1Ki 8 | JAE | STEP | Go Salomo kêkalem gejobwaga Israelŋa to lau Israel nêŋ gôlôacmôkê nêŋ laumata samob sêpi tageŋ sêmêŋ gêdêŋ eŋ aŋga Jerusalem gebe sêkôc Apômtaunê poac ŋakatapa aŋga Dawidnê malac, taŋ sêsam gebe Sion naŋ, sêpi lôm dabuŋ sêna.

‏ 1 Kings 8

Salomo kêkôc poac ŋakatapa gêmêŋ lôm dabuŋ

1 Go Salomo kêkalem gejobwaga Israelŋa to lau Israel nêŋ gôlôacmôkê nêŋ laumata samob sêpi tageŋ sêmêŋ gêdêŋ eŋ aŋga Jerusalem gebe sêkôc Apômtaunê poac ŋakatapa aŋga Dawidnê malac, taŋ sêsam gebe Sion naŋ, sêpi lôm dabuŋ sêna. 2 Gêdêŋ ajôŋ kêtu 7ŋa ŋaê Etanim ŋacwaga Israelŋa samob sêkac tauŋ sa dêdêŋ kiŋ Salomo jasêlic ombec. 3 Gêdêŋ taŋ gejobwaga Israelŋa samob sêô lasê su naŋ, dabuŋwaga sêôc poac ŋakatapa sa. 4 Dabuŋwaga to lau Lewi sêbalaŋ Apômtaunê poac ŋakatapa to becobo takac saŋa ma laclu samob, taŋ gêc becobo ŋalêlôm naŋ, sêpi sêja. 5 Ma kiŋ Salomo to gôlôac Israelŋa samob, taŋ sêkac tauŋ sa dêdêŋ eŋ naŋ, sêkô poac ŋakatapa nêmŋa ma sêkêŋ bulimakao to domba kêtu da. Teŋ kêtôm gebe êsa bulimakao to domba nêŋ namba sa atom. 6 Go dabuŋwaga sêkôc Apômtaunê poac ŋakatapa sêja lôm dabuŋ ŋaGamêŋ Dabuŋanô tau ma tetoc kakô kerubnêŋ magê ŋalabu. 7 Kerub sêlam nêŋ magê kêpi poac ŋakatapa ŋamala kêtôm sêjam ajuŋ poac ŋakatapa to ta. 8 Ma ta tau kêsa baliŋ sêlic ŋatêpôê aŋga Gamêŋ Dabuŋ, taŋ gêc Gamêŋ Dabuŋanô tau ŋanêmŋa naŋ, mago sêlic aŋga awêŋa atom. Ma ta tau sêc tonaŋ e gêdêŋ galoc. 9 Gêŋ teŋ kêsêp poac ŋakatapa ŋalêlôm atom, poc tapa luagêcgeŋ, taŋ Mose kêkêŋ kêsêp aŋga lôc Horeb naŋ. Aŋga tônê Apômtau kêmoatiŋ poac gêwiŋ lau Israel gêdêŋ taŋ êsêac sêsa aŋga gamêŋ Aiguptu sêmêŋ naŋ. 10 Ma gêdêŋ taŋ dabuŋwaga sêsa aŋga Gamêŋ Dabuŋ sêmêŋ naŋ, tao teŋ gêjam Apômtaunê lôm dabuŋ auc. 11 Tec dabuŋwaga têtôm gebe sêkô ma sênam sakiŋ kêtu tao tonaŋŋa atom, gebe Apômtaunê ŋawasi gêjam lôm dabuŋ auc.

Salomo kêsôm biŋ gêdêŋ lau

12 Go Salomo kêsôm gebe

“Apômtau kêkêŋ oc kêkô umboŋ,
mago kêsôm gebe eŋ tau êŋgôŋ gamêŋ ŋakesec.
13 Aê kakwê nêm andu dabuŋ teŋ,
nêm malam teŋ gebe ômoa endeŋ tôŋgeŋ.”
14 Go kiŋ tau kêkac tau ôkwi gêdêŋ lau Israel samob, taŋ sêkô naŋ, ma gêjam moc êsêac 15 ma eŋ kêsôm gebe “Aê aoc êôc Apômtau, lau Israel nêŋ Anôtô, taŋ lêma gêgôm biŋ, taŋ gêjac mata gadêŋ aê tamoc Dawid ŋa awasuŋ naŋ, ŋanô kêsa. Eŋ kêsôm gebe 16 ‘Gêdêŋ bec, taŋ aê kakôc ŋoc lau Israel sêsa aŋga Aiguptu sêmêŋ naŋ, aê kajaliŋ malac teŋ aŋga Israel nêŋ toŋ samob sa gebe sêkwê andu teŋ ŋoc ŋaê ênêcŋa atom, mago aê kajaliŋ Dawid sa gebe ênam gôliŋ ŋoc lau Israel.’ 17 Ma aê tamoc Dawid taê gêjam gebe êkwê Apômtau, Israelnêŋ Anôtô, nê ŋaê ŋaandu teŋ. 18 Mago Apômtau tau kêsôm gêdêŋ aê tamoc Dawid gebe ‘Aôm taêm gêjam gebe ôkwê andu teŋ êtu aêŋoc ŋaêŋa naŋ, ŋajam gebe taêm gêjam ŋabiŋ tau gêc nêm ŋalêlôm, 19 mago aôm oc ôkwê andu tau atom, tageŋ nêm latôm, taŋ têna êkôc eŋ naŋ, eŋ êkwê andu êtu aêŋoc ŋaêŋa.’ 20 Galoc Apômtau gêgôm nê biŋ, taŋ gêjac mata naŋ, ŋanô kêsa gebe aê gadi gajô tamoc Dawid su ma gaŋgôŋ lêpôŋ Israelŋa katôm biŋ, taŋ Apômtau gajac mata naŋ, ma kakwê andu tau kêtu Apômtau, Israelnêŋ Anôtô nê ŋaêŋa. 21 Ma kakêŋ ŋamala teŋ katu katapa, taŋ Apômtaunê poac, taŋ eŋ kamoatiŋ gêwiŋ aêacnêŋ tameŋi gêdêŋ eŋ kêkôc êsêac sasa aŋga gamêŋ Aiguptu sêmêŋ naŋ kêsêp.”

Salomo keteŋ mec

22 Go Salomo jakêkô Apômtaunê altar nêmŋa lau Israel samob sêlic ma eŋ gêlam lêma gêdêŋ undambê 23 ma keteŋ mec gebe “O Apômtau, Israelnêŋ Anôtô, anôtô teŋ kêtôm aôm gêmoa undambê ŋaôŋa me nom ŋalabu ŋa atom. Aôm gojob poac ma kôtôc nêm têmtac gêwiŋ teŋgeŋŋa gêdêŋ nêm sakiŋwaga, taŋ sêsa nêŋ lêŋ sêmoa aôm laŋômnêm tonêŋ ŋalêlôm samucgeŋ naŋ. 24 Aôm taêm gêjam biŋ, taŋ kôsôm gêdêŋ aê tamoc, nêm sakiŋwaga Dawid naŋ ŋapaŋ. Biŋŋanô, aôm kôsôm ŋabiŋ ŋa awamsuŋ ma gôgôm ŋanô kêsa ŋa lêmam gêdêŋ ocsalô tonec. 25 O Apômtau, Israelnêŋ Anôtô, ôŋgôm biŋ, taŋ gôjac mata gêdêŋ nêm sakiŋwaga aê tamoc Dawid naŋ ŋanô êsa. Aôm kôsôm gebe ‘Aôm latôm embe ejop tageŋ tonec gebe êsa nê lêŋ êmoa aê laŋôcnêmŋa êtôm aôm taŋam wamu gômoa aê laŋôcnêmŋa, go aôm ôpô lêna nêm ŋac teŋ êmoa aê laŋôcnêmŋa gebe êŋgôŋ lêpôŋ Israelŋa atom.’ 26 O Israelnêŋ Anôtô, amboac tonaŋ ônac dabiŋ nêm biŋ, taŋ kôsôm gêdêŋ nêm sakiŋwaga aê tamoc Dawid naŋ.

27 “Mago Anôtô oc êŋgôŋ nom biŋŋanôgeŋ me masi. Alic acgom, undambê to undambê ŋaôŋa samucgeŋ kêtôm aôm atom, ma andu tecenec kakwê su naŋ, oc êtôm atom amboac tonaŋgeŋ. 28 Mago o Apômtau, ŋoc Anôtô, mêŋôkêŋ taŋam nêm sakiŋwaga aê ŋoc mec to ŋoc biŋ, taŋ aê kateŋ naŋ. Ôŋô môêc to mec, taŋ nêm sakiŋwaga aê kateŋ gêdêŋ aôm gêdêŋ galoc. 29 Ma nêm matam ê andu tonec êndêŋ êmbêc to eleŋ, malac tau, taŋ kôsôm biŋ kêpi gebe ‘Aêŋoc ŋaê oc ênêc tonec’ naŋ, gebe aôm ôkêŋ taŋam mec, taŋ nêm sakiŋwaga aê kateŋ aŋga gamêŋ tonec naŋ. 30 Ma ôkêŋ taŋam biŋ, taŋ nêm sakiŋwaga to nêm lau Israel asuŋ êndêŋ aôm aŋga gamêŋ tonec êndêŋ taŋ ateŋ mec êndêŋ aôm naŋ. Ôkêŋ taŋam aŋga undambê, gamêŋ taŋ gôŋgôŋŋa ma embe ôŋô, go ôsuc ôkwi.

31 “Embe ŋac teŋ êŋgôm sec êndêŋ nê ŋac jabaŋ eŋŋa ma têtu kênac eŋ gebe êtôc lêma ma eŋ mêŋêtôc lêma êkô nêm altar nêmŋa aŋga andu tonec, 32 go ôŋô aŋga undambê ma ômêtôc nêm sakiŋwaga. Ôkêŋ ŋac tobiŋ nê sec êpi eŋ tau môkêapac ma ônam ŋac gêdêŋ sa ma ôpuc nê biŋ tôŋ ma ôkêŋ ŋagêjô êtôm nê biŋgêdêŋ.

33 “Embe ŋacjo sêku nêm lau Israel tulu êtu sêgôm sec gêdêŋ aômŋa naŋ, ma êsêac sênam tauŋ ôkwi êndêŋ aôm êtiam to tetoc nêm ŋaê sa ma teteŋ mec to sêsuŋ nêŋ biŋ êndêŋ aôm aŋga andu tonec, 34 go ôkêŋ taŋam aŋga undambê ma ôsuc nêm lau Israel nêŋ sec ôkwi ma ôkôc êsêac sêmu sêmêŋ gamêŋ, taŋ aôm kôkêŋ gêdêŋ nêŋ tameŋi naŋ êtiam.

35 “Embe ôkêŋ gêŋwapac êndêŋ êsêac ma ôlai undambê auc to kom ênac atom kêtu êsêac sêgôm sec gêdêŋ aômŋa naŋ, ma êsêac teteŋ mec sêkanôŋ gamêŋ tonec to tetoc nêm ŋaê sa ma sêwi nêŋ sec siŋ, 36 go ôkêŋ taŋam nêŋ mec aŋga undambê ma ôsuc nêm sakiŋwaga Israel nêŋ sec ôkwi. Ôndôŋ lêŋ ŋajam êndêŋ êsêac gebe sêsaŋa naŋ ma ôkêŋ kom ênac aŋga nêm gamêŋ, taŋ kôkêŋ gêdêŋ nêm lau gebe êtu nêŋ gêŋlênsêm naŋ.

37 “Embe tôbôm êsa aŋga gamêŋ tau me gêmac sec êtap lau sa me mo gwa ênac me mo ŋakaŋ me wagô me moac tamoac enseŋ nêŋ gêŋ taniŋŋa me nêŋ ŋacjo sêŋgi êsêac auc aŋga nêŋ malac naŋ, gêŋwapac me gêmac tokaiŋ-tokaiŋ êtap êsêac sa 38 ma teteŋ mec me ŋac tageŋ me nêm lau Israel tapaôŋgeŋ embe sêsuŋ nêŋ biŋ teŋ gebe sêjala nêŋ gêŋwapac ŋalêlômŋa ma sêlam lemeŋ êndêŋ andu tonec, 39 go ôkêŋ taŋam aŋga undambê, aŋga gamêŋ, taŋ gôŋgôŋ naŋ, ma ôsuc nêŋ sec ôkwi to ônam êsêac sa ma ôkêŋ ŋagêjô êndêŋ êsêac, taŋ sêjala nêŋ ŋalêlôm naŋ, êtôm nêŋ lêŋ êndêŋ-êndêŋgeŋ gebe aôm, aôm taômgeŋ kôjala ŋamalac latuŋi samob nêŋ ŋalêlôm, 40 gebe êsêac têtêc aôm êtôm bêc samob, taŋ sêŋgôŋ mateŋ jali aŋga nom, taŋ kôkêŋ gêdêŋ aêac tameŋi naŋ.

41 “Ma ŋacjaba, taŋ aŋga lau Israel nêŋ atom naŋ, embe mêŋêô lasê aŋga gamêŋ jaêcsêga êtu gêŋô nêm ŋaê ŋawaeŋa 42 gebe lau oc sêŋô aômnêm ŋaê to lêmam ŋajaŋa, taŋ kômêtôc naŋ ŋawae, eŋ embe amêŋ ma eteŋ mec aŋga andu tonec, 43 go ôkêŋ taŋam aŋga undambê, aŋga gamêŋ, taŋ gôŋgôŋŋa naŋ, ma ôŋgôm gêŋ samob, taŋ ŋac jaba eteŋ êndêŋ aôm naŋ, ŋanô êsa gebe lau nomŋa sêjala aômnêm ŋaê to têtêc aôm, êtôm taŋ nêm lau Israel sêgôm naŋ. Ma êsêac oc sêjala gebe andu tonec taŋ aê kakwê naŋ, sêsam aômnêm ŋaê kêpi.

44 “Aôm embe ôjatu nêm lau gebe nasênac siŋ êndêŋ nêŋ ŋacjo ma embe teteŋ mec êndêŋ aôm laŋôŋanô êndêŋ malac kapôêŋ, taŋ aôm kôjaliŋ sa to andu, taŋ aê kakwê kêtu nêm ŋaêŋa naŋ, 45 go ôkêŋ taŋam êsêacnêŋ mec to biŋ, taŋ sêsuŋ êndêŋ aôm naŋ, aŋga undambê ma ônam êsêac kêsi.

46 “Embe êsêac sêŋgôm sec êndêŋ aôm, gebe ŋac teŋ gêmoa atom, taŋ gêgôm sec atom naŋ, ma aôm têmtac ŋandaŋ êndêŋ êsêac ma ôkêŋ êsêac êndêŋ ŋacjo, taŋ sêkêŋ êsêac sêŋgôŋ kapoacwalô aŋga nêŋ gamêŋ jaêc me gamêŋ dambê 47 ma êsêac embe taêŋ ênam tauŋ aŋga gamêŋ kapoacwalôŋa ma sênam tauŋ ôkwi to têtaŋ êndêŋ aôm aŋga nêŋ ŋacjo nêŋ gamêŋ ma sêsôm gebe ‘Aêac agôm sec to geo ma awi Anôtô siŋ.’ 48 Ma êsêac embe sênam tauŋ ôkwi êndêŋ aôm to nêŋ ŋalêlôm makeŋgeŋ ma tokatuŋ samucgeŋ aŋga nêŋ ŋacjo, taŋ sêkêŋ êsêac sêŋgôŋ kapoacwalô naŋ, ma teteŋ êndêŋ aôm laŋôŋanô êndêŋ gamêŋ, taŋ aôm kôkêŋ gêdêŋ êsêacnêŋ tameŋi naŋ, to êndêŋ malac kapôêŋ tau, taŋ aôm kôjaliŋ sa naŋ, ma êndêŋ andu tau, taŋ aê kakwê kêtu nêm ŋaêŋa naŋ, 49 go ôkêŋ taŋam êsêacnêŋ mec to taŋi aŋga undambê, taŋ gôŋgôŋ naŋ, to ônam êsêac sa. 50 Ma ôsuc nêm lau, taŋ sêgôm sec gêdêŋ aôm naŋ, nêŋ geo to sêgêli nêm biŋŋa ôkwi. Ma taêm walô êsêac gebe lau, taŋ sêkêŋ êsêac sêŋgôŋ kapoacwalô naŋ, sêlic ma taêŋ walô êsêac amboac tonaŋgeŋ. 51 Gebe êsêac têtu nêm lau to nêm gêŋlênsêm, taŋ kôkôc êsêac aŋga ja ŋalakoc sec Aiguptuŋa sêmêŋ naŋ. 52 O Apômtau Anôtô matam ê nêm sakiŋwaga aê ŋoc mec to nêm lau Israel nêŋ mec to ôkêŋ taŋam aêac êndêŋ noc amôêc êndêŋ aômŋa. 53 Gebe aôm kôjaliŋ aêac sa aŋga lau nomŋa samob nêŋ gebe atu nêm gêŋlênsêm, kêtôm kôkêŋ nêm sakiŋwaga Mose kêsôm lasê gêdêŋ taŋ aôm kôkôc aêacma tameŋi sêsa aŋga Aiguptu sêmêŋ naŋ.”

Salomo keteŋ mec ŋakôniŋŋa

54 Gêdêŋ taŋ Salomo keteŋ mec to gêsuŋ biŋ samob tonec gêdêŋ Apômtau su naŋ, eŋ gêdi sa aŋga Apômtaunê altar nêm ŋa, taŋ eŋ kêpôŋ aduc ma kêmêtôc lêma gadêŋ undambê naŋ. 55 Go eŋ kêkô ma gêjam mec lau Israel, taŋ sêkac sa sêkô naŋ, ŋa awa kapôêŋ ma kêsôm gebe 56 “Aê aoc êôc Apômtau, taŋ kêkêŋ nê lau Israel seŋ aweŋ kêtôm biŋ samob, taŋ eŋ gêjac mata ma biŋ teŋ gebeŋ aŋga nê biŋ, taŋ gêjac mata gêdêŋ nê sakiŋwaga Mose naŋ atom. 57 Apômtau, aêacnêŋ Anôtô êmoa êwiŋ aêac êtôm eŋ gêmoa gêwiŋ aêac tameŋi. Eŋ êwi aêac siŋ to êkac tau su aŋga aêacmêŋ atom. 58 Eŋ ê aêacnêŋ ŋalêlôm êndêŋ eŋ gebe tasa ênê lêŋ samob ma tamansaŋ ênê biŋsu ma ênê jatu to ênê ŋagôliŋ, taŋ eŋ kêjatu gêdêŋ aêac tameŋi naŋ. 59 Apômtau, aêacnêŋ Anôtô taê ênam mec to biŋ, taŋ kateŋ gêdêŋ eŋ naŋ, endeŋ tôŋgeŋ ma ênam nê sakiŋwaga to nê lau Israel sa êtôm bêcgeŋ 60 e lau nomŋa samob sêjala gebe Apômtau taugeŋ kêtu Anôtô ma teŋ gêwiŋ eŋ gêmoa atom. 61 Amboac tonaŋ nêm ŋalêlôm ŋaŋêŋ êsa êndêŋ Apômtau, aêacnêŋ Anôtô, ma asêlêŋ êtôm ênê ŋagôliŋ to amansaŋ ênê biŋsu êtôm agôm gêdêŋ ocsalô tonec.”

Sêjac kawi lôm dabuŋ tau

62 Go kiŋ to lau Israel samob sêwiŋ tauŋ sêkêŋ da gêdêŋ Apômtau. 63 Salomo kêkêŋ bulimakao kapoac 22,000 to domba 120,000 gêdêŋ Apômtau kêtu dawama. Amboac tonaŋ kiŋ to lau Israel samob sêjac kawi Apômtaunê lôm dabuŋ. 64 Gêdêŋ bêc tonaŋgeŋ kiŋ gêjam mec lôm ŋamalacluŋ ŋaluŋ, taŋ gêc Apômtaunê lôm ŋanêmŋa naŋ. Aŋga tonaŋ eŋ kêkêŋ daja ma da kôm ŋanôŋa to ŋalêsi dawamaŋa gebe altar kopa, taŋ kêkô Apômtau laŋônêmŋa naŋ, kêtôm da samob tonaŋ atom.

65 Tec gêdêŋ ŋasawa tonaŋ Salomo gêlic om ma Israel samob sêwiŋ eŋ. Êsêacnêŋ toŋ kapôêŋanô. Êsêac sêmêŋ aŋga Hamat ŋamadiŋ e gêdêŋ bu Aiguptuŋa ma sêmoa Apômtau, aêacnêŋ Anôtô laŋônêmŋa kêtôm bêc 7. 66 Gêdêŋ bêc kêtu 8 Salomo kêkêŋ lau sêc êliŋ- êliŋ. Ma êsêac sêjam mec kiŋ ma sêja nêŋ malac totêntac ŋajamgeŋ ma têtu samuc kêtu moasiŋ samob, taŋ Apômtau kêtôc gêdêŋ nê sakiŋwaga Dawid to nê lau Israel naŋ.