1Sa 12 | JAE | STEP | Go Samuel kêsôm biŋ gêdêŋ lau Israel samucgeŋ gebe “Aê kakêŋ taŋoc amacnêm biŋ ateŋŋa samob ma kakêŋ kiŋ teŋ gêdêŋ amac gebe ênam gôliŋ amac.

‏ 1 Samuel 12

Samuel kêsôm biŋ gêdêŋ lau samob

1 Go Samuel kêsôm biŋ gêdêŋ lau Israel samucgeŋ gebe “Aê kakêŋ taŋoc amacnêm biŋ ateŋŋa samob ma kakêŋ kiŋ teŋ gêdêŋ amac gebe ênam gôliŋ amac. 2 Ma galoc kiŋ tau oc êwê amac. Aê katu ŋamalacanô su ma môdê kêpi aê ma aê latuci sêmoa sêwiŋ amac. Aê gawê amac gêdêŋ aê ŋapalêgeŋ e mêŋgêdêŋ galoc. 3 Aê tec gamoa. Aêŋoc biŋ teŋ embe ênêc amacŋa, naŋ asôm lasê galoc tamoa Apômtau to ŋac, taŋ geŋ oso eŋ naŋ, laŋôŋnêmŋa. Aê kajaŋgo asanê bulimakao su. Aê kakôc asanê doŋki su. Aê gagôm keso gêdêŋ ŋac ondoc ma kakôniŋ asa. Ŋac ondoc kêkêŋ awa ŋalêsiŋa gêdêŋ aê gebe ênac aê matoc su. Asôm lasê gebe jakêŋ gêŋ tau ŋagêjô.” 4 Êsêac sêjô ênê biŋ gebe “Aôm gôgôm keso teŋ gêdêŋ aêac atom to kôkôniŋ aêac atom ma kôkôc awa ŋalêsiŋa teŋ aŋga lau teŋ nêŋ atom.” 5 Go eŋ kêsôm gêdêŋ êsêac gebe “Apômtau tau kêjala ma ênê ŋac geŋ osoŋa gêlic gêdêŋ ocsalô tonec amboac tonaŋgeŋ gebe amac atap gêŋ teŋ sa gêc aê lemoc atom.” Ma êsêac sêjô eŋ awa gebe “Aec, Apômtau kêjala.”

6 Go Samuel kêsôm gêdêŋ lau gebe “Apômtau taŋ kêkêŋ Mose agêc Aron ma sêwê nêm tamemi sêpi aŋga Aiguptu sêmêŋ naŋ kêjala. 7 Amboac tonaŋ andi mêŋakô gebe dawa nêŋ biŋ sa takô Apômtau laŋônêm ŋa ma aê jawa Apômtaunê moasiŋ samob, taŋ kêkêŋ gêdêŋ amac to nêm tamemi naŋ sa. 8 Gêdêŋ taŋ Jakob kêsêp Aiguptu gêja ma lau Aiguptu sêkôniŋ eŋ ŋa gêŋwapac naŋ, amac tamemi sêmôêc gêdêŋ Apômtau. Go eŋ kêsakiŋ Mose agêc Aron, taŋ sêkôc tamemi su aŋga Aiguptu ma sêkêŋ êsêac sêŋgôŋ gamêŋ tonec. 9 Mago êsêac sêliŋ Apômtau, nêŋ Anôtô siŋ, tec Anôtô gêwi êsêac siŋ sêsêp kiŋ Hasor aŋga Jabin nê siŋsêlêc Sisera ma lau Pilisti to lau Moab nêŋ kiŋ, taŋ sêjac siŋ gêdêŋ êsêac naŋ lemeŋ. 10 Gêdêŋ tonaŋ êsêac têtaŋ gêdêŋ Apômtau ma sêsôm gebe ‘Aêac agôm sec, aêac awi Apômtau siŋ ma ajam sakiŋ Bal agêc Astarot. Mago galoc ônam aêac kêsi aŋga ma ŋacjo nêŋ ma aêac anam sakiŋ aômgeŋ.’ 11 Amboac tonaŋ Apômtau kêkêŋ Jerubal agêc Balak ma Jepta agêc Samuel sêjam amac kêsi aŋga nêm ŋacjo, taŋ sêgî amac auc naŋ, lemeŋ ma amac amoa ŋajam.

12 “Ma gêdêŋ taŋ alic lau Amon nêŋ kiŋ Nahas gêmêŋ gebe ênac siŋ êndêŋ amac naŋ, amac aliŋ nêm kiŋ ŋanô Apômtau, amacnêm Anôtô, siŋ ma asôm gadêŋ aê gebe ‘Masi, kiŋ teŋ anam gôliŋ aêac.’ 13 Amboac tonaŋ kiŋ, taŋ ajaliŋ sa to ateŋ eŋ naŋ, Apômtau kêkêŋ eŋ gebe ênam gôliŋ amac. 14 Embe atoc Apômtau sa ma anam sakiŋ eŋ akêŋ taŋem ênê biŋ ma ali awem sa êndêŋ Apômtaunê biŋsu atom, embe amac to nêm kiŋ tau, tec gêjam gôliŋ amac nec andaŋguc Apômtau, nêm Anôtô, go amoa ŋajam. 15 Mago amac embe akêŋ taŋem Apômtaunê biŋ atom, ma embe ali awem sa êndêŋ ênê biŋsu, go Apômtaunê lêma oc enseŋ amac êtôm gêgôm gêdêŋ tamemi. 16 Amboac tonaŋ atu gasuc amêŋ ma alic gêŋtalô kapôêŋ naŋ, Apômtau oc êŋgôm êndêŋ amac matemanôgeŋ. 17 Galoc noc tanac mopolom ŋanô saŋa me. Aê oc jateŋ Apômtau ma eŋ êkêŋ wapap to kom ênac, go alic to ajala gebe Apômtau gêlic nêm biŋ ateŋ kêtu kiŋŋa sec.” 18 Go Samuel keteŋ Apômtau, ma Apômtau kêkêŋ wapap to kom gêjac gêdêŋ oc tonaŋ. Ma lau samob têtêc Apômtau agêc Samuel ŋanôgeŋ. 19 Ma sêsôm gêdêŋ Samuel gebe “Oteŋ Apômtau, aômnêm Anôtô, ôjô nêm sakiŋwaga aêac su, gebe ênam aêac sa ec amac êndu atom. Gebe ma sec gêc kwanaŋgeŋ ma agôm keso tonaŋ jagêwiŋ gebe ateŋ kiŋ teŋ.” 20 Samuel kêsôm gêdêŋ lau gebe “Atêc taôm atom. Amac agôm sec samob tonaŋ biŋŋanôgeŋ, tageŋ andaŋguc Apômtau awi siŋ atom, anam sakiŋ Apômtau ŋa nêm ŋalêlôm samucgeŋ. 21 Akac taôm su aŋga ênê atom gebe anam sakiŋ gwam, taŋ sênam lau sa to sênam lau kêsi sêŋgôm êtôm atom naŋ, gebe ŋanô masi. 22 Apômtau oc êtiŋ amac su atom kêtu ênê ŋaê kapôêŋŋa. Eŋ kêsôm kêtu tôŋ gebe êkêŋ amac atu ênê lau. 23 Aê tauc amboac tonaŋ. Aê janac jaê biŋ tonec gebe jaŋgôm sec êndêŋ Apômtau ma jawi mec êtu amacŋa siŋ atom. Masianô, aê oc jandôŋ intêna ŋajam to solop êndêŋ amac jamoa. 24 Tageŋ atêc Apômtau to anam sakiŋ eŋ ŋaŋêŋ to nêm ŋalêlôm samucgeŋ. Asala gêŋsêga samob, taŋ eŋ gêgôm kêtu amacŋa naŋ. 25 Mago embe aŋgôm sec amoa, go amac anaŋa to nêm kiŋgeŋ.”