Amo 6 | JAE | STEP | “Ojae êsêac, taŋ sêlêwaŋ sêmoa Sion, to êsêac, taŋ sêŋgôŋ lôc Samariaŋa totêntac kêpa sugeŋ, ma tenteŋlatu ŋamataŋa nêŋ lau towae, taŋ gôlôac Israel dêdêŋ êsêac sêja naŋ.

‏ Amos 6

Senseŋ Israel su ŋabiŋ

1 “Ojae êsêac, taŋ sêlêwaŋ sêmoa Sion,
to êsêac, taŋ sêŋgôŋ lôc Samariaŋa totêntac kêpa sugeŋ,
ma tenteŋlatu ŋamataŋa nêŋ lau towae,
taŋ gôlôac Israel dêdêŋ êsêac sêja naŋ.
2 Alom malac Kalne ana ma alic acgom,
go aŋga ônê ana malacsêga Hamat.
Go asêp Pilistinêŋ malac Gat ana.
Êsêacnêŋ gamêŋ ŋajam kêlêlêc gamêŋ tonec su me.
Me êsêacnêŋ nom kapôêŋ kêlêlêc amacnêm nom su me.
3 O amac, taŋ atiŋ bêc sec su naŋ,
mago akalem ŋaclai êkôniŋ lauŋa mêŋkêtu dambê.

4 “Ojae êsêac, taŋ sêsa tauŋ sic sêc pôpô, taŋ sêjam gêlôŋ ŋa jabo naŋ,
to sêmêtôc tauŋ sêsac nêŋ mê ŋaô,
ma seŋ domba ŋalatu aŋga domba ŋatoŋ
to bulimakao ŋalatu, taŋ seŋgeŋ e kêtôp ŋajam naŋ.
5 Êsêac sêjam wê ole-ole to sêjac gêŋ wêŋa kêtaŋ gêwiŋ,
ma sêmasaŋ gêŋ wêŋa wakuc kêtôm Dawid.
6 Êsêac sênôm wain kêsêp laclu kapôêŋ
to seŋ oso tauŋ ŋa niptêkwi ŋajamanô tau,
mago sêmoa toŋalêlôm ŋawapac kêtu Josep gêjaŋaŋa atom.
7 Tec êsêac têtu lau, taŋ sêŋgôŋ kapoacwalô aŋga gamêŋ jaêc naŋ, nêŋ ŋamata,
ma êsêac, taŋ sêmêtôc tauŋ sêsac nêŋ mê ŋaô naŋ, têtu samuc tauŋ toôndugeŋ êtiam atom.”

8 Apômtau, lausiŋ undambêŋa nêŋ Anôtô, kêsôm gebe
Apômtau Anôtô kêtôc lêma kêpi tau gebe
“Aê gadec Jakobnê ketoc tau sa
ma têtac gedec ênê andu kiŋŋa
ma gabe jakêŋ malac to gêŋ samob, taŋ gêc ŋalêlôm naŋ, êndêŋ ŋacjo.”
9 Lau 10 embe sêmoa andu teŋ, oc sêmac êndu. 10 Ma ŋac teŋ, taŋ gêjaŋa atom ma kêsiŋ tau gêŋgôŋ nê andu ŋabalêm ŋalêlômŋa naŋ, nê tawaŋ, taŋ gebe êkôc eŋ ma sejoŋ ŋatêkwa sa aŋga andu naŋ, embe êsôm gebe “Ŋac teŋ gêŋgôŋ gêwiŋ aôm me masi,” go eŋ êjô nê tawaŋ awa gebe “Masi,” ma êmbaob eŋ gebe “Us, jamaŋgeŋ, aêac tasam Apômtaunê ŋaê atommaŋ.”

11 Alicgac me, Apômtau kêjatu, tec oc têtuc andu kapôêŋ popoc
ma sênac andu sauŋ êkôc-êkôc.
12 Amboac ondoc, hos sêlêti sêmoa poc ŋaô
ma bulimakao sê sakweŋ ki, gebe sêkac gwêc ôkwi me.
Mago amac ajam lêŋ mêtôcŋa ôkwi kêtu gêŋ ŋamalic
to agôm biŋgêdêŋ ŋaŋanô ŋamakic kêsa.
13 Amac atu samuc gêŋ ŋaôma
ma asôm gebe “Aêac aku malac Karnaim tulu ŋa tauŋ ma ôliŋwalô atom me.”

14 “O gôlôac Israel, alic acgom,
aê jajatu tenteŋlatu toŋ teŋ sa, gebe sênac siŋ êndêŋ amac.”
Apômtau, lausiŋ undambêŋa nêŋ Anôtô, kêsôm biŋ tonaŋ.
“Ma êsêac sêkôniŋ amac tôŋ aŋga Hamat ŋaintênagêsuŋ e naêndêŋ bu Arabaŋa.”