Amo 9 | JAE | STEP | Aê galic Apômtau kêkô kêsi altarŋa ma kêsôm gebe “Ôtuc alê popoc e salôm ênsêlô mêŋêtuc lau samob môkêŋapac popoc, ma êsêac, taŋ sêwê sa naŋ, aê oc janac ŋa siŋ, ma teŋ êc su atom, teŋ ênam samuc atom.

‏ Amos 9

Lau teŋ sêwê Apômtaunê mêtôc sa atom

1 Aê galic Apômtau kêkô kêsi altarŋa ma kêsôm gebe
“Ôtuc alê popoc e salôm ênsêlô
mêŋêtuc lau samob môkêŋapac popoc,
ma êsêac, taŋ sêwê sa naŋ, aê oc janac ŋa siŋ,
ma teŋ êc su atom, teŋ ênam samuc atom.

2 “Êsêac embe seweŋ nom sêsêp lamboam sêna,
aê lemoc oc jakôc êsêac aŋga ônê.
Êsêac embe sêpi undambê sêna,
aê oc jakôc êsêac aŋga tônê sêsêp sêmêŋ.
3 Êsêac embe sêsiŋ tauŋ sêmoa lôc Karmel ŋatêpôê,
oc jaê êsêac lasê ma jakôc êsêac tôŋ.
Êsêac embe sêsiŋ tauŋ sêsêp gwêc ŋagêdimbob, gebe jalic êsêac atom,
oc jajatu moac, gebe êŋac êsêac aŋga ônê.
4 Êsêac embe sêsêlêŋ sêmuŋ nêŋ ŋacjo sêsêp kapoacwalô sêna
oc jajatu siŋ, gebe enseŋ êsêac su aŋga tônê.
Aê matocanô êpi êsêac êtu êmoasiŋ êsêacŋa atom, êtu êkêŋ sec êsêacŋa.”

5 Apômtau, lausiŋ undambêŋa nêŋ Anôtô, kêmoasac nom e gêwê,
ma êsêac samob, taŋ sêŋgôŋ nom tau naŋ, têtaŋ lasê,
ma gêŋ nomŋa samucgeŋ kêsuŋ kêtôm bu Nil
ma gê su kêtiam kêtôm bu Nil Aiguptuŋa.
6 Eŋ kêkwê nê balêm lôlôcŋa aŋga undambê
ma kêsuŋ nê andu ŋaalê kêkô nom.
Eŋ taŋ kêkalem gwêc ŋadembom ma kêsêwa kêsêp nom naŋ,
nê ŋaê gebe Apômtau.
7 Apômtau kêsôm gebe

“O gôlôac Israel, aê galic amac atôm lau Aitiopiaŋa atom me.
Aê gawê Israel aŋga Aiguptu ma lau Pilisti aŋga Kaptor
to lau Suria aŋga Kir sêmêŋ atom me.
8 Alicgac me, Apômtau Anôtô mata gê gamêŋ kiŋŋa * sec
ma aê gabe janseŋ gamêŋ tau su ênaŋa aŋga nom,
tageŋ gabe janseŋ Jakobnê gôlôac su samucgeŋ atom.”
Apômtaunê biŋ tau tonec.

9 “Alic acgom, aê gabe jajatu biŋ
ma jakoloŋ gôlôac Israel sêsêp lau tomôkê-tomôkê samob ŋalêlôm.
Aê jakoloŋ êsêac êtôm sekoloŋ polom kêsêp lala
e ŋamatu teŋ embeŋ êsêp nom atom. **
10 Aêŋoc launêŋ lau sec samob, taŋ sêsôm gebe
‘Gêŋwapac êtap aêac sa to êôc lêlêc aêac atom naŋ,
siŋ enseŋ êsêac su sênaŋa.’”

Êtu ŋamu Apômtau êmansaŋ Israelnêŋ biŋ êtiam

11 “Êndêŋ bêc tônê aê gabe jajac Dawidnê bec, taŋ kêku naŋ, sa êtiam.
Aê gabe jambôc ŋalasê to jamboa ŋapopoc sa
ma jakwê sa êtiam êtôm andaŋgeŋŋa,
12 gebe êsêac sêwê kaiŋ Edom ŋapopoc to lau tomôkê- tomôkê samob,
taŋ sê ŋoc ŋaê kêpi êsêac naŋ.”
Apômtau taŋ êŋgôm biŋ tau êtu anô naŋ, kêsôm biŋ tonaŋ.
13 Apômtau kêsôm gebe
“Alic acgom, bêc oc mêŋêsa, go ŋac êkac nom ôkwi mêŋê ŋac ejoŋ ŋanô saŋa tôŋ,
ma ŋac êka wain ŋanôŋa mêŋê ŋac êsê ŋawêŋa tôŋ. ***
Wain ŋakana oc mêŋtep-mêŋtep aŋga lôc
to enseleŋ aŋga gamêŋ ŋabau.
14 Aê gabe jaŋgôm ŋoc lau Israel nêŋ gêŋ mataêjam êtu wakuc.
Êsêac sêkwê malac, taŋ seseŋ popoc naŋ, sa êtiam ma sêŋgôŋ ŋalêlôm.
Êsêac sêsê kôm wainŋa ma sênôm ŋawain.
Êsêac sêsê kôm ma sêniŋ ŋanô.
15 Aê gabe jasê êsêac sêsêp tauŋ nêŋ nom
ma sêmbuc êsêac sa aŋga nom, taŋ kakêŋ gêdêŋ êsêac naŋ, êtiam atom.”
Apômtau aômnêm Anôtô, nê biŋ tau tonec. ^{▼▼ Lau Israel nêŋ kiŋnê gamêŋ.
,} ^{▼▼ Lau sekoloŋ gêŋ kêsêp lala, gebe sêwa ŋajam to sec} êkôc. Têm ŋagêdô lau sekoloŋ ŋop kêsêp lala, tec ŋop ŋajam kêsêp laclu ma ŋapoc gacgeŋ gêc lala ŋalêlôm. Têm teŋ lau sekoloŋ polom ŋanô e ŋanô gêc lala ŋalêlôm ma ŋapa gêjaŋa. Ŋamadiŋ tonec kêkanôŋ biŋ polom ŋanôŋa. ^{▼▼ Biŋ tonec ŋam gebe kom oc anam ŋanô ŋapaŋ.}