Amo 7 | JAE | STEP | Apômtau Anôtô kêtôc gêŋ tonec gêdêŋ aê gebe Aê galic eŋ kêmasaŋ wagô gêdêŋ taŋ kiŋnê lau sebob gêgwaŋ ŋamata su ma gêgwaŋ ŋamêdôb kêpuc kêtu luagêcŋa.

‏ Amos 7

Amos gêlic ŋakatu wagôŋa

1 Apômtau Anôtô kêtôc gêŋ tonec gêdêŋ aê gebe Aê galic eŋ kêmasaŋ wagô gêdêŋ taŋ kiŋnê lau sebob gêgwaŋ ŋamata su ma gêgwaŋ ŋamêdôb kêpuc kêtu luagêcŋa. 2 Wagô seŋ nom ŋagêgwaŋ su, go kasôm gebe

“O Apômtau Anôtô, aê jateŋ aôm gebe ôsuc biŋ okwi,
gebe Jakob oc êôc gêŋ tau amboac ondoc. Eŋ sauŋanô.”
3 Tec Apômtau gêjam nê ŋalêlôm ôkwi ma kêsôm gebe
“Biŋ tonaŋ êtu anô atom.”

Amos gêlic ŋakatu jaŋa

4 Go Apômtau Anôtô kêtôc gêŋ tonec gêdêŋ aê gebe Aê galic Apômtau Anôtô kêkalem ja gebe êmêtôc biŋ. Ma ja geŋ gêdimbobsêga su ma mêŋgeŋ nom gêmoa. 5 Go kasôm gebe

“O Apômtau Anôtô, aê jateŋ aôm gebe ôwi siŋ,
gebe Jakob êôc gêŋ tau amboac ondoc. Eŋ sauŋanô.”
6 Tec Apômtau Anôtô gêjam nê ŋalêlôm ôkwi ma kêsôm gebe
“Biŋ tonaŋ êtu anô atom amboac tonaŋgeŋ.”

Amos gêlic ŋakatu gam topocŋa

7 Eŋ kêtôc gêŋ tonec gêdêŋ aê gebe Aê galic Apômtau kêkô tuŋbôm, taŋ sêkwê todôŋ, taŋ sêmasaŋ ŋa gam topoc êtôc gêŋ solopŋa. Ma eŋ lêma kêkôc dôŋ tonaŋ ŋateŋ. 8 Ma Apômtau kêsôm gêdêŋ aê gebe “Amos, aôm gôlic asageŋ.” Ma aê kasôm gebe “Galic dôŋpoc teŋ.” Go Apômtau kêsôm gebe

“Ôlic acgom, aê kakô ŋoc lau Israel ŋalêlôm
ma gajam dôŋ êsêac ŋa dôŋpoc.
Aê gabe jaê êsêacnêŋ biŋ tôŋ êtiam atom.
9 Isaknê gamêŋ ŋabau êtu gasaŋ
to senseŋ Israelnêŋ gamêŋ dabuŋ su.
Ma aê gabe jandi tosiŋgeŋ gebe janac siŋ êndêŋ Jerobeamnê gôlôac.”

Amos agêc Amasia

10 Go dabuŋwaga Betelŋa Amasia kêsakiŋ biŋ gêdêŋ Israelnêŋ kiŋ Jerobeam gebe “Amos kêkic aômnêm biŋ gêmoa gôlôac Israel ŋalêlôm. Lau tau têtôm gebe sêôc ênê biŋ tôŋ atom. 11 Gebe Amos kêsôm gebe

‘Siŋ oc enseŋ Jerobeam su,
ma Israel sêwi nêŋ gamêŋ siŋ nasêŋgôŋ kapoacwalô aŋga gamêŋ jaêc.” ’
12 Ma Amasia kêsôm gêdêŋ Amos gebe “O ŋac-goc-biŋ- lasêwaga, wêc siŋ su taôm ôna nêm gamêŋ Judaŋa, ec ôniŋ nêm polom to oc biŋ lasê aŋga ônê. 13 Mago oc biŋ lasê aŋga Betel êtiam atomanô gebe Betel kêtu kiŋnê gamêŋ dabuŋ to kêtu ênê gamêŋ tau ŋalôm dabuŋ teŋ.”

14 Go Amos gêjô Amasia awa gebe “Aê propete atom, ma propete teŋ latu aê atom amboac tonaŋgeŋ. Mago aê ŋac bôcŋa to ŋac kasê ka ŋanôŋa. 15 Ma Apômtau kêkôc aê su aŋga bôc ŋatoŋ ma Apômtau kêsôm gêdêŋ aê gebe ‘Ôna oc biŋ lasê êndêŋ ŋoc lau Israel.’ 16 Amboac tonaŋ galoc ôkêŋ taŋam Apômtaunê biŋ.

Aôm kôsôm gebe ‘Oc biŋ lasê eso Israelnêŋ ŋalêlôm atom
ma ônam mêtê eso Isaknê gôlôacnêŋ ŋalêlôm atom.’
17 Kêtu tonaŋŋa Apômtau kêsôm biŋ tonec gebe
‘Aômnêm awê oc êtu mockaiŋo êmoa malac,
ma siŋ enseŋ latômio to ŋac su.
Ŋacjo sênac lôcawa nêm nom to sênac sam êndêŋ tauŋ.
Aôm taôm ômac êndu aŋga lau samuc nêŋ gamêŋ,
ma Israel oc sêwi nêŋ gamêŋ siŋ nasêŋgôŋ kapoacwalô aŋga gamêŋ jaêc.” ’