul a kunaen dagiti amin a tattao, ‘Amen.’ 25‘Mailunod koma ti tao nga umawat ti pasuksok a mangpatay iti maysa a tao nga awan basolna,’ Ket masapul a kunaen dagiti amin a tattao, ‘Amen.’

Mailunod koma ti tao a saan a mangpatalged kadagiti sasao iti daytoy a linteg, a pagtulnogannanto dagitoy.’ Ket masapul a kunaen dagiti amin a tattao, ‘Amen.’

26