‏ Proverbs 4

1Annakko, denggenyo ti annuroten ti maysa nga ama, ken ipangagyo tapno maammoanyo ti kayat a sawen ti pannakaawat. 2Ik-ikkankayo iti nasasayaat a sursuro; saanyo a laksiden ti pannursurok.

3Idi maysaak nga ubing ti amak, ti nalupoy ken kakaisuna nga anak ti inak, 4sinurwannak ket kinunana kaniak, “Ipapusom koma dagiti sasaok: tungpalem dagiti bilinko ket agbiagka.

5Gun-odem ti kinasirib ken pannakaawat; saanmo a lipaten ken saanmo a laksiden dagiti sasaok; 6saanmo a panpanawan ti kinasirib ket bantayannakanto; ayatem isuna ket saluadannakanto.

7Ti kinasirib ti kapapatgan a banag, isu a gun-odem ti kinasirib ket busbusem dagiti amin a kukuam tapno maalam ti pannakaawat. 8Ipategmo ti kinasirib ket itag-aynaka; padayawannaka inton arakupem isuna. 9Mangikabil isuna iti balangat ti pammadayaw dita ulom; ikkannaka iti napintas a korona.”

10Dumngegka anakko, ken ipangagmo dagiti sasaok, ket maaddaankanto iti adu a tawen iti panagbiagmo. 11Iturturongka iti dalan ti kinasirib; idaldalanka kadagiti nalinteg a pagnaan. 12Inton magnaka, awanto ti agserra iti dalanmo ket no agtarayka, saankanto a maitublak.

13Petpetam ti disiplina, saanmo nga ib-ibbatan; bantayam, ta isu ti biagmo. 14Saanmo a suroten ti wagas dagiti nadangkes ken saanmo nga ar-aramiden ti wagas dagiti agar-aramid iti dakes. 15Liklikam daytoy, saanka a mapmapan iti daytoy; liklikam daytoy ket magnaka iti sabali a dalan.

16Ta saanda a makaturog agingga a makaaramidda iti dakes ken saanda a makaturog agingga nga adda maipatublakda. 17Ta kankanenda ti tinapay ti kinadangkes ken in-inumenda ti arak ti kinaranggas.

18Ngem ti dalan ti agar-aramid iti umno ket kas iti panagbannawag a lumawlawag; rumanraniag agingga nga umay ti naan-anay a kinaraniag ti aldaw. 19Ti dalan dagiti nadangkes ket kasla sipnget - saanda nga ammo no ania iti pakaitibtibkulanda.

20Anakko, ipangagmo dagiti sasaok; denggem dagiti ibagbagak. 21Saanmo nga ik-ikkaten kadagitoy ti panagkitam; salimetmetam dagitoy dita pusom.

22Ta dagiti sasaok ket biag kadagiti mangsapul kadagitoy ken salun-at iti entero a bagida. 23Pagtalinaedem a natalged ti pusom ken ikagumaam daytoy a bantayan, ta manipud iti daytoy ket agayus ti ubbog ti biag.

24Ikkatem ti panagul-ulbodmo ken ibellengmo dagiti dakes a panagsarsaritam. 25Arigna nga ikitam a deretso dagiti matam ken iti sangoanam laeng ti kitkitam.

26Agaramidka iti nasimpa a pagnaan dagiti sakam; ket natalgedto dagiti amin a dalanmo. Saanka a sumiasi a mapan iti kannawan wenno kannigid; iyadayom ti sakam iti dakes.

27