‏ 1 Kings 9

Apômtau geoc tau lasê gêdêŋ Salomo kêtu dim luagêcŋa

1Salomo gêjac dabiŋ lôm dabuŋ to kiŋnê andu kapôêŋ ma gêŋ samob, taŋ taê gêjam gebe êŋgômŋa naŋ, gêbacnê su, 2go Apômtau geoc tau lasê gêdêŋ eŋ kêtu dim luagêcŋa kêtôm taŋ eŋ geoc tau lasê gêdêŋ eŋ aŋga malac Gibeon naŋ. 3Ma Apômtau kêsôm gêdêŋ eŋ gebe “Aê gaŋô nêm mec to taŋi, taŋ koteŋ gêdêŋ aê naŋ. Aê kakêŋ andu, taŋ kôkwê sa naŋ, kêtu ŋoc andu dabuŋ gebe ŋoc ŋaê ênêc tonaŋ endeŋ tôŋgeŋ ma matocanô to ŋoc ŋalêlôm êmoa êwiŋ andu tau. 4Embe aôm ôsa ŋoc lêŋ êtôm tamam Dawid kêsa to laŋômnêm sawageŋ ma toŋalêlôm ŋaŋêŋgeŋ gebe ôŋgôm gêŋ samob, taŋ kajatu aôm naŋ, ma taŋam wamu êndêŋ ŋoc ŋagôliŋ to jatu, 5go jakêŋ nêm lêpôŋ gôliŋ Israelŋa êkô endeŋ tôŋgeŋ êtôm gajac mata gêdêŋ tamam Dawid ma kasôm gebe ‘Aôm oc ôpô lêna ŋac teŋ gebe êŋgôŋ nêm lêpôŋ naŋ atom.’ 6Mago aôm to nêm wakuc embe akac taôm su aŋga aê ma amansaŋ aêŋoc biŋsu to ŋagôliŋ, taŋ kakêŋ gêdêŋ amac naŋ atom ma andêŋ anôtôi jaba ana ma anam sakiŋ to ateŋ mec êndêŋ êsêac, 7go aê oc janseŋ Israel su aŋga gamêŋ, taŋ kakêŋ gêdêŋ êsêac naŋ, ma jatiŋ andu tau, taŋ gajam mec gebe ŋoc ŋaê ênêcŋa naŋ, su aŋga laŋôcnêmŋa. Ma lau-m samob sêsu Israel susu ma sêpêlê êsêac. 8Ma andu tonec êtu gêŋ ŋapopoc ma lau samob, taŋ mêŋsêlêlêc gamêŋ tau naŋ, nêŋ ŋalêlôm elendec ma sêpêlê biŋ. Ma embe têtu kênac gebe ‘Kêtu asageŋŋa Apômtau gêgôm gêŋ amboac tonaŋ gêdêŋ gamêŋ to andu tau,’ go sêjô biŋ amboac tonaŋ gebe ‘Êsêac sêwi Apômtau nêŋ Anôtô, taŋ gêwê êsêac aŋga gamêŋ Aiguptuŋa sêsa sêmêŋ naŋ, siŋ ma sêsap anôtôi jaba tôŋ to teteŋ mec ma sêjam sakiŋ gêdêŋ êsêac, tec Apômtau kêkêŋ gêŋwapac samob tonaŋ êsêac sêôc sa.’”

9

9:10-28 Salomo agêc kiŋ Tirusŋa Hiram sê sêlêb gêdêŋ tauŋ. Salomo kêkac lau jaba gebe sênam ênê kôm toŋaôli masigeŋ.