Eph 5 | JAE | STEP | Amac atu Anôtônê ŋapalê, taŋ eŋ têtac gêwiŋ naŋ, tec atêku eŋgeŋ.

‏ Ephesians 5

1 Amac atu Anôtônê ŋapalê, taŋ eŋ têtac gêwiŋ naŋ, tec atêku eŋgeŋ. 2 Ma asêlêŋ totêmtac êwiŋgeŋ amboac Kilisi gêwiŋ aêac to kêkêŋ tau kêtu aêacŋa kêtu moasiŋ to da gêdêŋ Anôtô gêŋu ŋamalu ŋajam.

3 Asôm gêŋ mockaiŋo to mockaiŋŋa ma geŋ môp-môp samob to biŋ matem katu awaŋa êsêp nêm biŋgalôm atom, gebe Anôtônê lau samob dedec biŋ amboac tonaŋ ŋai. 4 Andec biŋ sesec ma biŋ meloc-meloc to biŋ agwa-agwa kêtôm amac asôm atomŋa amboac tonaŋgeŋ, anam daŋgegeŋ êjô. 5 Biŋ tonec amac ajalagac gebe Mockaiŋo to mockaiŋ teŋ me môp ŋatau teŋ me ŋac mata katuboa teŋ, taŋ talic eŋ kêtôm ŋac gêjam sakiŋ anôtô jabaŋa teŋ naŋ, nêŋ teŋ oc êwê kaiŋ gêŋlênsêm aŋga Kilisi agêc Anôtô nêŋ gamêŋ atom.

Tasêlêŋ tamoa ŋawê ŋalêlôm

6 Lau teŋ têtim amac ŋa biŋ ŋaômaŋaôma atom, gebe kêtu biŋ amboac tonaŋŋa Anôtônê têtac ŋandaŋ kêtap taŋeŋpêcwaga sa. 7 Awê kaiŋ êsêacnêŋ biŋ atom. 8 Biŋŋanô, gêmuŋgeŋ amac amoa tokesec, mago galoc amoa toŋawê gebe atu Anôtônê gêŋgac, tec asa nêm lêŋ atôm ŋapalê ŋawêŋa, 9 gebe ŋawê ŋanô tonec moasiŋ totau-totau ma biŋgêdêŋ to biŋŋanô. 10 Ansaê gêŋ, taŋ Apômtau gêlic ŋajam naŋ. 11 Ŋakesec ŋakoleŋ, taŋ ŋanô masi naŋ, anam awiŋ atom, akip sa ênêc awêgeŋ acgom, 12 gebe gêŋ, taŋ êsêac sêgôm kelecgeŋ naŋ, embe tasôm ênêc awêgeŋ, oc majeŋ. 13 Gêŋ samob, taŋ takip sa e ŋawê êpô naŋ, oc ênêc awê. 14 Ma gêŋ samob, taŋ gêc awê naŋ ŋawê. Tec biŋ gêc gebe

“Aôm taŋ gôêc bêc naŋ, matam êlac
ma ôndi sa aŋga ŋacmatênêŋ,
go Kilisi êpô aôm.”
15 Amboac tonaŋ ajop taôm êtu nêm lêŋ samobŋa ŋapep. Asêlêŋ atôm lau meloc atom, asêlêŋ atôm lau tokauc mêtêŋageŋ. 16 Ajaiŋ têm ênaŋa ŋaômageŋ atom, gebe têm tonec sec. 17 Amboac tonaŋ atu meloc atom, mago nêm kauc êsa biŋ, taŋ Apômtau taê gêjam gebe êŋgômŋa naŋ.

18 Anôm wain e êjaŋiŋ amac atom, gebe gêŋ tonaŋ oc êjaiŋ amac. Ŋalau Dabuŋ ênam amac auc acgom 19 e pesalem to wê dabuŋ ma wê ŋajam-ŋajam êtu nêm biŋgalôm. Apuc wê dabuŋ sa to aôc Apômtau sa ŋa pesalem aŋga nêm ŋalêlôm. 20 Anam daŋge êndêŋ Tameŋi Anôtô endeŋ tôŋgeŋ êtu gêŋ samobŋa anam aêacnêŋ Apômtau Jesu Kilisi laŋô.

Biŋ lauo to ŋacŋa

21 Asô taôm ŋalabu êtu atêc Kilisiŋa.

22 Lauo sêsô nêŋ ŋaci ŋalabu êtôm sêsô Apômtau ŋalabu, 23 gebe ŋac kêtu awênê môkêapac kêtôm Kilisi kêtu gôlôac dabuŋ môkêapac, ma kêtu gôlôac dabuŋ, taŋ kêtu eŋ ôli naŋ nê kêsiwaga. 24 Tec lauo sêsô nêŋ ŋaci ŋalabu êtu gêŋ samobŋa, têtôm taŋ gôlôac dabuŋ sêsô Kilisi ŋalabu naŋ.

25 Amac ŋacwaga têmtac êwiŋ nêm lauo atôm Kilisi têtac gêwiŋ gôlôac dabuŋ ma kêkêŋ tau kêtu êsêacŋa. 26 Eŋ kêkêŋ nê mêtê ma kêsagu êsêac ŋa bu têtu selecŋa e têtu Anôtônê gêŋ, 27 gebe ênac dabiŋ gôlôac dabuŋ e ŋawasi laŋgwageŋ ma ênac eŋ mataanô ŋajam. Eŋ gebe êlic gôlôac dabuŋ ŋatêmui to mêliŋ-mêliŋ ma gêŋ ŋagêdô amboac tonaŋ ŋai êpi eŋ atom, gebe êlic eŋ êtu dabuŋ to laŋônêm sawageŋ. 28 Amboac tonaŋ êsêac ŋacwaga têntac êwiŋ nêŋ lauo êtôm têntac gêwiŋ tauŋ ôliŋ. Ŋac taŋ têtac gêwiŋ nê awê naŋ, têtac gêwiŋ tau. 29 Ŋac teŋ kêkêŋ kisa gêdêŋ tau ôli atomanô. Eŋ gêlôm to kêtu mêtê tau ôli ŋapep, kêtôm Kilisi gêgôm gêdêŋ gôlôac dabuŋ, 30 gebe aêac tatu ênê ôli ŋagêŋlêlôm. 31 “Kêtu biŋ tonaŋŋa ŋamalac êwi têna agêc tama siŋ ma êsap nê awê tôŋ, ma êsêagêc têtu ôli tageŋ.” 32 Biŋ tonec ŋam kêsêp lêlômsêga ma aê gawa sa kêkanôŋ Kilisi to gôlôac dabuŋ. 33 Mago kêkanôŋ amac gêwiŋ. Ŋacwaga samob têntac êwiŋ nêŋ lauo amboac têntac gêwiŋ tauŋ, ma lauo samob tetoc nêŋ ŋaci sa.