Exo 4 | JAE | STEP | Go Mose gêjô eŋ awa gebe “Mago lau Israel embe sêkêŋ êwiŋ aê atom to sêkêŋ taŋeŋ ŋoc biŋ atom ma sêsôm êndêŋ aê gebe ‘Apômtau geoc tau lasê gêdêŋ aôm atom,’ go jaŋgôm amboac ondoc.”

‏ Exodus 4

1 Go Mose gêjô eŋ awa gebe “Mago lau Israel embe sêkêŋ êwiŋ aê atom to sêkêŋ taŋeŋ ŋoc biŋ atom ma sêsôm êndêŋ aê gebe ‘Apômtau geoc tau lasê gêdêŋ aôm atom,’ go jaŋgôm amboac ondoc.” 2 Apômtau kêtu kênac eŋ gebe “Aôm lêmam kômêgôm asageŋ.” Ma Mose gêjô eŋ awa gebe “Kamêgôm tôc.” 3 Go Apômtau kêsôm gebe “Ômbaliŋ naênêc nom.” Ma Mose kêbaliŋ tôc jagêc nom e kêtu moac. Ma kêtakê e gênu tau su. 4 Mago Apômtau kêsôm gêdêŋ Mose gebe “Ômêtôc lêmam ma ômêŋgôm moac ŋalêŋuc.” Tec eŋ kêmêtôc lêma ma kêmêgôm moac tôŋ jakêtu tôc kêtiam kêsêp eŋ lêma. 5 Ma Apômtau kêsôm gebe “Ôŋgôm amboac tonaŋ e sêkêŋ êwiŋ gebe Apômtau eŋ êsêac tameŋinêŋ Anôtô. Eŋ Abrahamnê Anôtô ma Isaknê Anôtô ma Jakobnê Anôtô geoc tau lasê gêdêŋ aôm.”

6 Go Apômtau kêsôm biŋ ŋagêdô gêdêŋ eŋ gebe “Ônsêmuŋ lêmam êsô nêm ŋakwê.” Eŋ kêsêmuŋ lêma kêsô ma gêdêŋ taŋ kêtaiŋ sa kêtiam naŋ, gêlic gebe kamocbôm gêjac têc lêma auc e kêtu sêp kêtôm labi. 7 Go Apômtau kêsôm gebe “Ônsêmuŋ lêmam êmu êsô nêm ŋakwê êtiam.” Tec Mose kêsêmuŋ lêma gêmu kêsô nê ŋakwê kêtiam, Ma gêdêŋ taŋ kêtaiŋ sa kêtiam naŋ, gêlic gebe ŋajam kêsa kêtôm ôli ŋagêdô. 8 Ma Anôtô kêsôm gebe “Êsêac embe sêkêŋ êwiŋ aôm atom ma gêŋtalô ŋamataŋa embe ênam êsêac ôkwi atom, go sêkêŋ êwiŋ gêŋtalô êtu luagêcŋa. 9 Ma êsêac embe sêkêŋ êwiŋ gêŋtalô luagêc tonaŋ to sêkêŋ taŋeŋ nêm biŋ atom, go ôkati bu aŋga bu Nil ma mêŋôkêc êsêp nom, go bu, taŋ ôkati aŋga bu Nil naŋ, oc êtu dec ênêc nom.”

10 Mago Mose kêsôm gêdêŋ Apômtau gebe “Oe, ŋoc Apômtau, aê aoc sob atom. Gêmuŋgeŋ aê gamoa amboac tonaŋ ma galoc kôsôm biŋ gêdêŋ aê, taŋ katu nêm sakiŋwaga naŋ, mago aoc sob kêsa atom amboac tonaŋgeŋ. Aê kasôm biŋ malô-malô to imbeloc ŋawapac sec.” 11 Go Apômtau kêsôm gêdêŋ eŋ gebe “Asa kêkêŋ ŋamalac awasuŋ. Asa kêkêŋ eŋ awamê me taŋasuŋbic me gêlic gamêŋ me matapec. Aê Apômtau kakêŋ atom me. 12 Amboac tonaŋ ôna ma aê jawiŋ aôm to janam aôm awam sa ma jandôŋ biŋ ôsômŋa êndêŋ aôm.” 13 Mago Mose kêsôm gebe “O Apômtau, aê jateŋ aôm gebe ôsakiŋ lau teŋ.”

14 Go Apômtau têtac ŋandaŋ kêsa gêdêŋ Mose ma kêsôm gebe “Têwam Aron aŋga Lewinê gôlôac gêmoa atom me. Aê kajala eŋ awa sob. Ôlic acgom, eŋ gêdi kêpuc aôm tôŋtôŋ gêmêŋ. Eŋ embe êlic aôm, oc têtac ŋajam êsa ŋanô. 15 Amboac tonaŋ ônam biŋgalôm êndêŋ eŋ ma ôwa nêm biŋ sa êndêŋ eŋ gebe êsôm lasê. Ma aê gabe jawiŋ amagêc to janam amagêc aweŋ sa ma jandôŋ gêŋ ôŋgômŋa êndêŋ aôm. 16 Eŋ êjô aôm su êsôm biŋ êndêŋ lau ma êtu aôm awam. Ma eŋ êlic aôm amboac Anôtô. 17 Ma aôm ômêŋgôm tôc tonec gebe ôŋgôm gêŋtalôŋa.”

Mose gêmu gêja Aiguptu

18 Ma Mose gêmu gêdêŋ lawa Jetro gêja jakêsôm gêdêŋ eŋ gebe “Aê jateŋ aôm gebe ôlôc sa ma aê jamu jandêŋ ŋoc lau jana Aiguptu najalic êsêac sêmoa mateŋ jali me masi.” Ma Jetro kêsôm gêdêŋ Mose gebe “Ôêc tobiŋmalôgeŋ ôna.” 19 Ma Apômtau kêsôm gêdêŋ Mose aŋga Midian gebe “Ômu ôna Aiguptu gebe lau samob, taŋ sebe senseŋ aôm naŋ, sêmac êndu su.” 20 Amboac tonaŋ Mose kêkôc nê awê to latu ma kêkêŋ êsêagêc sêŋgôŋ doŋki teŋ ŋaô ma gêja gamêŋ Aiguptuŋa. Ma eŋ kêmêgôm Anôtônê tôc.

21 Ma Apômtau kêsôm gêdêŋ Mose gebe “Ôlic acgom, aôm embe ô lasê Aiguptu, go ôŋgôm gêŋtalô samob, taŋ kakêŋ ŋaclai gêdêŋ aôm gebe ôŋgômŋa naŋ, ôkô Parao laŋônêmŋa. Mago aê oc jaŋgôm ênê ŋalêlôm ŋadani êsa, gebe êwi lau siŋ atom. 22 Go aôm ôsôm êndêŋ Parao gebe ‘Apômtaunê biŋ tau tonec gebe Ŋoc latuc ŋacsêga tau Israel, 23 ma aê jasôm êndêŋ aôm gebe “Ôwi latuc siŋ gebe naênam sakiŋ aê.” Ôlic acgom, embe ondec ma ôwi eŋ siŋ atom, go janseŋ aôm latôm ŋacsêga su.’”

24 Êsêac sêsêlêŋ sêmoa intêna e sêô lasê gamêŋ sênêc bêcŋa teŋ. Ma Apômtau gêdac Mose aŋga tônê ma kêsaê gebe ênac eŋ êndu. 25 Go Sipora kêkôc bôjaŋ poc ŋagaôgeŋ ma kêsa latu utiôlic jakêmoasac Mosenê lambi ŋa ŋaôlic tau tonaŋ ma kêsôm gebe “Biŋŋanô, aôm kôtu ŋoc ŋac-gebe-ênam- awêwaga todec.” 26 Go Apômtau gêwi eŋ siŋ gêmoa mata jali. Gêdêŋ tonaŋ awê tau kêlêwiŋ biŋ sêsa lauŋa gebe “Ŋac-gebe- ênam-awêwaga todec.”

27 Apômtau kêsôm gêdêŋ Aron gebe “Ôpuc Mose tôŋtôŋ ôsa gamêŋ sawa ôna.” Tec eŋ gêja ma gêdac Mose aŋga Anôtônê lôc ma kêlêsôp eŋ alianô. 28 Go Mose gêjac miŋ biŋ samob, taŋ Apômtau kêsôm gêdêŋ taŋ kêsakiŋ eŋ naŋ, to gêŋtalô samob, taŋ Apômtau kêjatu eŋ gebe êŋgômŋa. 29 Go Mose agêc Aron sêja ma sêkalem lau Israel nêŋ laumata samob sa sêpi tageŋ. 30 Ma Aron kêsôm biŋ samob, taŋ Apômtau kêsôm gêdêŋ Mose naŋ, ma gêgôm gêŋtalô lau sêlic. 31 Ma lau tau sêkêŋ gêwiŋ. Gêdêŋ taŋ sêŋô ŋawae gebe Apômtau kêtu ŋacleŋ lau Israel ma gêlic êsêacnêŋ gêŋwapac naŋ, êsêac sewec ma teteŋ mec.