‏ Isaiah 55

Apômtau gebe êkêŋ nê taê walô êndêŋ lau samob ŋaômageŋ

1“Ajôc, amac lau, taŋ bu gêjô amac naŋ, samob andêŋ bu amêŋ.
Ma amac, taŋ nêm mone masi naŋ, amêŋmaŋ.
Akôc ma aniŋ.
Mêŋakôc wain to su ŋaôma toŋaôli masigeŋ.
2Amboac ondoc, tec ajaiŋ nêm mone kêpi gêŋ, taŋ gêlôm amac amboac mo atom naŋ,
ma nêm kôm ŋaôli gêjô gêŋ, taŋ gêôc amac tôŋ atom naŋ.
Aŋô, aŋô ŋoc biŋ ma oc aniŋ geŋ ŋajam
ma nêm katôm oc êtap moasiŋ ŋajam sa.
3Akêŋ taŋem ma andêŋ aê amêŋ.
Aŋô gebe nêm katôm oc sêŋgôŋ mateŋ jali.
Aê oc jamoatiŋ poac teŋgeŋŋa êndêŋ amac
êtu têtac gêwiŋ teŋgeŋŋa, taŋ gajac mata gêdêŋ Dawid naŋŋa.
4Ôlic acgom, aê kakêŋ eŋ gêwa biŋ sa gêdêŋ lau tomôkê-tomôkê,
ma kêtu tenteŋlatunêŋ ŋatau to gôliŋwaga.
5Ôlic acgom, aôm oc ômôêc lau tomôkê-tomôkê, taŋ gôjam kauc êsêac naŋ,
ma lau tomôkê-tomôkê, taŋ sêjam kauc aôm naŋ, oc dêndêŋ aôm sêwac
êtu Apômtau, aômnêm Anôtô ma Israelnêŋ ŋac dabuŋ, taŋ kêwaka nêm ŋawasi sa naŋŋa.”

6Ansom Apômtau, gebe têm atap eŋ saŋa tec gêc.
Aweŋ ênac eŋ, gebe gêmoa amac ŋagala.
7Ŋac sec êwi nê lêŋ siŋ
ma ŋac alôb-alôb êwi nê biŋ, taŋ taê gêjam naŋ siŋ
ma êmu êndêŋ Apômtau êna êtiam
gebe eŋ tau oc taê walô eŋ.
Eŋ êmu êndêŋ aêacnêŋ Anôtô êna gebe eŋ oc êsuc ênê sec ôkwi samucgeŋ.

8Apômtau kêsôm gebe “Biŋ, taŋ aê taêc gêjam naŋ, kêtôm biŋ, taŋ amac taêm gêjam naŋ atom,
ma amacnêm lêŋ kêtôm aêŋoc lêŋ atom,
9gebe ŋasawa, taŋ geŋ aêŋoc lêŋ to amacnêm lêŋ
ma biŋ, taŋ aê taêc gêjam to biŋ, taŋ amac taêm gêjam naŋ, gêŋgic naŋ,
kêtôm ŋasawa, taŋ geŋ undambê to nom gêŋgic naŋ.

10“Aêŋoc biŋ oc êtôm kom to sno gêjac kêsêp aŋga umboŋ gêmêŋ
ma oc êmu êpi êtiam atom
e êmalôm nom ma ŋawê êpoa to êlêc sa
ma êkêŋ ŋawê êndêŋ ŋac-kêpalip-ŋawêwaga
to êkêŋ mo gebe lau sêniŋ.
Ma aêŋoc biŋ, taŋ kêsa aŋga aocsuŋ gêja naŋ,
oc êmu êmêŋ toŋanômê atom amboac tonaŋgeŋ.
Oc ênam kôm êtôm taŋ aê taêc gêjam naŋ.

“Gebe amac oc asa totêmtac ŋajamgeŋ ana
ma jawê amac tobiŋmalôgeŋ.
Lôc to gamêŋ ŋabau oc lasê êtaŋ êtu amacŋa
ma ka saleŋŋa samob oc sêmakop lemeŋ.
Ma kêmêsic oc êpi êjô gêŋ têkwa-têkwa
ma môsi êpi êjô locgôm
ma gêŋ tonaŋ êŋgôm Apômtaunê wae êsa
ma êtu ŋabelo teŋgeŋŋa, taŋ senseŋ su atomanô naŋ.”
12 56:1 — 57:21 ŋalôtêna ŋagêdô, taŋ kêkanôŋ biŋ takêŋ gêwiŋŋa to ŋamalacnêŋ lêŋ sêwi Anôtô siŋŋa naŋ, kêsêp ŋasêbu tonec. Ŋasêbu tau ŋabiŋ ŋamuŋa gêjac mata gebe Anôtô ênam nê lau sa to gêjac mata gebe ênam êsêac kêsi.