Eph 2 | JAE | STEP | Amac agêli biŋsu to nêm sec gêgôm amac atu matê su.

‏ Ephesians 2

Anôtô gêŋu aêac sa tamoa mateŋ jali

1 Amac agêli biŋsu to nêm sec gêgôm amac atu matê su. 2 Gêmuŋgeŋ agôm nêm gêŋ amboac tonec, asêlêŋ kêtôm nom tonec ŋagôiiŋ to asô ŋatau, taŋ gêjam gôliŋ ŋaclai sec umboŋ ŋalabuŋa to ŋalau, taŋ gêjam kôm kêpi lau taŋeŋpêc gêdêŋ Anôtônê biŋ naŋ ŋalabu. 3 Gêmuŋgeŋ aêac samob tatôm êsêac ma tasa nêŋ lêŋ kêtôm têntac ŋakalac kêkac aêacŋa. Aêac dagôm gêŋ, taŋ ôliŋ to ŋalêlôm kêkac aêacŋa naŋ, ŋanô kêsa, tec Anôtô têtac ŋandaŋ gêdêŋ aêac kêtôm têtac ŋandaŋ gêdêŋ êsêac ŋagêdô.

4 Mago Anôtô taê walô aêac ŋanôgeŋ ma têtac gêwiŋ aêac kêlêlêc, 5 tec kêkêŋ aêac, taŋ tatu mêtê kêtu tagêli biŋsuŋa naŋ, tamoa mateŋ jali dawiŋ Kilisi. Anôtônê moasiŋ gêjam amac kêsi. 6 Ma eŋ gêŋu aêac sa dawiŋ Kilisi Jesu to ketoc aêac daŋgôŋ gamêŋ undambêŋa dawiŋ eŋ. 7 Anôtô gêgôm gêŋ tonaŋ gebe êtôc nê moasiŋ tolêlôm-tolêlôm êndêŋ lau êndêŋ têm samob, taŋ oc mêŋêsa naŋ. Moasiŋ tau gêwa tau sa gêdêŋ taŋ Anôtô têtac gêwiŋ aêac ma kêkêŋ Kilisi Jesu gêmêŋ naŋ. 8 Gebe Anôtô kêmoasiŋ amac, tec gêjam amac sa kêtu akêŋ gêwiŋŋa. Taôm agôm atom, Anôtô tau kêkêŋ ŋaômageŋ. 9 Ŋamalac teŋ nê koleŋ gêjam eŋ sa atom, gebe teŋ etoc tau sa atom. 10 Anôtô tau nê koleŋ ŋanô aêac. Eŋ gêwiŋ Kilisi Jesu ma kêkêŋ aêac gebe tanam koleŋ ŋajam, taŋ eŋ kêmasaŋ kwanaŋgeŋ naŋ, gebe tasa nêŋ lêŋ tapeŋ ŋanô tonaŋgeŋ.

Anôtô gêbiŋ aêac tôŋ tatu gôlôac dabuŋ tageŋ

11 Amboac tonaŋ taêm ênam gebe gêmuŋgeŋ tenemi sêkôc amac amboac tenteŋlatui, ma lau Juda, taŋ sêsa êsêac ŋa lemeŋ naŋ, tec sêsam amac gebe lau samuc. 12 Gêdêŋ ŋasawa tonaŋ amac amoa jaêc Kilisi, ma Israelwaga sêlic amac amboac êsêacnêŋ lau ŋagêdô amac atom. Amac lau jaba, tec awê kaiŋ poac ŋamoasiŋ, taŋ Anôtô gêjac mata gêdêŋ nê lau naŋ atom. Amac amoa nom tonec akêŋ matem gêŋ teŋ atom to ajam kauc Anôtô. 13 Mago galoc awiŋ Kilisi Jesu ma amac, taŋ gêmuŋgeŋ amoa jaêc naŋ, atu gasuc amêŋ kêtu Kilisi gêmac ênduŋa.

14 Kilisi tau kêtu aêacnêŋ biŋmalô ŋamôkê. Eŋ gêbiŋ aêac Juda to lau samuc tôŋ tapi tageŋ to geseŋ kisa, taŋ kêtu balaŋ geŋ aêac gêŋgic naŋ, su ŋa tau ôli. 15 Eŋ geseŋ biŋsu ŋajatu to ŋagôliŋ su gebe êkêŋ toŋ luagêc têtu toŋ wakuc tageŋ êmoa eŋ tau ŋalêlôm, tec kêkêŋ biŋmalô. 16 Eŋ gêmac êndu aŋga kakesotau, tec geseŋ kisa su jagêbiŋ lulugeŋ tôŋ têtu ôli tageŋ ma gê wama gêdêŋ Anôtô. 17 Amboac tonaŋ Kilisi gêmêŋ ma gêjam mêtê kêpi biŋmalô tau ŋaŋawae ŋajam gêdêŋ amac, taŋ amoa jaêc Anôtô to êsêac, taŋ têtu gasuc eŋ naŋ 18 gebe ŋac tau tonaŋ kêkêŋ Ŋalau tageŋ gêwê aêac samob dêdêŋ Tama taja.

19 Amboac tonaŋ amac atôm lau jaba to lau ŋamagêŋa kêtiam atom. Amac atu Anôtônê launêŋ ŋagêdô to atu Anôtônê gôlôac awiŋ. 20 Eŋ kêkwê amac sa atu andu akô nombaŋ aposolo to propete ŋaô. Ma Kilisi Jesu tau kêtu andu tau ŋaalê kêclêsuŋa. 21 Ŋac tonaŋ gedeŋ andu tau tôŋ ma êŋgôm êtu kapôêŋ e êtu Apômtaunê lôm dabuŋ, 22 ma kêsuŋ amac sa awiŋ atu Anôtônê andu. taŋ nê Ŋalau gêjam auc naŋ.