Exo 9 | JAE | STEP | Go Apômtau kêsôm gêdêŋ Mose gebe “Ôsô ôndêŋ Parao ôna ma ôsôm êndêŋ eŋ gebe ‘Apômtau, Ebolainêŋ Anôtô, nê biŋ tau tonec gebe “Ôwi ŋoc lau siŋ, gebe nasênam sakiŋ aê.

‏ Exodus 9

Bôc têtap gêŋwapac sa

1 Go Apômtau kêsôm gêdêŋ Mose gebe “Ôsô ôndêŋ Parao ôna ma ôsôm êndêŋ eŋ gebe ‘Apômtau, Ebolainêŋ Anôtô, nê biŋ tau tonec gebe “Ôwi ŋoc lau siŋ, gebe nasênam sakiŋ aê. 2 Ôlic acgom aôm embe ondec gebe ôwi êsêac siŋ ma ôkôc êsêac tôŋ ŋapaŋ, 3 go Apômtau lêma ênac aômnêm bôc, taŋ sêmoa kôm naŋ, hos to doŋki ma kamele to bulimakao ma domba. Samob têtap gêmac sec kaiŋ teŋ sa. 4 Ma Apômtau êwa lau Israel to Aiguptu nêŋ bôc êkêc, ma lau Israel nêŋ bôc teŋ êmac êndu atom.” ’” 5 Ma Apômtau kêkêŋ noc ma kêsôm gebe “Eleŋŋa Apômtau gebe êŋgôm biŋ tau ŋanô êsa aŋga gamêŋ tonec.” 6 Ma geleŋŋa Apômtau gêgôm gêŋ tau. Lau Aiguptu nêŋ bôc samob sêmac êndu, mago lau Israel nêŋ bôc teŋ gêmac êndu atom. 7 Ma Parao kêsakiŋ lau gebe sênac lau Israel nêŋ bôc kêsi ma êsêac sêlic gebe nêŋ bôc teŋ gêmac êndu atom. Mago Paraonê ŋalêlôm ŋadani kêsa ma gêwi lau siŋ atom.

Kamocmatu ŋagêŋwapac

8 Ma Apômtau kêsôm gêdêŋ Mose agêc Aron gebe “Akôc ŋagasi aŋga ki ano gêŋŋa êsêp amagêc lemem ma Mose êpalip gêŋ tau êpi umboŋ ma Parao êlic. 9 Ŋagasi tau oc ênam tau ôkwi êtu kekop ênam gamêŋ Aiguptuŋa samucgeŋ auc e êŋgôm kamocmatu ênam ŋamalac to bôc nêŋ ôliŋ auc aŋga gamêŋ Aiguptuŋa samucgeŋ, ma kamocmatu tau êu lasê e êtu kamoc.” 10 Amboac tonaŋ êsêagêc sêkôc ŋagasi tau ma sêkô Parao laŋônêmŋa. Ma Mose kêpalip kêpi umboŋ e ŋamalac to bôc têtap kamocmatu sa, tec kamocmatu tau gêu lasê e kêtu kamoc. 11 Lau mectomaŋŋa têtôm gebe sêkô Mose laŋônêmŋa atom, gebe kamocmatu gêjam êsêac auc kêtôm gêjam lau Aiguptu ŋagêdô samob auc. 12 Mago Apômtau gêgôm Paraonê ŋalêlôm ŋadani kêsa e kêkêŋ taŋa êsêagêcnêŋ biŋ atom kêtôm Apômtau kêsôm gêdêŋ Mose kwanaŋgeŋ.

Kompoc ŋagêŋwapac

13 Go Apômtau kêsôm gêdêŋ Mose gebe “Ôndi êndêŋ eleŋ bêbêc kanucgeŋ ma ôkô Parao laŋônêmŋa ma ôsôm êndêŋ eŋ gebe ‘Apômtau, Ebolainêŋ Anôtô, nê biŋ tau tonec gebe “Ôwi ŋoc lau siŋ gebe nasênam sakiŋ aê. 14 Gebe galoc aê oc jasakiŋ ŋoc gêŋwapac samob êkôniŋ nêm ŋalêlôm to nêm sakiŋwaga ma nêm lau e ôjala, gebe ŋac teŋ kêtôm aê gêmoa nom atomanô. 15 Wanêcgeŋ aê embe jaôc lemoc sa ma janac aôm to nêm lau ŋa gêmac sec, oc galoc amac anaŋa aŋga nom su. 16 Mago aê gaseŋ aôm su atom, gebe jatôc ŋoc ŋaclai êndêŋ aôm ma jaŋgôm ŋoc ŋaê ŋawae êsa êtu tapa aŋga nom samucgeŋ. 17 Aôm kotoc taôm sa gêdêŋ ŋoc lau ŋapaŋ ma gôwi êsêac siŋ atom. 18 Ôlic acgom, eleŋŋa ŋaockatu amboac tonec aê jakêŋ kompoc ênac kapôêŋanô. Gêdêŋ têm, taŋ Aiguptu kêsa e mêŋgêdêŋ galoc kompoc amboac tonaŋ gêjac kêsêp Aiguptu atomanô. 19 Amboac tonaŋ ôsakiŋ ŋawae gebe nêm bôc samob to gêŋ samob, taŋ gêmoa kôm naŋ, sêlamu gadê teŋ, gebe kompoc oc ênac ŋamalac to bôc samob, taŋ sêmoa kôm ma nêŋ gadê masi naŋ, sêmac êndu.” ’” 20 Go Paraonê sakiŋwaga ŋagêdô, taŋ têtêc Apômtaunê biŋ naŋ, sêkêŋ nêŋ gêŋôma to nêŋ bôc sêc jasêlamu nêŋ andu. 21 Mago êsêac, taŋ Apômtaunê biŋ kepeŋ nêŋ ŋalêlôm atom naŋ, dedec nêŋ gêŋôma to nêŋ bôc gacgeŋ sêmoa kôm.

22 Ma Apômtau kêsôm gêdêŋ Mose gebe “Ômêtôc lêmam êndêŋ undambê gebe kompoc ênac êpi ŋamalac to bôc ma gêŋ kômŋa aŋga gamêŋ Aiguptuŋa samucgeŋ.” 23 Go Mose kêmêtôc lêma totôc gêdêŋ undambê, ma Apômtau kêkêŋ wapap to kompoc gêjac ma ôsic kêkac kêsêp nom gêmêŋ. Ma Apômtau kêkêŋ kompoc gêjac gamêŋ Aiguptuŋa. 24 Kompoc gêjac ma ôsic kêkac gê tôŋgeŋ kêsêp kompoc ŋalêlôm. Gêdêŋ têm samob, taŋ ŋamalac Aiguptuŋa sêbiŋ tauŋ tôŋ têtu lau-m kapôêŋ naŋ, kompoc kapôêŋanô amboac tonaŋ gêjac atomanô. 25 Kompoc kêtuc gêŋ samob, taŋ gêmoa kôm naŋ, aŋga gamêŋ Aiguptuŋa samucgeŋ. Gêjac ŋamalac to bôc kêtômgeŋ ma gêjac gêŋ kômŋa samob to kêtuc ka samob, taŋ kêkô kôm naŋ, tulu. 26 Gamêŋ Gosen tageŋ, taŋ lau Israel sêŋgôŋ naŋ, tec kompoc kêsêp atom.

27 Go Parao kêsakiŋ biŋ gêdêŋ Mose agêc Aron gebe sêmêŋ ma kêsôm gêdêŋ êsêagêc gebe “Aê gagôm sec gêdêŋ ŋasawa tonec. Apômtau eŋ ŋac gêdêŋ ma aê to ŋoc lau agôm gêŋ keso. 28 Ateŋ Apômtau gebe wapap to kompoc êmbacnê, gêjac kêtômgac. Aê gabe jawi amac siŋ ana, amac oc amoa tonec baliŋanô atom.” 29 Mose kêsôm gêdêŋ eŋ gebe “Êndêŋ taŋ jawi malac siŋ su, go jalam lemoc êndêŋ Apômtau, ma wapap êmbacnê ma kompoc ênac êtiam atom, ec ôjala gebe Apômtau kêtu nom ŋatau. 30 Mago aê kajala gebe aôm to nêm sakiŋwaga atêc Apômtau Anôtô atom tageŋ.”

31 (Kompoc geseŋ gêŋ kômŋa, taŋ kêtu gagweŋ naŋ su, 32 gêŋ kômŋa ŋagêdô, taŋ kêpoa atom tageŋ naŋ, gêjaŋa atom.)

33 Amboac tonaŋ Mose kêsa aŋga Paraonê jagêwi malac siŋ ma gêlam lêma gêdêŋ Apômtau, tec wapap to kompoc gêbacnê, ma kom kêsêwa kêsêp nom kêtiam atom. 34 Gêdêŋ taŋ Parao gêlic gebe kom to kompoc ma wapap gêbacnê naŋ, eŋ gêgôm sec kêtiam ma eŋ tau to nê sakiŋwaga sêgôm nêŋ ŋalêlôm ŋadani kêsa. 35 Amboac tonaŋ Paraonê ŋalêlôm ŋadani ma gêwi lau Israel siŋ atom kêtôm Mose kêsôm kwanaŋgeŋ gêjam Apômtau awa.