Isa 65 | JAE | STEP | Apômtau kêsôm gebe “Aê kasaê êsêac, taŋ sêjam mateŋ sa êtu aêŋa atom naŋ, ma kasaê lau, taŋ sesom aê atom naŋ, gebe têtap aê sa. Aê kasôm gebe ‘Aê tec gamoa, aê tec gamoa’ gêdêŋ lau, taŋ aweŋ gêjac aê atom.

‏ Isaiah 65

Anôtô kêtaŋ taŋiboa kêtu lau sêkêŋ dêmôêŋ eŋŋa

1 Apômtau kêsôm gebe “Aê kasaê êsêac, taŋ sêjam mateŋ sa êtu aêŋa atom naŋ, ma kasaê lau, taŋ sesom aê atom naŋ, gebe têtap aê sa. Aê kasôm gebe ‘Aê tec gamoa, aê tec gamoa’ gêdêŋ lau, taŋ aweŋ gêjac aê atom. 2 Aê kamêtôc lemoc kêtôm bêc samuc gêdêŋ lau sêli tauŋ saŋa, taŋ sêsa nêŋ lêŋ alôb-alôb kêtôm tauŋ nêŋ kauc taêŋ gêjam naŋ. 3 Ma sêgôm aê têtac ŋandaŋ kêsa ŋapaŋ tomajeŋ gêbacgeŋ. Êsêac sêkêŋ da aŋga nêŋ kôm ma gêŋ malu kêtu daja gêsac poc tiki-tiki, taŋ sêpac naŋ ŋaô. 4 Ma sêŋgôŋ gamêŋ sêôŋa ma sêkac tauŋ sa gêdêŋ gêbêc aŋga gamêŋ ŋakêsiŋ ŋagêdô. Ma seŋ bôcanô ŋamêsôm to gêŋ, taŋ gajac jao naŋ, ŋasulu kêpoac nêŋ laclu ŋalêlôm. 5 Êsêac sêsôm gebe ‘Amoa nêm taômŋa ma mêŋandambiŋ aêac atom gebe aêac lau dabuŋ.’ Lau tonaŋ têtôm ja dauŋ kêtuŋ aê lusucsuŋ, kêtôm ja kêtuŋ aê bêc samuc.”

65:6-16 Anôtô geoc lasê gebe êmêtôc lau sêbuc dêmôêŋ eŋŋa ma gêjac mata sêŋgôŋ mateŋ jali teŋgeŋ ŋawasi gêdêŋ lau ŋalêlôm ŋaŋêŋ. Biŋ tonaŋ lulu kêgaluŋ tau aŋga ŋasêbu tonaŋ.

Undambê wakuc to nom wakuc

17 “Alic acgom, aê jakêŋ undambê wakuc to nom wakuc.
Ma lau oc taêŋ ênam gêŋ andaŋgeŋŋa êtiam atom
me oc ênêc nêŋ kauclêlôm êtiam atom.
18 Ma lau oc têntac ŋajam to sênam lasê
êtu gêŋ, taŋ aê jakêŋ naŋŋa.
Gebe alic acgom, aê jakêŋ Jerusalem têtac ŋajam êsa
ma ŋalau têtu samuc.
19 Ma aê oc têtac ŋajam êpi Jerusalem
ma jatu samuc ŋoc lau.
Ma lau sêŋô lau sêpuc taŋiboa sa
ma têtaŋ aŋga malac tau êtiam atom.
20 Ŋapalê dedec teŋ oc êmoa bêc luagêcgeŋ aŋga malac tau ma êmac êndu atom
ma ŋamalacanô oc êmac êndu atom e nê bêc ŋatêku êsu.
Gebe ŋapaŋ dedec nê jala êtu 100, go êmac êndu
ma teŋ nê jala embe êtôm 100 atom ma êmac êndu,
naŋ lau oc sêsôm gebe Anôtô kêpuc boa eŋ.
21 Ma êsêac oc sêkwê andu sa ma sêŋgôŋ
ma oc sêsê kôm wainŋa ma sêniŋ ŋanô.
22 Êsêac oc sêkwê andu sa ma lau teŋ sêŋgôŋ atom
ma êsêac oc sêsê wain ma lau teŋ sêniŋ atom
gebe ŋoc launêŋ bêc sêŋgôŋ nomŋa oc êtu taêsam êtôm kabôêŋ ŋabêc,
ma ŋoc lau, taŋ kajaliŋ sa naŋ, oc têtu samuc nêŋ lemeŋ ŋakôm ŋanô.
23 Êsêac oc sênam koleŋ ŋaômageŋ atom
ma sêka gôlôac lasê êtu sêôc gêŋwapacŋa atom.
Gebe lau, taŋ Apômtau gêjam mec naŋ, nêŋ wakuc êsêac.
Ma êsêacnêŋ gôlôac oc sêmoa sêwiŋ êsêac.
24 Êsêac aweŋ ênac aê atomgeŋ ma aê jajô êsêacnêŋ biŋ.
Êsêac gocgo sêsôm biŋ sêmoa ma aê jakêŋ taŋoc êsêac.
25 Kêambôm to domba ŋalatu oc sêniŋ gêŋ sêwiŋ tauŋ
ma lewe oc sêniŋ gêgwaŋ êtôm bulimakao
ma kekop êtu moacnê mo.
Êsêac oc sêkêŋ ŋandaŋ to senseŋ gêŋ aŋga ŋoc lôc dabuŋ atom.
Apômtaunê biŋ tau tonec.”