Exo 5 | JAE | STEP | Tônê su, go Mose agêc Aron dêdêŋ Parao sêja ma sêsôm gebe “Apômtau, Israelnêŋ Anôtô, nê biŋ tonec gebe ‘Ôwi ŋoc lau siŋ gebe sêlic nêŋ om teŋ aŋga gamêŋ sawa êtu tetoc aê saŋa.’”

‏ Exodus 5

Mose agêc Aron sêkô Parao laŋônêmŋa

1 Tônê su, go Mose agêc Aron dêdêŋ Parao sêja ma sêsôm gebe “Apômtau, Israelnêŋ Anôtô, nê biŋ tonec gebe ‘Ôwi ŋoc lau siŋ gebe sêlic nêŋ om teŋ aŋga gamêŋ sawa êtu tetoc aê saŋa.’” 2 Mago Parao gêjô êsêagêc aweŋ gebe “Apômtau tau asa, tec jakêŋ taŋoc eŋ ma jawi Israel siŋ. Aê gajam kauc Apômtau tonaŋ, ma aê gadec gebe jawi Israel siŋ.” 3 Go êsêagêc sêsôm gebe “Ebolainêŋ Anôtô gêjam biŋgalôm gêwiŋ aêagêc, tec ateŋ aôm gebe ôwi aêac siŋ. Aêac asa gamêŋ sawa ana asêlêŋ bêc têlêacgeŋ ma akêŋ da êndêŋ Apômtau, aêacma Anôtô. Embe masi, oc êsêp êndêŋ aêac êmêŋ ŋa kole to siŋ.” 4 Mago Parao kêsôm gêdêŋ êsêagêc gebe “Mose agêc Aron, amagêc abe akôc lau su aŋga nêŋ kôm kêtu asageŋŋa. Aec su andêŋ nêm koleŋ ana.” 5 Ma Parao kêsôm teŋ gebe “Agêc alic acgom, galoc lau tau têtu taêsam su, ma amagêc abe akô êsêac auc aŋga nêŋ kôm ma akêŋ êsêac sêlêwaŋ tauŋ.” 6 Gêdêŋ bêc tonaŋgeŋ Parao kêjatu lausêlêsuwaga to gejobwaga gebe 7 “Akêŋ oba êndêŋ lau amboac agôm naŋ, êtiam atom. Êsêac tauŋ nasejoŋ oba gebe sêmansaŋ nomku têkê-têkê. 8 Mago nomku têkê-têkê ŋanamba, taŋ sêmasaŋ kêtôm bêcgeŋ naŋ, êkôgeŋ, êtu sauŋ atom, gebe êsêac ojomtêna, tec sêmôêc gebe ‘Ôwi aêac siŋ gebe akêŋ da êndêŋ aêacma Anôtô.’ 9 Akêŋ kôm ŋawapac êkôniŋ lau tonaŋ e ênam êsêac auc ma têtap nêŋ ŋasawa sêkêŋ taŋeŋ biŋ agwa-agwaŋa sa atom.”

10 Amboac tonaŋ lau-sêlêsuwaga to launêŋ gejobwaga sêsa sêja ma sêjac miŋ gêdêŋ lau gebe “Parao kêsôm biŋ tonec gebe ‘Aê jakêŋ oba êndêŋ amac êtiam atom. 11 Galoc amac taôm naajoŋ oba aŋga gamêŋ, taŋ atap oba saŋa naŋ. Mago nomku têkê-têkê, taŋ amac oc amansaŋ naŋ, ŋanamba êtu sauŋ atom, êtôm namba laŋgwa.’” 12 Amboac tonaŋ lau sêsêlêŋ sêjam gamêŋ Aiguptu samucgeŋ auc, gebe sejoŋ oba êtu sêmansaŋ nomku têkê- têkêŋa. 13 Lausêlêsuwaga sêkac êsêac ma sêsôm gebe “Anam nêm kôm êtôm bêcgeŋŋa e atap nomku têkê-têkê ŋanamba sa êtôm namba, taŋ atap sa gêdêŋ têm sêkêŋ oba gêdêŋ amacŋa naŋ.” 14 Paraonê lausêlêsuwaga sêjac launêŋ gejobwaga, taŋ êsêac sêjaliŋ sa gebe sejop tauŋ nêŋ lau naŋ, ma têtu kênac êsêac gebe “Gêdêŋ ocsalô tonec amac atap kôm ŋanô sa kêtôm gêmuŋŋa atom, nec ŋam amboac ondoc.”

15 Go lau Israel nêŋ gejobwaga dêdêŋ Parao sêja ma têtaŋ gebe “Amboac ondoc aôm gôgôm aêac, taŋ atu nêm sakiŋwaga naŋ, amboac tonaŋ. 16 Êsêac sêkêŋ oba teŋ gêdêŋ nêm sakiŋwaga atom, mago sêjatu gebe ‘Amansaŋ nomku têkê-têkê.’ Ma galoc ôlic, êsêac sêjac nêm sakiŋwaga gêwiŋ. Ŋakeso gêc aôm taôm nêm lauŋageŋ.” 17 Mago eŋ kêsôm gebe “Amac ojomtêna, amac ojomtêna. Kêtu tonaŋŋa amac asôm gebe ‘Ôwi aêac siŋ gebe akêŋ da êndêŋ Apômtau.’ 18 Aêc su, anam nêm kôm. Ac sêkêŋ oba êndêŋ amac atom, mago amac amansaŋ nomku têkê-têkê ŋanamba êtôm gêmuŋŋa.” 19 Lau Israel nêŋ gejobwaga sêmoa jageo ŋanô kêtu jatu tonecŋa gebe “Ajop taôm, gebe nomku têkê-têkê ŋanamba êtôm bêcgeŋŋa êtu sauŋ atom.” 20 Gejobwaga sêsa aŋga Paraonê andu sêja ma têtap Mose agêc Aron sa. Êsêagêc sêôŋ êsêac sêmoa. 21 Ma gejobwaga sêsôm gêdêŋ êsêagêc gebe “Apômtau mata ê amagêc e êmêtôc amagêc, gebe amagêc agôm Parao to nê lau têntac gedec aêac ma akêŋ siŋ kêsêp êsêac lemeŋ, gebe sênac aêac êndu.”

Mosenê mec

22 Go Mose kêkac tau ôkwi kêtiam gêmu gêdêŋ Apômtau gêja ma kêsôm gebe “O Apômtau, amboac ondoc tec gôgôm lau tonec sec. Aôm kôsakiŋ aê gamêŋ kêtu asageŋŋa. 23 Aê kasô gadêŋ Parao gaja ma kasôm biŋ gajam aôm laŋôm, mago eŋ gêŋô e gêgôm lau tonec sec, ma aôm tec gôjam nêm lau kêsi atomanô.”