2Ki 7 | JAE | STEP | Mago Elisa gêjô ênê biŋ gebe “Ôŋô Apômtaunê biŋ. Apômtau kêsôm amboac tonec gebe ‘Êndêŋ eleŋ ŋaockatu amboac galoc, go sêkêŋ lau sênam ôli polom sêpsêp ŋadôŋ tageŋ ŋa silber ŋamatu tageŋ ma sêkêŋ polom jejec ŋadôŋ luagêc ŋa silber tageŋ aŋga Samaria ŋasacgêdô.’”

‏ 2 Kings 7

1 Mago Elisa gêjô ênê biŋ gebe “Ôŋô Apômtaunê biŋ. Apômtau kêsôm amboac tonec gebe ‘Êndêŋ eleŋ ŋaockatu amboac galoc, go sêkêŋ lau sênam ôli polom sêpsêp ŋadôŋ tageŋ ŋa silber ŋamatu tageŋ ma sêkêŋ polom jejec ŋadôŋ luagêc ŋa silber tageŋ aŋga Samaria ŋasacgêdô.’” 2 Go ŋac taŋ gêwiŋ kiŋ naŋ, gêjô Anôtônê ŋac awa gebe “Apômtau embe êlêc undambê ŋakatam su, tageŋ biŋ tonaŋ oc ŋanô êsa atom.” Mago Elisa kêsôm gebe “Aôm oc ôlic gêŋ tau ŋa taôm matamanô, mago aôm oc ôniŋ gêŋ tonaŋ teŋ atomanô.”

Siŋwaga Samariaŋa sêc su

3 Lau 4 taŋ kole gêjac têc êsêac auc naŋ, sêmoa sacgêdô awêŋa. Êsêac sêsôm gadêŋ tauŋ gebe “Aêac tamoa tonec e tamac êndu êtu asageŋŋa. 4 Aêac embe taêŋ ênam gebe tasa malac tana oc tatap tôbôm sa ma oc tamac êndu. Embe tamoa tonec oc tamac êndu amboac tonaŋgeŋ. Ajôc, dandêŋ lau Suriaŋa nêŋ malac becoboŋa tana. Embe êsêac sendec aêac tamoa, go tamoa mateŋ jali. Embe sênac aêac êndu, go tamac êndu.” 5 Tec êsêac dêdi gêdêŋ dala-dala kêsa gebe sêna lau Suriaŋa nêŋ malac becoboŋa. Mago gêdêŋ taŋ êsêac sêô lasê lau Suriaŋa nêŋ malac becobo ŋamagê naŋ, lau teŋ sêmoa tonaŋ atom. 6 Gebe Apômtau gêgôm lau Suriaŋa nêŋ siŋwaga sêŋô kareta to hos ŋakicsêa to siŋwaga ŋatoŋ kapôêŋanô ŋaôndu. Tec sêsôm gêdêŋ tauŋ gebe “Alicgac me, kiŋ Israelŋa gêjam ôli kiŋ Hetŋa agêc kiŋ Aiguptuŋa gebe mêŋsênac aêac.” 7 Amboac tonaŋ êsêac sec gêdêŋ gamêŋ dala-dala kêsa sêja ma sêwi nêŋ becobo to nêŋ hos ma nêŋ doŋki siŋ sêmoa ma dedec nêŋ becobo to gêŋ samob kêkô ma sêc siŋ su gebe sêmoa mateŋ jali. 8 Ma gêdêŋ taŋ lau tokole tonaŋ sêô lasê becobo ŋamagê naŋ, êsêac sêsô becobo teŋ ŋalêlôm sêja ma seŋ to sênôm gêŋ ma sêkôc silber to gold ma ŋakwê ŋagêdô su ma jasêsiŋ ôkwi. Go sêmu sêmêŋ ma sêsô becobo teŋ ma sêkôc gêŋ aŋga tonaŋ su jasêsiŋ ôkwi amboac tonaŋgeŋ.

9 Go êsêac sêsôm gêdêŋ tauŋ gebe “Aêac dagôm gêŋ gêdêŋ atom. Bêc tonec katu bêc ŋawae ŋajam ŋa teŋ. Embe aêac jamaŋgeŋ tamoa tansaê e oc êpi oc ŋagêjô êtap aêac sa. Amboac tonaŋ galoc tana ma tasôm ŋawae tau êndêŋ kiŋ nê lau.” 10 Amboac tonaŋ êsêac mêŋsêmôêc biŋ gêdêŋ lau sejop sacgêdô malacŋa ma sêjac miŋ biŋ tau gêdêŋ êsêac gebe “Aêac jaaô lasê lau Suriaŋa nêŋ becobo, mago alic gêŋ teŋ ma aŋô biŋ teŋ atomanô. Aêac alic sêkô hos to doŋki tôŋ ma becobo kakô ŋaômageŋ.”

11 Go gejobwaga sacgêdôŋa sêmôêc biŋ ma sêsôm biŋ tau ŋawae gadêŋ lau, taŋ sêŋgôŋ kiŋnê andu ŋalêlôm naŋ. 12 Kiŋ tau gêdi sa gêdêŋ gêbêc ma kêsôm gêdêŋ nê sakiŋwaga gebe “Aê gabe jasôm andaŋ amac gebe lau Suriaŋa sêmasaŋ tauŋ gebe sênac aêac. Êsêac sêjala gebe gêŋ gêjô aêac. Tec sêwi nêŋ becobo siŋ gebe sêsiŋ tauŋ sêmoa gamêŋ ŋamagêgeŋ. Êsêac taêŋ gêjam gebe êndêŋ êsêac sêsa aŋga malac sêmêŋ, go aêac takôc êsêac tôŋ tomateŋ jaligêŋ ma tasa nêŋ malac tana.” 13 Tec ênê sakiŋwaga nêŋ teŋ kêsôm gebe”Tasakiŋ lau ŋagêdô sêkôc hos 5, taŋ gacgeŋ sêmoa mateŋ jali naŋ, nêŋ ŋagêdô sêna sêlic acgom gebe embe sêmoa malac oc sênaŋa têtôm ŋagêdô, taŋ sêjaŋa su naŋ.” 14 Amboac tonaŋ êsêac sêjaliŋ lau ŋagêdô sa ma kiŋ kêsakiŋ kareta luagêc ma kêjatu êsêac gebe sêndaŋguc Surianêŋ siŋwaga ma kêsôm gebe “Ana ma alic acgom.” 15 Tec êsêac têdaguc lau Suriaŋa sêja e dêdêŋ bu Jordan ma sêlic gebe ŋakwê to waba siŋŋa ŋagêdô-gêdô gajam intêna auc samucgeŋ. Lau Suriaŋa sêbaliŋ gêŋ tonaŋ siŋ gêdêŋ taŋ sêc sêkacgeŋ naŋ. Ma keleŋwaga sêmu sêmêŋ jasêjac miŋ biŋ tau gêdêŋ kiŋ.

16 Go lau samob sêsa sêja ma sêjaŋgo waba aŋga lau Suriaŋa nêŋ becobo su. Amboac tonaŋ polom sêpsêp matac ŋadôŋ tageŋ sêjam ôli ŋa mone silber ŋamatu tageŋ ma polom jejec ŋadôŋ luagêc ŋa mone silber ŋamatu tageŋ amboac tonaŋ kêtôm Apômtaunê biŋ. 17 Kiŋ kêiatu ŋac, taŋ gawiŋ eŋ gêmuŋ naŋ gebe eŋ ejop sacgêdô. Ma lau sêka eŋ aŋga sacgêdô tonaŋ e eŋ gêmac êndu kêtôm Apômtaunê ŋac kêsôm lasê gêdêŋ taŋ kiŋ kêsêp gêdêŋ eŋ gêja naŋ. 18 Gebe gêdêŋ tonaŋ Anôtônê ŋac kêsôm gêdêŋ kiŋ gebe “Êndêŋ eleŋ ŋaockatu amboac tonec lau sênam ôli polom matac sêpsêpŋa ŋadôŋ tageŋ ŋa mone silber ŋamatu tageŋ ma polom jejec ŋadôŋ luagêc ŋa mone silber ŋamatu tageŋ aŋga malac ŋasacgêdô.” 19 Ma lau mata siŋŋa tau gêjô Anôtônê ŋac nê biŋ gebe “Embe Apômtau tau êlêc undambê ŋakatam su gêŋ amboac tonaŋ oc ŋanô êsa atom.” Ma Elisa gêjô eŋ awa gebe “Aôm oc ôlic gêŋ tau ŋa taôm matamanô, mago aôm oc ôniŋ gêŋ tau atomanô.” Amboac tonaŋ biŋ tau ŋanô kêsa kêpi eŋ gebe lau sêka eŋ aŋga malac ŋasacgêdô e gêmac êndu.

20

8:1 —13:13 Miŋ ŋagêdô, taŋ kêsa aŋga gamêŋ Juda to Israelŋa gêdêŋ kiŋ ŋagêdô sêjam gôliŋ gamêŋ tonaŋ naŋ, kêsêp môkêlatu tonec.