Exo 8 | JAE | STEP | Go Apômtau kêsôm gêdêŋ Mose gebe “Ôsô ôndêŋ Parao ôna ma ôsôm êndêŋ eŋ gebe ‘Apômtaunê biŋ tau tonec gebe “Ôwi ŋoc lau siŋ, gebe nasênam sakiŋ aê.

‏ Exodus 8

Ôpoac ŋagêŋwapac

1 Go Apômtau kêsôm gêdêŋ Mose gebe “Ôsô ôndêŋ Parao ôna ma ôsôm êndêŋ eŋ gebe ‘Apômtaunê biŋ tau tonec gebe “Ôwi ŋoc lau siŋ, gebe nasênam sakiŋ aê. 2 Mago embe ondec ma ôwi êsêac siŋ atom, go jakêŋ ôpoac sêlênsôŋ nêm gamêŋ samucgeŋ. 3 Ôpoac sênam bu Nil auc. Êsêac sêpi nêm andu ma sêsô nêm balêm bêcŋa ma sênêc nêm mê. Êsêac sêpi nêm sakiŋwaga to nêm lau samob nêŋ andu. Êsêac sêsô nêm ki apac polomŋa ŋalêlôm to sênêc nêm suc aŋgaluŋ polomŋa. 4 Ôpoac oc sêŋgalab sêpi aôm to sêpi nêm lau ma nêm sakiŋwaga samob.” ’” 5 Ma Apômtau kêsôm gêdêŋ Mose gebe “Ôsôm êndêŋ Aron gebe ‘Ômêtôc lêmam to nêm tôc êndêŋ bu to busawa ma bu ŋatoŋ ma ôkêŋ ôpoac sênam gamêŋ Aiguptuŋa auc.’” 6 Amboac tonaŋ Aron kêmêtôc lêma gêdêŋ Aiguptu ŋabu samob ma ôpoac sêpi e sêjam gamêŋ Aiguptuŋa auc. 7 Mago lau mectomaŋŋa sêgôm gêŋ tônê ŋa nêŋ ŋaclai kaiŋ teŋ ma sêkêŋ ôpoac sêpi gamêŋ Aiguptuŋa sêmêŋ amboac tonaŋgeŋ.

8 Go Parao kêkalem Mose agêc Aron ma kêsôm gebe “Ateŋ Apômtau gebe êkôc ôpoac su aŋga aê to ŋoc lau ma jawi lau siŋ nasêkêŋ da êndêŋ Apômtau.” 9 Mose kêsôm gêdêŋ Parao gebe “Aê jateŋ aôm gebe taôm ôsam bêc ôpoac sêwi aôm to nêm andu samob siŋŋa, go jateŋ êtu aôm to nêm sakiŋwaga ma nêm lauŋa. Ma ôpoac oc sêmoa bu Nil tageŋ.” 10 Ma Parao kêsôm gebe “Eleŋŋa.” Mose kêsôm gebe “Biŋ, taŋ aôm kôsôm naŋ, oc ŋanô êsa, ec ôjala gebe ŋac teŋ kêtôm Apômtau, aêacma Anôtô, gêmoa atomanô. 11 Ôpoac oc sêwi aôm to nêm andu ma nêm sakiŋwaga to nêm lau samob siŋ. Êsêac oc sêmoa bu Nil tageŋ.” 12 Go Mose agêc Aron sêwi Parao siŋ, ma Mose awa gêjac Apômtau kêtu ôpoacŋa, kêtôm taŋ eŋ kêmasaŋ biŋ gêwiŋ Parao naŋ. 13 Ma Apômtau gêgôm kêtôm Mosenê biŋ. Ôpoac sêmac êndu aŋga andu to malacluŋ ma kôm. 14 Ma êsêac sêboa ôpoac sa totoŋ-totoŋ e ŋasu kêpôŋ popoc gêjam gamêŋ samucgeŋ auc. 15 Mago gêdêŋ taŋ Parao kêsaê gebe gêŋwapac kêlêwaŋ eŋ naŋ, eŋ gêgôm nê ŋalêlôm ŋadani kêsa e kêkêŋ taŋa êsêagêcnêŋ biŋ atom kêtôm Apômtau kêsôm kwanaŋgeŋ.

Kawaŋ ŋagêŋwapac

16 Go Apômtau kêsôm gêdêŋ Mose gebe “Ôsôm êndêŋ Aron gebe ‘Ômêtôc nêm tôc ma ôi nom ŋakekop e êtu kawaŋ ênam gamêŋ Aiguptuŋa samucgeŋ auc.’” 17 Ma êsêagêc sêgôm amboac tonaŋ. Aron kêmêtôc lêma tonê tôc ma gi nom ŋakekop, ma kawaŋ kêpi e gêŋac ŋamalac to bôc. Nom ŋakekop samucgeŋ kêtu kawaŋ gêjam gamêŋ Aiguptuŋa auc samucgeŋ. 18 Lau mectomaŋŋa sêsaê gebe sêkêŋ kawaŋ amboac tonaŋ ŋa nêŋ ŋaclai kaiŋ teŋ, mago sêgôm têtôm atom. Amboac tonaŋ kawaŋ gêjac têc ŋamalac to bôc auc. 19 Ma lau mectomaŋŋa sêsôm gêdêŋ Parao gebe “Anôtônê lêma ŋakôm tonec.” Mago Paraonê ŋalêlôm ŋadani kêsa e kêkêŋ taŋa êsêagêcnêŋ biŋ atom kêtôm Apômtau kêsôm kwanaŋgeŋ.

Daŋguc ŋagêŋwapac

20 Go Apômtau kêsôm gêdêŋ Mose gebe “Ôndi sa êndêŋ bêbêc kanucgeŋ ma ônsaê Parao êsa bu êna, go êsôm êndêŋ eŋ gebe ‘Apômtaunê biŋ tau tonec gebe “Ôwi ŋoc lau siŋ, gebe nasênam sakiŋ aê. 21 Ôlic acgom, embe ôwi ŋoc lau siŋ atom, go jasakiŋ daŋguc êpi aôm to nêm sakiŋwaga ma nêm lau ma êsô nêm andu amboac tonaŋ. Ma daŋguc tolêsôb-tolêsôb ênam lau Aiguptu nêŋ andu auc ma ênac têc nom, taŋ ŋamalac sêmoa naŋ, auc amboac tonaŋgeŋ. 22 Êndêŋ bêc tonaŋ aê jaŋgôm gamêŋ Gosen amboac teŋ. Ŋoc lau sêmoa gamêŋ tonaŋ, tec daŋguc teŋ êmoa atom e ôjala gebe aê Apômtau gamoa gamêŋ tau ŋalêlôm. 23 Amboac tonaŋ aê jawa ŋoc lau to nêm lau êkôc. Biŋ tonaŋ êsa êndêŋ eleŋŋa.” ’” 24 Ma Apômtau gêgôm biŋ tonaŋ ŋanô kêsa. Daŋguc tolêsôb-tolêsôb kêsô Parao to nê sakiŋwaga nêŋ andu. Ma gamêŋ Aiguptuŋa samucgeŋ kêtap daŋguc ŋagêŋwapac sa.

25 Go Parao kêkalem Mose agêc Aron ma kêsôm gebe “Ajôc, akêŋ da êndêŋ nêm Anôtô aŋga gamêŋ tonec.” 26 Mago Mose kêsôm gebe “Biŋ amboac tonaŋ oc êtôm atom, gebe gêŋ, taŋ aêac oc akêŋ êtu da êndêŋ Apômtau, aêacma Anôtô, naŋ, lau Aiguptu sêlic amboac gêŋ alôb- alôb. Ma aêac embe akêŋ gêŋ, taŋ lau Aiguptu sêlic amboac gêŋ alôb-alôb naŋ, êtu da êsêac sêlic, oc têtuc aêac ŋa poc êndu atom me. 27 Aêac asêlêŋ êtôm bêc têlêac asa gamêŋ sawa ana, go akêŋ da êndêŋ Apômtau, aêacma Anôtô, êtôm eŋ tau kêjatu aêac naŋ.” 28 Tec Parao kêsôm gebe “Aê jawi amac siŋ naakêŋ da êndêŋ Apômtau, amacnêm Anôtô, aŋga gamêŋ sawa. Tageŋ amac ana jaêcgeŋ atom. Awem ênac Apômtau êtu aêŋa.” 29 Go Mose kêsôm gebe “Ôlic acgom, aê jawi aôm siŋ jasa najateŋ mec êndêŋ Apômtau gebe eleŋŋa daŋguc tolêsôb- tolêsôb êwi Parao to nê sakiŋwaga ma nê lau siŋ. Tageŋ aôm ônsau aêac êtiam atom ma ôŋgamiŋ lau gebe sêkêŋ da êndêŋ Apômtau nec atom.” 30 Ma Mose kêsa aŋga Paraonê jaketeŋ mec gêdêŋ Apômtau. 31 Ma Apômtau gêgôm biŋ, taŋ Mose keteŋ naŋ, ŋanô kêsa ma kêkôc daŋguc tolêsôb-tolêsôb su aŋga Parao to nê sakiŋwaga ma nê lau nêŋ. Daŋguc teŋ gêmoa kêtiam atom. 32 Mago Parao gêgôm nê ŋalêlôm ŋadani kêsa kêtiam ma gêwi lau siŋ atom.